Skip to Content

ھەڵەبجە… چالاک ئـاغجەلەری

ھەڵەبجە… چالاک ئـاغجەلەری

Closed
by ئازار 16, 2017 General

ڕۆژی ١٦/٣ ڕۆژێکی پڕ لەسوێ و ئـازارە کە دەرھەق بە خەڵکی سڤیلی ھەڵەبجەکرا. ئـەم ڕووداوە دەرئـەنجامی چاوچنۆکی ووڵاتانی زلھێز و بەریەکەوتنی ئـاراستە جیاوازەکانی ئـاینێکە کە بۆ خۆی ھەڵەبجە لە دونیایەدا دەروێش ئـاسا لە زکری بێکۆتاییدایە بۆی، بە ھەمان قورسایی نەتەوە پەرستی و فەرزی ئـەم نەژاد بەسەر ئـەوی دیکەدا لە گێلێتی مرۆڤەکان بترازێت ھیچی دی لێ شین نەبوو نابێت، ترۆپی ئـەو گەوجاندنە ھەڵەبجەی کردە ئـامانج ، ھەروەھا ھۆکارێکی تر ئـەو شۆڕشە بوو ھەموومان لە خەونی ئـەرخەوانیدا بووین کە سەرکەوێ و کەف و کۆڵی کوردایەتی ئـارامبێت و دەسەڵاتی کوردی ، ئـەو حەشاماتەی پێی دەڵێن کورد دونیایەکیان بۆ ئـامادەکات جیا لەوانی دەورووبەر بەڵام!!؟.

١٦/٣ ڕۆژی تەخشان و پەخشانی درۆی سەرکردەکانە ، ھەریەک بە ئـەندازەی بەرپرسیارێتی درۆی جوان جوان ،بۆن خۆش بەئـەندازەی بۆنی سێوەکان دەپرژێنن و دەکەینە دیاری خەڵکی ھەڵەبجە و وەکو بڵقی سەرئـاو دوای ئـەو ڕۆژە فەنا دەبێت.

ئـەگەر پێتان وایە قەرەبووی ئـەو زامە بە پارچەیەک ئـەرزە و بڕینەوەی یارمەتیەک کە بۆتە چارەکە یان کردنی ھەڵەبجە بە پارێزگا ساڕێژ دەبێت زۆر زۆر ھەڵەن، بە بەرچاوی ھەمووانەوە چەندین بەرکەوتوانی ھەڵەبجە بەو ئـازارەوە سەریان نایەوە چونکە دەسەڵاتێک خۆی وەک دەمڕاست ناساند دەکرا و لە توانایاندا بوو تەواوی ئـەو مرۆڤانە لە باشترین نەخۆشخانەکانی جیھان تیمار بکرانایە بەڵام ئـەوەی بەرچاو کەوت مردنی لەسەرخۆی ئـەو مرۆڤانە بوو بە ئـازارێکی زۆرەوە، بەردەوامی ئـەم تراژیدیایە پرسیاری ئـەوە دەکات کە ئـێوە کێن ، جیا لە گۆڕینی دەموچاوەکان و زمانی ئـاخاوتنتان.

ھەر دوێنێ بوو ھەڵەبجەیەکی تر ، دەستە خوشکی ئـەم شارە شەنگار ، لە مامەڵەیەکی سیاسیدا ھەڕاج و جیبوسایدکرا لەوەش واوەتر ئـەوی دەربازیش بوو بەدەست و تفەنگی چەکدارە حزبیەکان پێکران.

١٦/٣ بەژمارە و ڕێکەوتی جیاوازتر بەردەوامی ھەیە بە جۆرێک نەک لەسەر دەستی ڕەقیبە نەخۆشەکان ، لەژێر ناوی کوردایەتی قڕکردن بەڕێوەیە ، فەزایەک لە ناشریندا ھاوتای نیە. سەرخان و ژێرخان قڕکرا، شەقام گەوزێندرا، قەڵەم کڕدرا، ئـەوەی کە پێی دەڵێن خۆشەویستی بۆ نیشتمان وەک گەڵای پایز لە زەرییدا ھەڵوەری ، تەنھا وانە لە ھەڵەبجەوە فێربوون لە ترساندی خەڵک و دەستەمۆکردنیان لە چواچێوەی حزبدا ،کردەوەکانیان پێمان دەڵێن ھەموو کات چاوەڕوانی دووبارە بوونەوەی ئـەو تراژیدیایەدابن بە جۆر و شێوازی تر ، دەبێ دووربین لە لاساری و چۆک دابێنین بۆ خواستەکانیان ، ھەموو ئـەمانە بەرھەمی ئـەو کوردایەتیە بوو کە ھەڵەبجە سەرقافڵەی قوربانیەکانیەتی، بژی کورد و کوردایەتی!!!

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish