Skip to Content

بیره‌وه‌ریه‌كانیان به‌ پێی پێداویستیه‌كانی رۆژ ده‌نوسنه‌وه ! عیماد عه‌لی

بیره‌وه‌ریه‌كانیان به‌ پێی پێداویستیه‌كانی رۆژ ده‌نوسنه‌وه ! عیماد عه‌لی

Closed
by ئازار 13, 2017 General

ئه‌گه‌ر به‌ سه‌رپێی، به‌راوردیێكی كورت مه‌ودا له‌ نێوان یاده‌وه‌ری خه‌ڵك و سه‌ركرده‌و پیاوی دیاری رۆژئاواو ئه‌وانه‌ی لای خۆمان بكه‌ین، له‌ سه‌ره‌تادا بۆت ده‌رده‌كه‌وێت كه‌ ئه‌مانه‌ی ئێره‌ هیچ هه‌ڵه‌ و كه‌موكورتی و خراپه‌یه‌كیان نه‌كردووه‌ و مه‌عسوم بوون له‌ هه‌موو كارێكی نابه‌جێ، له‌ هه‌ڵه‌تی لاوێتیه‌وه‌ بگره‌ تاوه‌كو رۆژگاری ئه‌مرۆمان، ته‌نانه‌ت ئه‌گه‌ر به‌ خۆیان هۆكاری رووداوه‌ گه‌وره‌ و خه‌ته‌رناك و كوشنده‌كانیش بووبن !! له‌ رووی سیاسیه‌وه‌ نه‌ شه‌ری نێوخۆ بووه‌ و نه‌ده‌ستدرێژی كراوه‌ته‌ سه‌ری ئه‌وی تری ناكۆك، نه‌ خۆ په‌رستی و خۆده‌ربازبون بووه‌ له‌ به‌رپرسیارێتی و نه‌ش سازش و ته‌سلیم بون و وره‌به‌ردان بووه‌ له‌ لایه‌ن خودی یاده‌وه‌ری نوسانه‌وه .

ئه‌وه‌ی تێبینی ده‌كرێت، كه‌ له‌ ئه‌و یاده‌وه‌ریانه‌وه‌ ده‌رده‌كه‌ون :
1-یه‌كه‌م سلبیات تێیدا به‌ زه‌قی دیاره‌، ئه‌وه‌یه‌؛ گونجاندنی رێره‌و و چونێتی به‌رێكردنی ئه‌و رۆژانه‌ و یادكردنه‌وه‌ی به‌سه‌رهات و روداوه‌كان له‌گه‌ڵ پێداویستی ئه‌مرۆ و سیاسه‌تی رۆژدا یه‌كانگیر ده‌كرێت و ده‌نوسرێته‌وه .
2-هه‌ڵسه‌نگاندنی كاراكه‌ته‌ری سه‌ره‌كی و لاوه‌كیی رووداو و كێشه‌و بێشه‌ و لادان و ناپاكیه‌كان، به‌ پێی ئاستی باشی و خراپیی په‌وه‌ندی ئه‌مرۆی ئه‌و كه‌سایه‌تی و كاره‌كته‌رانه‌یه‌ له‌گه‌ڵ كاكی یاده‌وه‌رینوسدا . نه‌ك وتنی حه‌قیقه‌ت به‌ پێی روداوه‌كه‌ و به‌و بارودۆخه‌ خودی و بابه‌تیه‌ی كه‌ تێیدا بووه‌ یان روویداوه‌ .
3- دورینه‌وه‌ی كارو رووداوی گه‌وره‌ و كاریگه‌ر به‌ پێی ئایدیۆلۆژیای كاكی نوسه‌ره‌ و” به‌ نیازی به‌ده‌ستهێناتی پێداویستی كه‌سی و ئایدیۆلۆجی و حزبی له‌و سه‌رده‌مه‌ی كه‌ بیره‌وه‌ریه‌كه‌ی تێدا نوسیوه‌ته‌وه‌، وه‌ك ئه‌وه‌ی بۆ ئه‌و قۆناغه‌ نوسیبێتی كه‌ تێیدا نوسراوه‌ته‌وه‌ و بۆ ئه‌وه‌ی داناوه‌ كه‌ بۆ ماوه‌یه‌ك بێت و دواتر ئێكسپایه‌ر بێت .
4- دوور كه‌وتنه‌وه‌ له‌ سه‌لبیاتی خودی نوسه‌ر و خۆ به‌ په‌ری و مه‌لایكه‌ زان و نه‌بونی ته‌نانه‌ت پله‌یه‌كی نزم له‌ ره‌خنه‌ له‌خۆگرتن له‌ هه‌ڵه‌ی و په‌ڵه‌یه‌كی بچوك لێره‌و له‌وێ روویدابێت له‌ده‌رئه‌نجامی بیروبۆچون و كاری ئه‌ودا تا ئه‌مرۆ مابێته‌وه‌ .
5- سازش كردن له‌سه‌ر نوسینه‌وه‌ی هه‌ندێك رووداو یان به‌سه‌ردا تێپه‌ربون به‌ پێی هه‌ڵوێستی كه‌سی خاوه‌ن یاده‌وه‌ری و له‌به‌ر خاترانه‌ی سیاسه‌تی رۆژ و به‌رژه‌وه‌ندیه‌كان .
6-زۆر له‌به‌رچاوگرتنی هاورێیه‌تی و دۆستایه‌تی و په‌یوه‌ندی شه‌خسی له‌كاتی نوسینه‌وه‌ی یادوره‌یه‌كاندا، له‌به‌ر كۆمه‌ڵێك هۆكاری تایبه‌تی و حزبی .
7- له‌به‌رچاورتنی كاتی نوسینه‌وه‌ی یاده‌وه‌ری و خۆلادان له‌حه‌قیقه‌ت، له‌به‌ر چه‌ندین هۆكار؛ له‌وانه‌ش له‌به‌رچاوگرتنی بارودۆخی گشتی كوردستان و سیاسه‌ت و هاوكێشه‌ نێوخۆیی و ده‌ره‌كیه‌كانی ئه‌مرۆ، یان له‌به‌ر ئاامانجێكی دیاریكراوی شه‌خسی یاده‌وه‌رنوس، یان بۆ مه‌به‌ستێكی بچوكی سیاسی یان كۆمه‌ڵایه‌تی .
8- خۆلادان له‌ هه‌ندێك رووداوی گرنگ و كاریگه‌ر، كه‌ ده‌رخستنی حه‌قیقه‌ت له‌و باره‌دا زۆر په‌ند و ده‌رسی خۆی ده‌بێت بۆ نه‌وه‌ی نوێ .
بۆیه‌ ئه‌وه‌ی له‌ یاده‌وه‌ری كه‌سایه‌تیه‌ رۆژئاواییه‌كان ده‌یبینین له‌ به‌راشكاوی نوسین و ده‌رخستنی سه‌رجه‌م روداوه‌كان كتومت وه‌ك خۆی، بێ له‌به‌رچاوگرتنی هیچ شتێكی رۆژ و باسكردنی سه‌لبیاتی خودی له‌ هه‌ڵه‌ و كه‌موكورتیه‌كانی خودی بیره‌وه‌رینوس، یه‌كێكه‌ له‌ خه‌سڵه‌ته‌ جوانه‌كانی ئه‌وان و هه‌مه‌یشه‌ده‌رس و په‌ندی گه‌وه‌ر به‌ نه‌وه‌كانیان ده‌به‌خشن . به‌ڵام لێره‌ به‌ پێی یاده‌وه‌ریه‌كان بێت سه‌رجه‌م نوسه‌رهی یاده‌وه‌ریه‌كان چاكسازیخوازی بێ هه‌ڵه‌ و كه‌موكورتی و بێ كیشه‌و بێشه‌ بوون و، وه‌ك ئه‌وه‌ی ئه‌و گیروگرفت و كێشه‌ گه‌وره‌ و ته‌نانه‌ت ناپاكیانه‌ش خه‌ڵكی ده‌ره‌كی دروستی كردبن نه‌ك ئه‌م خاوه‌ن یاده‌وه‌ریانه‌ و ره‌فتاره‌كانیان له‌و رۆژگارانه‌دا . ‌‌

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish