Skip to Content

534 Views

گه‌مه‌ شاراوه‌كانی با  (2)  …  نه‌ژاد عزیز سورمێ‌

گه‌مه‌ شاراوه‌كانی با (2) … نه‌ژاد عزیز سورمێ‌

Be First!
by March 9, 2017 General, Poems
image_print

” ئه‌م ده‌قانه‌ له‌ ئه‌سڵدا به‌ عه‌ره‌بی نووسراون .
نووسه‌ر و ڕه‌خنه‌گر( نه‌جات حه‌مید ئه‌حمه‌د )
به‌ پێداچوونه‌وه‌ی نووسه‌ر كردوونی به‌ كوردی .”

به‌شی دووه‌م

(1)
ژووره‌كه‌م به‌ ڕووی ( سه‌فین)ی سه‌ركه‌ش دا
تۆماری مه‌زنی شكست و سه‌ركه‌وتنان …
بانیژه‌یه‌كی هه‌بوو
به‌سه‌ر ڕه‌ز و
باخچه‌ی گوڵه‌ كێویلان و
خه‌م و خۆشیانی ده‌ڕوانی..
بێ ویستی خۆم به‌جێم هێشت !
ئینجا باڵنده‌یه‌كتان دیوه‌
به‌ حه‌زی خۆی هێللانه‌ی جێ بهێڵێ ؟
ئه‌وه‌تانێ ده‌گه‌ڕێمه‌وه‌ و
هه‌ندێ له‌ خه‌ونه‌كانم خستوه‌ته‌ بن باڵم
تا جارێكی دی به‌سه‌رتان بكه‌مه‌وه‌
پردێك له‌ خۆشه‌ویستی له‌ نێوانماندایه‌
كێڵگه‌ به‌ ڕووباران و
چاو به‌ ئاسۆ
ده‌نگیش به‌ سه‌داوه‌ ده‌به‌ستێته‌وه‌ ..
با شه‌وگار ،
كه‌یل ، له‌سه‌ر شۆسته‌كاندا لێبچێته‌وه‌ ..
با جارێكی دی سبه‌ی ،
باوه‌ش به‌ منداڵیماندا بكاته‌وه‌ .

12\6\2004

(2)
سپێده‌ بنه‌وشه‌ییه‌كانی (عتێشی) و شه‌وانی ((عه‌باسییه‌))ی خه‌وزڕێن و
خه‌ون و بارانی (ڕشت)
ئه‌مانه‌ چه‌ند وێستگه‌یه‌ك بوون له‌ ژیانی به‌نده‌ ..
كاتێك دوورگه‌ وشكه‌ڵان بوو
قه‌له‌ ڕه‌ش به‌ چوار ده‌وریدا ده‌سوڕایه‌وه‌ ..
ئێمه‌ش بێ هانا ، بێ ئه‌ستێره‌یه‌ك ڕێگای پێ ببینینه‌وه‌ …
ئه‌وان ونیان كردین
ئێمه‌ش ڕۆژگارمان له‌گه‌ڵ ئه‌واندا بزر كرد …
كاتی ئه‌وه‌ هاتووه‌ دڵ ، زامه‌كانی بسڕێته‌وه‌
شنه‌ی با په‌نجه‌ره‌كانمان ده‌كوتێ
كه‌ ده‌ڕواننه‌ باخچه‌ هه‌ڵبزركاوه‌كان
كه‌ی ده‌توانین
ڕاوی نوور له‌ شه‌خته‌دا بكه‌ین ؟
گۆشه‌كانمان پێویستی به‌ ڕوناهی یه‌
ئیتر ئاگریش
ڕووناكمان ناكاته‌وه‌
براده‌ر !؟

4\6\2004

(3)
پرسیارت له‌ وه‌هم و له‌ گه‌وهه‌ر لێ كردم ..
ئه‌و ده‌یویست خاكی تازه‌ بدۆزێته‌وه‌
سه‌رنجیم بۆ ئه‌وه‌ ڕاكێشا
جوانی ده‌شێوێنێ ..
به‌ڵام بێهووده‌ بوو ..
ئێمه‌ شایانی ئه‌وه‌ین ؟
به‌هه‌شتی خه‌یاڵی به‌سه‌ر ئه‌و خه‌راباتانه‌وه‌یه‌
پڕ له‌ منداڵیی و ستران ..
مانگی له‌ وێنه‌ی خه‌وندا دی
وه‌ك هه‌زار به‌ هه‌زاری قژی
كه‌ له‌ هیچ ناچێ له‌ درۆ نه‌بێ .
له‌ هه‌ر كوێیه‌ك بێ
سرووشت به‌ره‌و ئه‌وێ ده‌چێ ..
ئا لێره‌وه‌ با هه‌ڵده‌كا و
كانیاوه‌كان كه‌زییان ده‌ده‌نه‌ به‌ر با
جارێكی دی خۆشم ده‌وێی !
خۆشم ده‌وێی وه‌نه‌وزی نیوه‌ڕۆیان !
دڵته‌نگیش كێڵگه‌ی خۆی هه‌یه‌ .
ئه‌مه‌ ژیانێكی نویّیه‌ بۆمان نووسراوه‌ته‌وه‌ ،
له‌ كاتێكدا نووستووین و خه‌ون ده‌بینین …
ده‌سا با به‌ ڕووی شه‌پۆله‌كاندا بقیژێنین
وه‌ك چۆن ڕۆژێ له‌ ڕۆژان هاوارمان
به‌ ڕووی هاوكێشه‌ لاسه‌نگه‌كانی
نێوان وه‌هم و گه‌وهه‌ردا كرد ..

25\7\2004

(4)
چیته‌ به‌سه‌ر هه‌موو بڵنداییه‌ ڕه‌ق و خاوه‌كان
له‌ شه‌قه‌ی باڵ ده‌ده‌ی ؟
چیت به‌سه‌ر هاتووه‌ ؟
بێ ئه‌وه‌ی ئه‌و كه‌نارانه‌ سه‌رنجت ڕابكێشن ؛
سۆزیان لێ ده‌بێته‌وه‌ ؟
ئه‌و فرمێسكانه‌ی به‌ قه‌د بارانن
هیچیان بۆ نه‌ماوه‌ته‌وه‌ ، له‌وه‌ی به‌ده‌ر
هاوسه‌فه‌ری هه‌وره‌ كۆچه‌ریه‌كان بن ..
چیت به‌سه‌ر هاتووه‌ ڕكابه‌ر؟
وامزانی تۆ ڕووبارێكی ،
كه‌ناری ڕوناهی ده‌دێری ..
به‌ڵام داخه‌كه‌م وێنه‌ی شه‌ره‌نگ ،
به‌ناخمدا تێپه‌ڕی ..
چیت لێ هاتووه‌؟
حه‌ز به‌ ژووره‌ تاریكه‌كان ده‌كه‌یت و
ڕقت له‌ خۆره‌ !!
كه‌واته‌ ژیانی خۆش و گومڕایی و ون بوونت خۆش !!
خشته‌ی درۆی ڕۆژانه‌ت خۆش !!
ڕۆژگاری تۆ به‌سه‌رچوون
زه‌مه‌نی قسه‌ و نیگای به‌تاڵ و
خۆشه‌ویستیت خۆش ..
كه‌ هه‌رگیز ڕۆژێ له‌ ڕۆژان تێی نه‌گه‌یشتوویی و
تێی ناگه‌ی…

8\8\2004

(5)
جوامێر له‌ هیوا هه‌ڵكێشرا بوو ..
شتێكی له‌ سنگدایه‌ ئه‌و پیاوه‌
له‌ هاواری سۆزێك ده‌كا
وڵاتی ته‌ی كردووه‌ ..
شوێنێكی نه‌دۆزیه‌وه‌
ئه‌و سۆزه‌ی تێدا به‌ڕه‌ڵڵا كا
ئه‌و پیاوه‌ كه‌ سواری هه‌ور بوو ، ده‌بارێ …
بڕیاریدا هاوڕێیه‌تی پاسه‌وانه‌كان بكات و
بچێته‌ ناو شار.. بێهووده‌ ..
ئه‌و ته‌نیا شایه‌تێك بوو
له‌ كه‌ناره‌كانی نووره‌وه‌ هاتبوو
به‌ڵام دیار بوو شار نووری نه‌ده‌ویست
شار نووری ناوێ..!
شار سۆزی ناوێ ..
ڕۆژگار چی لێ كردوون ؟
تارماییان په‌سندتر بكه‌ن ؟
وه‌ك لاڵان له‌ تاریكیدا بۆڵه‌ بۆڵتانه‌ ؟
ئه‌و پیاوه‌ له‌ هیوادا هه‌ڵكێشراوه‌
هاواركه‌ جوامێر..! هاواركه‌ و
بارت له‌ چه‌قی ڕێگای چۆل و به‌ردراودا لێ بخه‌ ..
ڕه‌نگه‌ ڕێگاكان به‌ڕه‌حمتربن
له‌و شارانه‌ی تارمایی له‌ پێشتر ده‌گرن !!
هاواركه‌ .. براله‌..!

15\8\2004

(6)
ده‌بووایه‌ به‌ دوای ڕێگه‌ی دیكه‌دا بگه‌ڕێ ..
هه‌وڵێك بۆ دۆزینه‌وه‌ی كه‌ش و هه‌وایه‌كی نوێ
مه‌ودای په‌لهاوێژ .. وێنه‌ی هێما ،
وه‌ك نیگه‌رانی ماڵئاوایی ..
ئه‌وان به‌ دزیه‌وه‌ دێن
ڕاپۆرتی به‌ درۆ داپۆشراو ده‌نووسن
وه‌ك ده‌م و چاوه‌ ده‌مامكداره‌كانیان ده‌رده‌كه‌ون و
وه‌ك سه‌رابیش ون ده‌بن ..
هیچ چه‌مكێك شك نابه‌ن
بۆ دوێنێ و سبه‌ی ..
ڕاسته‌ دیواره‌كانی ده‌وروبه‌رمان به‌رزن
به‌ڵام پێیاندا هه‌ڵده‌گه‌ڕێین .
ده‌بینی چاوه‌ ده‌رپه‌ڕیوه‌ حه‌سووده‌كانیش
ده‌مان بینن به‌رز ده‌فڕین
هێدمه‌ ده‌یانگرێ
چیرۆكی باخچه‌ ڕه‌نگا و ڕه‌نگه‌كان به‌م جۆره‌
باوه‌ش به‌ گۆرانی چیا و دۆڵاندا ده‌كه‌ن ..
تا به‌ شنه‌ بیانسێننه‌وه‌ ..
نهێنی بێ تاوانیی ته‌نها بۆ مانگه‌ ، مانگ
بێداری جاویدان ..

22\5\2005

(7)
ئه‌وه‌ی دركی (پێ ناكرێ)م هه‌ڵوێزنی
له‌ ڕێگای درێژ و به‌ كه‌ند و كۆسپ كه‌ ناوی ته‌مه‌نه‌
تۆ له‌ گه‌ڵمدا بووی ..
بۆیه‌ سه‌فه‌ری ڕووه‌ و نادیاریشم ،
وه‌ك پیاسه‌یه‌كی ئێواران بوو ..
پێخواس بووم ، له‌ خۆشیدا بازم ده‌دا
هه‌ستم به‌ تیشه‌ به‌ردان نه‌ده‌كرد
كه‌ پێیان به‌ خوێن ده‌هێنام
خه‌ونێكمان پێ بوو
ڕووبارو چیاو باخچه‌ی
له‌ تۆغیانی به‌هار تێدا بوو ..
ئه‌و شه‌وه‌م هه‌ر له‌ بیره‌ ،
كه‌ په‌نجه‌ت بۆ مانگ ڕاهێشت
وه‌ك ئه‌وه‌ی بڵێی با بیكه‌ینه‌ ماڵی خۆمان
با وابێ خۆشه‌ویسته‌كه‌م.. با بیكه‌ین
له‌وێ دیواره‌كان به‌ نوور هه‌ڵنراون
ژووره‌كانیش به‌ نوور داپۆشراون ..
زه‌ویش نووری له‌ سه‌ر ڕاخراوه‌
ده‌رگاكان .. په‌نجه‌ره‌كان.. هه‌مووی نوورن
به‌م جۆره‌ نوور ڕوو له‌ نوور ..
به‌ڵام ئایا تۆ بیرت كردۆته‌وه‌ چ ده‌قه‌ومێ ،
له‌ كاتێكدا تۆی نووریش
باوه‌ش به‌و هه‌موو نووره‌دا ده‌كه‌ی؟!
29\8\2004

(8)
له‌ ته‌وقی سه‌ره‌وه‌ تا نووكی پێ كوژاوه‌ته‌وه‌
وای دێته‌ به‌رچاو
هه‌نگاو به‌ره‌و خه‌ون .. به‌ره‌و هیوا داوێ
به‌ڵام ئه‌و له‌ ڕاستیدا وێنه‌ی چڵه‌ ڕووته‌ڵه‌كان ..
كه‌س نه‌ما به‌ لایدا نه‌ڕۆیشتبێ و
جۆللانه‌ی لێ شه‌ته‌ك نه‌دابێ …
ئه‌و مارێكه‌ له‌ناو زبڵ و زه‌ڵكا و خۆی ده‌پارێزێ ..
با ی نێو كووچه‌ و كۆڵانان ده‌بینێ
گوێ بۆ خۆرئاوای كاره‌بادار هه‌ڵده‌خا ..
كه‌ ویستی بگری ، ده‌گری
كه‌ ویستی پێبكه‌نێ پێده‌كه‌نێ ..!
ئه‌و ئامێرێكه‌ به‌ ده‌ست ده‌ڵاڵه‌كانه‌وه‌
قه‌ت ڕێكه‌وتی خۆشه‌ویستی نه‌كردووه‌
هیچیش له‌ جوگرافیاو مه‌وداكانی نازانێ
له‌وه‌ زیاتر پردێك ده‌بێ بۆ گه‌یشتن به‌ كه‌ناری گه‌مه‌ و گومڕایی ..
ئا ئه‌مه‌یه‌ نهێنی خامۆش بوونی و
نهێنی ئه‌وه‌ی ،
ڕۆژێ بگه‌شێته‌وه‌ ..
دووباره‌ پیرۆزت بێ ژیانی گومڕایی و ون بوون ..
پیرۆزه‌ لیستی ڕۆژانه‌ی درۆ و
بۆنی پاشه‌رۆ بۆگه‌نیه‌كان ..

5\9\2004

(9)
ئه‌مشه‌ویش
تۆم له‌ خه‌ونێكدا بینی له‌ خه‌یاڵاندا نه‌بوو ..
تۆم دی نه‌خۆش و كوژاوه‌ بووی ..
ده‌ست له‌ ملی تارامایی
له‌به‌ر خۆوه‌ شتێكت ده‌گوت
تێنه‌ده‌گه‌یشتم چیت ده‌گوت ..
كه‌ به‌ره‌و ڕووت ده‌هاتم ،
له‌وه‌ گه‌یشتم ده‌تگوت
با سه‌ر له‌ نوێ ده‌ست پێ بكه‌ینه‌وه‌ و
له‌ درۆیه‌كی دیكه‌دا بژین ..
ئه‌مه‌ ساچمه‌ی سۆزێك بوو
له‌گه‌ڵ ڕۆژگاردا په‌رش بوون ..
چیتر گه‌شانه‌وه‌ ئاساكه‌ی جاران نه‌ما …
كه‌ بانیژه‌كه‌می ڕووناك ده‌كرده‌وه‌
ئه‌و بانیژه‌یه‌ی ڕۆژێك له‌ ڕۆژان
به‌سه‌ر ڕێگا نادیاره‌كانیدا ده‌ڕوانی
به‌ڵام ئه‌سه‌ف زۆری پێ نه‌چوو
خۆم بینی له‌ خه‌و ڕاپه‌ڕیم
وه‌جدێك گرتمی
ته‌نیا ئه‌وه‌م بۆ مایه‌وه‌ دامه‌ پڕمه‌ی گریان
بۆچی ئه‌ی ده‌ستبازی فێڵباز …!؟
له‌ خه‌ونیشدا…؟؟
بۆچی ؟؟

26\9\2004

(10)
شه‌پۆل داده‌مركێنه‌وه‌و لێده‌چنه‌وه‌
ئه‌وه‌ ئه‌و فرمێسكانه‌ن باخچه‌كانی گوناه ئاو ده‌ده‌ن ..
سپێده‌ی له‌ خاچدراو
له‌ پشته‌وه‌ی چاوه‌ فرمێسكاویه‌كاندا
چیاكانیش به‌ره‌نگاری سه‌ركێشیی گه‌رداوان ده‌بنه‌وه‌
ئه‌و داڵانانه‌ی باسیان ده‌كه‌ی شوێنه‌واریان نه‌ماوه‌ ..
ئه‌و كێڵگانه‌ی خه‌ونت پێوه‌ بینی ئاسه‌واریان نه‌ماوه‌ ..
زه‌مان زه‌مانی جاده‌ و شۆسته‌كانه‌
زه‌مانی سه‌رابی گه‌شاوه‌یه‌ له‌ بیابانبوونی ڕۆح و
جوگرافیای ڕێیه‌ نه‌ناسراوه‌كان ..
كه‌ مێژوو پشتی تێ كردوون…
ئای ئه‌مڕۆ چه‌ند به‌ دوێنێ ده‌چێ
خوێن گوڵ ده‌كا و
بێده‌نگی گه‌ڵا
كێ ئه‌ستێره‌ دزراوه‌كانی
سه‌ر بانیژه‌كه‌می په‌رت كردن ؟
له‌و ساوه‌ (ئاوابوون) ،
یه‌خه‌م به‌رنادا …
ئه‌ی چاوه‌ خه‌واڵوه‌ دووره‌كان !
فریام كه‌ون..!
ئه‌مه‌ ڕۆژگارێكی پیره‌و له‌وپه‌ڕی تینیدایه‌
ئه‌وه‌ زه‌مه‌نی جاده‌ و شۆسته‌كانه‌
ئه‌و سه‌رابه‌ گه‌شاوه‌یه‌ له‌ بیابانی ڕۆح دا ..
فریام كه‌ون ئه‌ی ئه‌و چاوانه‌ی
ئاسمان ڕه‌نگی پێ به‌خشیون ..!

10\10\2004

Previous
Next

Leave a Reply