تەوەرەی دەنگەکان سەبارەت بەکاری هەروەزی … عەزیز شەریف
کورتەیەك بۆ ناساندنی هەرەوەزی :
هەرەوەزی دیاردە و بوونێکی مێژوویی و جیهانیی هەیە، هەرچەندە زۆر جار ڕەنگ و دەنگی سەردەمی سەرهەڵدانەکەی خۆی گرتووە؛ هەندێك جار وەك خۆکۆمەکیی ئایینی گروپە ئایینی و ڕێڕەوییەکان دەرکەوتووە و هەندێك جار وەك خۆکۆمەکیی خێڵەکی و گوندەکان دەرکەوتووە و هەندێك جاریش وەك خۆبەسێی کۆمەڵە هاوچەرخەکان لە سەردەمی جەنگەکان و قاتوقڕیی وشکە ساڵەکان دەرکەوتووە، بەڵام لەنێو هەموو سەردەمەکان هەرەوەزی و بیرۆکە و ئاوەزی ژییانی هەرەوەزیی بەجۆرێك بوونی هەبووە .
لەنێو ئەم ڕۆژگارەش لە هەرێمی کوردستان خەریکە لەنێو دەروونی قەیرانە ئابووریی و کولتووریی و مۆڕاڵیی و ڕامیاریی و جەنگیی- سەربازییەکان بەجۆرێك هەروەزییەکان و بیرۆکەی هەرەوەزی کۆمەڵایەتیی وەك ئەڵتەرناتیڤێك خۆی دەردەخاتەوە. سایتی دەنگەکان وەك بڵندگۆی دەنگە ڕۆشنبیر و ڕەخنەگر و ناڕازی و بەهەڵوێستەکان بۆ ڕۆشنایی خستنە سەر مێژووی بزووتنەوە و بیرۆکە هەرەوەزییەکان لە هەرێمی کوردستان و ناوچەکە ئەم تەوەرەیەی بۆ گفتۆگۆ و لێدوان لەو بارەوە کردووەتەوە، بە هیوای سەرهەڵدان و درووسبوون و دروستکردنی دیالۆگ و لێدوانیی جەماوەریی و کۆمەڵایەتیی لەبارەی هەرەوەزی و بزووتنەوەی هەرەوەزی وەك ئەڵتەرناتیڤ.
لێرەدا بە زنجیرە وەڵامی نووسەران و چالاکوانانی بواری هەرەوەزی بڵاو دەکەینەوە. 5
دەنگەکان – سەرەتا ئەگەر بکرێت کورتەیەك لەبارەی ڕابووردووی چالاکی خۆت و ئاراستەی بیرکردنەوەت بۆ خوێنەران بگێڕیتەوە؟
+ من ناوم (عەزیز شەریف)ە لە ناوەڕاستی هەشتاکانەوە تێکەڵ بە بزوتنەوەی چەپ و کۆمۆنیستی بووم و بەشداری ڕاپەڕینی بەهاری 1991 کردوەو یەکێک لە هەڵسوڕاوانی شورای سەرشەقام بووم لە شاری سلێمانی . لە ساڵی 2004 تا 2008 ئەندامی حیزبی کۆمۆنیستی کریکاری عێراق بووم لەو مێژوە بەدواوە وەک ئینسانێکی سۆسیالیستی سەربەخۆ و بڕوا بە بەفکری مارکس هەڵسوڕانی سیاسیم هەیە. تەنها لە لاپەڕە تایبەتی خۆم لە فەیس بووک (Aziz Sharif)پۆستی کورت دەنوسم. سپاسی بێ پایانم بۆ سایتی دەنگەکان کە وەک هەمیشە بڵندگۆی دەنگە ئازادەکانە.
دەنگەکان – “بزووتنەوەی هەرەوەزی” ئەم دەستەواژەیە بۆ تۆ چی دەگەیێنێت ؟
عەزیز شەریف + گێڕانەوەی ئیرادە بۆ ئینسان ، کار کردن بۆ ژیانێکی باشتر و دەستپێکی شۆڕشە.
دەنگەکان – بە بۆچوونی تۆ هەرەوەزییەکان ئامرازی ڕیفۆرمکردن یان ئەڵتەرناتیڤن؟
عەزیز شەریف +بەبڕوای من لە ئێستادا ئامرازێکن بۆ ڕیفۆرم ، ڕیفۆرمی ئیرادەی ئینسانی ئەمڕۆ و ڕیفۆرمی ئیقتسادس و سیاسی.
دەنگەکان – بە پشتبەستن بە کامە بنەما و ئەزموون هەرەوەزییەکان دەخرێنە خانەی ئامانجی بزووتنەوەی ڕیفۆرمیستی یان خزمەتکردن بە مانەوەی سیستەمە چینایەتییەکە ؟
عەزیز شەریف + وەک لە سەرەتادا وتم ئەم بزوتنەوەیە ، بزوتنەوەی گێڕانەوەی ئیرادەیە بۆ ئینسان و لەخۆیدا خۆ هۆشیاریە.ئەگەر بەم ئاقارەدا بڕوات نەک نابێتە وەسیلەی مانەوەی سیستەمە چینایەتیەکە بەڵکو ڕێک وەک ئەوەی مارکس لە لێکدانەوەی بۆ سیستەمی سەرمایەداریدا باسی کردوە ،دەبێتە گۆڕهەڵکەنی سیستەمەکە.
دەنگەکان – کەسانێک پێیان وایە ئەم کارە هەرەوزێیانەی کە لە ناوچەی خانەقین دەستی بۆ براوە، لە بنچەدا کاری دەسەڵاتەو دەبێت فشار بۆ دەسەڵات ببرێت لە جیاتی کاری هەرەوەزی. ئەی ئێوە ئەمە چۆبن دەبینن؟
عەزیز شەریف + من بە نمونەیەک وەڵامی ئەم پرسیارەو قسەو توانجی کەسانێک کە لەدوورە دانیشتون و لەجیاتی هاتنە پای ئەم بزوتنەوەیەو دەستخۆشی لە کەسانێک کەڕۆژانە هێزی بازوویان لەم بوارەدا وەگەڕخستوە دەدەمەوە. ئەگەر بڕیاربێت ئەم بزوتنەوەیە قوتابخانە دروست بکات و تەسلیم بە وەزارەتە ئیسلامی و کۆنەپەرستەکەی حکومەتە دزو گەندەڵەکەی بکات و تیایدا منداڵان فێری جەهل و نەزانین بکات ئەوامنیش هەر وەک ئەوان دەڵێم بەڵێ کاری دەسەڵاتە .بەڵام گەر بەپێچەوانەوە قوتابخانەکە ،کەسانی بەدەربەست و هۆشیار بیبەن بەڕێوەو ئە مەنهەجە دواکەتووەی کە لە قوتابخانەکانی تردا دەخوێنرێت ، لاببرێت و کەسانێکی پسپۆڕو شارەزا لە بواری پەروەردە و فێرکردن و دەرس گوتنەوە ، قوتابخانەکە بەرن بەڕێوە نەک هەر ڕیفۆرمێکی شۆڕشگێرانەیە ، بەڵکو دەستپێکی شۆڕشی سۆسیالیستیە.
دەنگەکان – چۆن دەتوانین هەرەوەزییەکان بە ئەڵتەرناتیڤ ببیمین، ئەو گۆرانە پۆزەتیڤانە چین کە هەرەوەزییەکان وەك ڕەتکەرەوەی کردەوەیی سیستەمە چینایەتییەکە نیشاندەدەن، چ کاراییەکیان لەسەر خێراکردن و بەهێزکردنی ڕەوتی گۆڕانی کۆمەڵایەتی و کولتووریی و ڕۆشنبیریی گشتی دەبێت ؟
عەزیز شەریف + زیاتر لە 25 ساڵ تەجرەبەی خەڵکی کوردستان لەگەڵ ئەم حکومەتە دزو گەندەڵە بەسە بۆئەوەی جێتر چاوەڕوانیەکانی خەڵک لە حکومەتی خۆماڵی و کوردی نەمێنێت . ئەمانە نەک هەر کارێک بۆ باشرتر کردنی ژیانی خەڵک ناکەن بەڵکو زۆر لەوە خراپتیان کردوە کە هەبووە. لە سیستەمی جینایەتیدا ئینسان لەبەرانبەر شتێکدا کە پێی دەوترێت پارە مەجبورە کارێک بکات ، بەڵام لەبەر ئەوەی خودی بەرهەمەکە (جاهەرچییەک بێت )ناچێتە گیرفانی بەرهەم هێنەرەوە ، مایەی دڵخۆشی نیەو بەگیان و بەدڵ بەرهەم نایەت . بەڵام ئەوەی لەم هەرەوەزیانەدا بەرهەم دێت ڕێک دەچێتە گیرفانی خودی بەرهەم هێنەرەکانیەوە .ئە خۆی لە خۆیدا هەم دڵی ئەوانەی تیادا بەشدارن ، بە بەرهەمەکە خۆش دەکات هەم ورەو توانایی ئینسانیان دەباتە سەرەوە .
دەنگەکان – چ ئاسۆ و ئامانجێك لە سەرهەڵدانی بزووتنەوەی هەرەوەزی لە هەرێمی کوردستان و خۆرهەڵاتی ناوین دەبینیت ؟
عەزیز شەریف + وابزانم لە وەڵامی پرسیارەکانی پێشودا چومەتە سەر بەشێك لەوەڵام دانەوە بەم پرسیارەوە لەبەر ئەوە زۆر درێژەی پێ نادەم تەنها دەڵێم گێڕانەوەی ئیرادە بۆ ئینسان و ڕیفۆرمێکی شۆڕشگێڕانیە کە هەنگاوەکانی ڕوەو سۆسیالیزمە.
دەنگەکان – لە ڕووی مێژووییەوە، ئایا بزووتنەوەی هەرەوەزی لە ناوچەی لەدایکبوون و ژیانی خۆت هەبووە یان بەخۆت تاکو ئێستا لەنێو هەرەوەزییەك ژیاوی ؟
عەزیز شەریف +بەڵێ من لەیەکێک لە گوندەکانی ناوچەی قەرەداغ بەدنیا هاتووم و بەشی زۆری کاری گوندەکانیش تا ناوەڕاستی هەشتاکان بەهەرەوەزی بووە ، من بۆخۆم کەلە ڕوی تەمەنەوە زۆر منداڵ بووم لە کاری( تووتن کردن وشریت لێدان ) بەشداریم کردوە.
لە بزوتنەوەی شورایش بەشی زۆری کارەکان هەرەوەزی بوو .دەتوانم چەند نمونەباس بکەم لەوانە کاری شارەوانی ، کۆمەک بە ئاوارەکان ، خەستەخانە و دەرمان و دکتۆرو یاریدەدەری دکتۆر و ڕاگرتنی ئەمنیەتی گەڕک و ئەمانە هەموو بە شێوەی هەرەوەزی و خۆبەخشانە و بێ بەرابەر دەکران .
دەنگەکان – ئایا هەروەزییەکان تەنیا ئاڵووێرکردنی کۆمەکی کۆمەڵایەتین، یان واوەتر لەوە دەتوانن ببنە ئەڵتەرناتیڤی بەرهەمهێنان و بەکاربردنی باوی بۆرجوازییانەی ئێستا؟
عەزیز شەریف +بەبڕوای من لە سەرەتادا ئاڵووێرکردنی کۆمەکی کۆمەڵایەتیەو دەتوانێت لە هەنگاوەکانی ئایندەیدا ئەم سەرەتایە تێپەڕنێت و ببێتە بنمەما بۆ ژیانی سۆسیالیستانە ، بەمانای هەرکەس بە قەد توانای خۆی کار دەکات و بەقەد پێویستیەکانی خۆی لە بەرهەمی کۆمەڵایەتی بەشی دەبێت . بێگومان منداڵ و پیر و پەک کەوتەش بەبێ بەرنبەر و وەک هەر فەردێکی تر بەشیان دەبێت .
دەنگەکان – ئایا هەر ئێستا هیچ ئەزموونێکی کردەیی و جێکەوتوو یان پەرەسەندوو لە هەرێمی کوردستان و خۆرهەڵاتی ناوین دەبینیت ؟
عەزیز شەریف + ئەو بزوتنەوەیەی لە خانەقین بەڕێکەوتووە سەرەتاو دەستپێکی بزوتنەوەیەکی پرشنگدارەو لە ڕەئسی ئەم بزوتنەوەیەشدا هاوڕێ سەلام عەبدوڵاو هاوڕێکانی دەورو نەخشی بەرچاویان هەیەو هیوای سەلامەتیان بۆ دەخوازم و ئومێدی ئەوەدەکەم هەموو خەڵکی کوردستان چاو لەو بزوتنەوەیە بکەن و بەسەرکەوتنی بگەیەنن .
دەنگەکان- دوا پرسیاری ئەم جارە، چ پەیام و ڕێنوێنییەکت بۆ چالاکانی هەرەوەزییەکان هەیە ؟
عەزیز شەریف +من ئومێدێکی گەورەم بەم بزوتنەوەیە هەیە . تاکە ڕێنوێنی من ئەمەیە کە قسەی کەسانێکی بێ ئومێدو ڕوخاو ، کە لەدورەوە دانیشتون و لەجیاتی دەستگرتن و دەست خۆشی لەم هاوڕێ بەدەربەستانەی بزوتنەوەی هەرەوەزی خەریکی قسە فڕێدان و بەکەم گرتنی کاری ئەم چالاکوانانەی هەرەوەزیەکانن ، دڵیان سارد نەکاتەوەو لەکارەکانیان بەردەوام بن .
من لێرەدا بە وتەیەکی مارکس کۆتایی بە قسەکانم دێنم
گوڵ لێرەیە وەرە لێرە سەمابکە.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
