Skip to Content

659 Views

“شەڕی برا کوژی” “شەڕی کورد لەگەڵ کورد” دوو دەربرینی هەڵەو چەواشەکارانە!!

“شەڕی برا کوژی” “شەڕی کورد لەگەڵ کورد” دوو دەربرینی هەڵەو چەواشەکارانە!!

Be First!
by March 6, 2017 General
image_print


عەبدوڵا مەحمود

دوا بەدوای گرژی و ئاڵۆزییە چەکداریەکەی ٣ ئاداری نێوان ‌هێزەکانی سەر بەپارتی دیموکراتی کوردستان و هێزەکانی سەر بەپەکەکە لە خان سوری شەنگال، تێرمی شەری براکوژی!! جارێکی تر‌ میدیا و کەناڵە راگەیاندنەکانی تەنی. نووسەران و قەڵەم بەدەست و بەرپرسە حزبی و حکومی و زۆرێک لەبەشداربووان لە تورە کۆمەڵایەتیەکانی وەکو فەیس بوک و تویتەر، حەماسەتیان جوڵا. مەقۆلەی شەری براکوژیان لە کارخانەی بزوتنەوەی کوردایەتی و فەرهەنگی حزبەکانیدا، ‌هێنایەوە دەر. دیارە ئەم دەربرینە بۆ ئەوەیە کە ناوەرۆکی شەر و بەیەکدادانی نێوان لایەنەکان، بشارێتەوە. نە براکان و نە خوشکەکان شەر لەگەڵ برا و خوشکەکانیان ناکەن، ئەمە درۆیەکی ئاشکرایە. ئەوەی کە شەر دەکات ئەوانەن کە براکان و خوشکەکان، خەڵتانی خوێن دەکەن و کۆمەڵگا رەشپۆش دەکەن. براکان و خوشکەکان دەکەن بەگژ یەکتریدا و پاساو بۆ کوشتارو رەوایەتی بەو کوشتارە تیۆریزە دەکەن.

شەری نێوان لایەنەکانی بزوتنەوەی کوردایەتی لەگەڵ یەکتری شەری برا کوژی نییە، شەری دەسەڵاتە. مێژووی ئەم جەنگی دەسەڵاتە، و دەستبردن بۆ چەک بۆ پاوانی دەسەڵات و وەرگرتنی پاداشتی خۆشخزمەتی بە وڵاتانی کۆنەپەرستی ناوچەکە بە تایبەت دەوڵەتی فاشیستی تورکیا و کۆماری کۆنەپەرستی سێدارەو سەنگساری ئیران، نەریت و عادەتێکی لە مێژینەی حزبەکانی بۆرژوازی کوردە. کەم رودەدات برایەک برایەک یان برایەک خوشکیک بکوژێت، بەڵام دیاردەیەکی ئاساییە، جەنگی دەسەڵاتی ئەم حزبانە بۆ دەسەڵات، بە هەزاران و دەیان هەزار خوشک و برا، بخاتە ناو بەرداشی شەری دەسەڵاتەوە، بیان هارێت، کەم ئەندام دیل و ئەتک بکات. و چارەنوسی بی سەروشوێنەکانیش لە دایک و خوشک و براکان بشارێتەوە یان بەعس ئاسا ئەنفالیان بکات. کەسانێک کە چاوپۆشی لەو راستیانە دەکەن، بەشێکن لە ماشینی جەنگی دەسەڵاتی ئەم حزبانە.

شەری نێوان لایەنگران و هێزی دەست پەروەردەکراوی پارتی، لەگەڵ هیزو لایەنەکان و دەستپەروەردەکراوی پەکەکە، شەری ئاشکرای دەسەڵاتە بە پشتیوانی ئاشکرای رژێمی تورکیا و ئیران و دەسەڵاتی عێراقی نۆکەری ئاخوندەکانی ئێران… ئەم دوو هێزە بە پشیوانی چەک و هێزی چەکداریان. لە جغرافیای کوردستانی گەورەدا!! هەم حزب و ڕیکخراوەی سیاسی، هەم رێکخراوەی جەماوەری و دەزگای میدیایی و تایبەتی و سەربەخۆیان و هەم ‌هێزی چەکداری پەروەردەکراویان هەیە. لە هەر چوار بەشەکەی کوردستاندا، ئەم دوو هێزە لەسەر بنەمای بیئیرادەکردنی خەڵکی کوردستان و رادەستکردنی ئیرادەی سیاسی خۆیان بە وڵاتانی کۆنەپەرست، دژی بزوتنەوەی نارەزایەتی خەڵکی کوردستان، مایەیان داناوە. بۆ پارتی تورکیاو ئەردۆغانی داعشی نزیکترە لە پەکەکەو حزبی دیموکرات و تەنانەت یەکێتی نیشتیمانی. بۆ پەکەکەش کۆماری سێدارەی ئێران و دەسەڵاتی رەوتی شیعە گەرای عێراق… نزیکترە لە حزبی دیموکرات و پارتی و یەکێتی …تاد. ئەمەش نەک روداوێکی بەرێکەوت و سادە، بەڵکە سەرچاوەی لەوەستانەوە بەرووی ئیرادە نواندنی ئازادانەی خەڵکی کوردستانەوە هاتووە. ئەم حزبانە لەخانەوادەی بۆرژوای کورددا، جەنگی نێوان خۆیان و بەرژەوەندیەکانیان، بە ناوی شەر لەسەر خواستەکانی خەڵکی کوردستان و زۆر جار بەدۆسیەی بانگەشەی سەربەخۆیشەوە، ئەنجام دەدەن. تا زۆرترین خوێنی براو خوشکە و کوردەکانیان!! برژێت.

“شەری کورد بەکورد” دەربرێنێکی تری چەواشەکارانەیە. کەم نین کە دەڵێن نابێ خوێنی کورد بەدەستی کورد برژێت! ئەمانە لەلایەکەوە هەموو کورد، وکو یەک دەبینن و خێڵی تاڵانچی و خۆشخزمەت و نۆکەر و کرێگرتەو ملیاردێرو ملیۆنیرەکان و موچەخۆرانی کادری حزب، وەکو زوربەی خەڵکی دزیلێکراو نەدار و بێکارو برسی کوردستان دەبینن. بەم دەربڕینە چەواشەکارانەیە دەیانەوێ تا دنیا هەیە زوربەی زۆری خەڵکی نەدارو دزیلێکراوی کوردستان بێدەنگ بکەن. چونکە برایانی کوردیان، لە خۆیان و لە رەگەزی خوێنی کوردن!!. لە لایەکی تریشەوە خوێنی کورد نابێ بەدەستی کورد برژێ، یانی ئەگەر رەگەزی غەیرە کورد ئەمە بکات، رەوایەتی هەیە. یان ئەگەر کوردەکان خوێنی عەرەب و تورک و فارس و کەسانی دەرەوەی رەگەزی کورد برێژن ئاسایی بێت. بەراستی شەرمە لەدنیای ئەم سەردەمەدا ئەم دەربرێن و بۆچوونانە جێگایان بێتەوە. لەوەش زیاتر لە ساڵی ١٩٩١ وە تا ئێستا، ئەوانەی بانگەشەی برایەتی کورد و کورد دەکەن، فیشەکیكیان دژی هێزە سەرکوتکەرو درندەکانی رژێمی تورکیاو ئێران و سوریا، نەک نەتەقاندووە، بەڵکو لەخزمەتکردن پێیان و پێشلەشکری بۆیان درێغیان نەکردووە. بۆ ئۆزال و خومەینی هێندە شین و گریانی ساختانەیان کردووە، لەکاتێکدا بە کوشتاری برا!! کوردەکانیان، لەجەنگی دەسەڵات و پاوانی قەڵەمرەوی سیاسییدا، مێشێک میوانیان نەبووە.

نە شەرێک هەیە بە ناوی شەری براکوژی و نە شەریش شەری نیوان کورد و کوردە، شەری نێوان حزبە چەکدارەکانی بزوتنەوە کوردایەتی، شەری داسەپاندنی دەسەڵات و پاوانکردنی جغرافیای قەڵەمرەوی سیاسی و داسەپاندنی نەخشەی و تموحی جۆراوجۆرە لەهەر چوار بەشی کوردستاندا.
لە کۆمەڵگای کوردستاندا، قڵشتی چینایەتی راستیەکی حاشاهەڵنەگری کۆمەڵگایەو برا سەرمایەدارە دزو تاڵانچی و دەسەڵات بەدەست و کرێگرتەکان، داهاتی زوربەی زۆری براو خوشک و گەورەو بچوکی کوردستانیان، دەست بەسەردا گرتووە بە زۆری هێزی چەکدارو فریوکاریش… دەچنە جەنگی خوشک و برا کوردە کرێکارو زەحمەتکێش و نەدارە تورەو نارازیەکانی کورستان و لەهەر جێگایەک دەسەڵاتیان بکەوێتە بەردەم هەرەشە، بە سەرکوت و کوشتاری بێپەردە، خوشک و برا و گەورەو بچوکی کوردستان قەسابی دەکەن. هێشتا ئەمە هەموو حکایەتە بەردەوامەکە نییە، هاوکات حزبە چەک بەدەستەکانی بۆرژوازی کورد، لەناو خۆشیاندا چەند باڵ و لاباڵن، ململانێی لەناو خانەوادەی بۆرژوازی کوردا، لەسەر بەشی زۆرتر قەڵەمرەوی سیاسی، داهاتی زۆرتر، خۆشخزمەتی بە قوتبە زلهیزەکانی دنیاو ناوچەییەکان، لە ململانێی و کێشمەکێشی بەردەوام دان. ئەمانە هەموویان خوشک و برای یەکن، هەموویان کوردن، بەڵام هەریەکەیان لەپێناو نەخشەو بەرژەوەندی خۆیان و ئاغاکانیاندا،پەتی تەحەمولیان بەو بەرژەوەنیانە بەستراوەتەوەو لەهەر گۆشەو جێگایەکدا، ئەو بەرژەوەندی و دەسەڵاتەیان، لەلایەن یەکێک لەباڵ و لاباڵە چەکدارەکاندا بکەوێتە بەردەم هەرەشە، دەست بۆ چەک و راکێشان و پێشلەشکری بۆ برا تورک و فارس و عەرەب، ئینگلیزو روس و…!! دەبەن و سڵ لەخوڵقاندنی هیچ کارەساتێک ناکەنەوە.

هەموو شەرو بەیەکدادانەکانی مێژووی بزوتنەوەی بۆرژوازی کورد و حزبەکانی، تا دەگاتە شەرو بەیەکدادانی ٣ی ئازاری ئەم مانگە ریشەی لەهەمان واقعیەت دایە. بۆیە دەربرینی شەری براکوژی، یان شەری کورد بە کورد، درۆیەکی ئاشکراو بەکاربردنیشی لەلایەن سەرانی ئەم حزبانەو میدیای نۆکەریانەوە، پاساوە بۆ پاکانەکردن و شان خاڵیکردنەوە لە بەرپرسیاریەتی ئەم کوشتارو ماڵوێرانیەی لەجەنگی دەسەڵاتی نێوانیاندا، بەسەر کۆمەڵگای دەهێنن…

abdulla.mahmud@gmail.com
www.abdullamahmud.com
٥ ئاداری ٢٠١٧

Previous
Next

Leave a Reply