Skip to Content

دەکرا (شوعلە) بڵێسەی خەبات بێ، نەک پرسەی ئاشتەوایی! … پایزە ئەحمەد

دەکرا (شوعلە) بڵێسەی خەبات بێ، نەک پرسەی ئاشتەوایی! … پایزە ئەحمەد

Closed
by ئازار 25, 2017 General

ئێستا کاتی ئەوە هاتوە دوو قسەی تریش بکەم. لەمێژە ناڕەزایەتییەکان لە کوردستان لە سەریان دەڕژێتەوە لەوەی کە ئەو حیزبانە چارەنووسی خەڵکیان دووچاری (بێ مووچەیی و برسێتی، گەندەڵیی، ناتەبایی و شەڕانگێزیی نێوان حیزبەکان، توندوتیژیی دینیی، شەڕ لەگەڵ داعش، بێ هیوابوون بە سەربەخۆیی کوردستان) کردوە، سەرەڕای هەموو ئەوانەش تا دێ زیاتر مافەکانی ژنان پێشێل دەکرێن و پیاوسالاریی لە بەرزبوونەوەیە و کەشوهەوای خێڵەکیی و دابونەریتە خراپەکان و کۆنەپەرستیی و توندڕەوی دینیی لە گەشەکردنن تەنانەت کار و خەباتی ژنانی تێکۆشەر چ هی سەردەمی شاخ چ هی ئێستا لە لایەن حیزبەکان و تێڕوانینی پیاوسالاریی و خێڵەکی بە پێچەوانەی ویستی خۆیان بەکاردەهێنرێن.

ئەوەتە مەرگی ژنێکی تێکۆشەری وەک (شوعلە عەلی) لە لایەن ئەو حیزبە بێ کەڵکانە مامەڵەی پێوە دەکرێ! هیچ شتێک نەماوە بۆ ئەوەی خەڵکی پێ هەڵبخەڵەتێنن تا لەو بارە ناهەموار و پڕ لە ئاژاوەی کوردستانیان بهێڵنەوە، ئێستا پەنایان بۆ (پرسە) بردوە کە لە راستییدا پرسە و رێورەسمەکەی بەو شێوەیەی کە ئێستا هەیە نەریتێکی زۆر خراپی کوردەوارییە و مرۆڤ بەرەو ترس و پەیوەندییە دینیی و میللییە دواکەوتووەکان دەگەڕێنێتەوە، کەچی ئەوان دەیانەوێ خۆڵ لە چاوی خەڵک بکەن گوایە دەتوانن لە چوارچێوەی ئەو نەریتە جوانە کوردەوارییە ساردیی و دژایەتیی نێوان حیزبەکان بڕەوێننەوە و ئاشتی سەقامگیر بکەن! پەکوووففف لەو سیاسەتە عەزیمە!

هەرچەندە من زانیارییەکی ئەوتۆم لەسەر رادەی شۆڕشگێڕیی (شوعلە خان) نییە، لەگەڵ ئەوەی لە هەشتاکان لە رێکخستنەکانی کۆمەڵە کارم کردوە و تا ئێستاش هەر لە نێو سیاسەت و دەردەسەرییەکانیدا بوومە بەڵام تا ئەو دواییانەش ناوی ئەو بەڕێزەم هەر نەبیستبوو، بەڵام وەک دەڵێن (ژنێکی تێکۆشەر و هۆشیار بووە و زانکۆی تەواو کردوە و لە کۆمەڵە کاری کردوە و لە سەرەتای هەشتاکان چۆتە شاخ و لەگەڵ نەوشێروان مستەفا ژیانی هاوسەریی پێکهێناوە). لێرەدا چەند پرسیارێک خۆیان قوت دەکەنەوە: ئایا ژنێک لەو سەردەم بەو جۆرە بووبێ و بووبێتە هاوسەری یەکێک لە ناودارترین سەرکردەکانی نێو حیزبەکان بۆچی وەک ژنە گەریلایەکانی پەکەکە و ژنە شەڕڤانەکانی رۆژئاوا دەرنەکەوتوە؟ بۆچی تا کۆچی دوایی نەکرد لەدەوربەری خێزانەکەی خۆی زیاتر کەسی دیکە نەیدەناسی؟ بۆچی هیچ جێپەنجەیەکی لەسەر خەباتی یەکسانیخوازانەی ژنان دیار نییە؟ بۆچی لە پاش راپەڕین نەیتوانی رۆڵی لێپرسراویەتێکی حیزبی یان رێکخراوەیی بگێڕێ یان پۆستێکی حکومی وەربگرێ؟

وەک ئەوەی من دەیبینم شوعلە خان و بە دەیان و سەدان ژنی شۆڕشگێڕی تری باشوور کە لە ناو کۆڕی خەباتدا بوونە هیچیان کەمتر نەبووە لەو ژنە شۆڕشگێڕانەی ئێستای باکوور و رۆژئاوا ئەگەر زیاتریش نەبووبن چونکە بارودۆخی ئەو سەردەمەی ئەوان خەباتیان تێدا کردوە زۆر سەخت بووە و ژنانی باکوور و رۆژئاوا لەو سەردەم هیچ دەنگێکیان نەبووە، دواییش ئەوە زیاتر پەیوەندیی بە ئایدیۆلۆژیای حیزبەکان و تێڕوانینی کەسایەتییە سیاسییەکانەوە هەیە کە چۆن لە شۆڕش و بەشداریی ژنان دەڕوانن، پەکەکە لەگەڵ هەر رەخنەیەکمان لێی هەر لەسەرتاوە بەوپەڕی تواناوە هەوڵی داوە ژنان وەک پیاوان چەک هەڵبگرن و خۆیان ببنە خاوەنی خۆیان و هەموو ماف و ئازادییەکیان هەبێ وەک پیاوان، کەچی حیزبەکانی باشوور باشترینەکانیان بە ژنە شۆڕشگێڕەکانیان دەگوت ئێوە ناتوانن وەک پیاوان چەک هەڵبگرن و باشترە لە بارەگاکان و گوندەکان خواردن بۆ پێشمەرگە دروست بکەن و خزمەتیان بکەن، یان کاری نامە و بڵاوکراوە گواستنەوەیان پێدەکردن یان لە ئێران و هەندەران ماڵێکیان بۆ دادەنان. عەبدوڵا ئۆجەلان و سەرکردەکانی باکوور و رۆژئاوا لەگەڵ هەر رەخنەیەکمان لێیان هەموو ژیانی کەسیی خۆیان بۆ شۆڕش تەرخان کردوە و خاوەنی یەک دۆلار نین، کەچی سەرکردەکانی باشوور لەوەتەی هەن لە پێناو ژیانی کەسیی خۆیان سازش و رێکەوتنی خۆبەدەستەوەدەرانەیان لەگەڵ داگیرکەرانی کوردستان کردوە و هەمیشە بە مشەخۆریی لەسەر حیسابی میللەت ژیاون بە تایبەتییش لە پاش راپەڕین هەر خەریکی گەندەڵیی و دزیی بوونە لە میللەت و ئێستا هەموویان بە شێوەیەکی گشتیی خۆیان و خێزان و بنەماڵەکانیان ملیاردێر و ملیۆنێرن و لەوپەڕی خۆشگوزەرانییدا دەژین!

جا ئێستا زۆر ئاساییە لە ژێر سایەی ئەو حیزبانە کەسێکی وەک شوعلە خان بەو شێوەیە خەبات و ئەزموونەکەی تێکبشکێندرێ و تەنانەت مامەڵە بە مەرگەکەشی بکەن و پرسە و دابونەریتی دواکەوتووانەی میللیی و دینیی پێ بڕازێننەوە کە گوایە ئاشتەوایی لە نێوان حیزبەکان پێ دروست دەکەن، ئیتر ئەوە شوعلە خانە بە هۆی ئەوەی هاوسەری نەوشێروان بووە ئەوەندەیان پێ رەوا بینیوە! بەڵام بە دەیان و سەدان ژنی دیکەی وەک ئەو و لەویش تێکۆشەرتر نەک هەر لە هیچ جێیەک ناویان نییە بەڵکە بەرهەم و ئەنجامی خەباتەکەیان هەر ئەوەی لێکەوتەوە کە ماف و ئازادییەکانیان تا رادەی ژنکوژیی پێشێل بکرێن!

لەندەن
payzeehmed@hotmail.co.uk

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish