Skip to Content

توانه‌وه‌  …. شیعری: عه‌بدولڕه‌حمان فه‌رهادی

توانه‌وه‌ …. شیعری: عه‌بدولڕه‌حمان فه‌رهادی

Closed
by نیسان 2, 2017 General, Poems

كه‌ سه‌رماننایه‌وه‌
كتێبه‌كانمان
ده‌بنه‌ به‌ڵایه‌كی گه‌وره‌
بۆ ژن و منداڵه‌كانمان.
ساڵێ دوای ئه‌وه‌ی سه‌رمان ئاودیو ده‌بێ
ئه‌وان، ژووری كتێبخانه‌كانمان
به‌تاڵ ده‌كه‌ن
سه‌رجه‌م كتێبه‌كان ده‌خه‌نه‌ ناو
فه‌رده‌ی گه‌نم و
گوشی په‌تاته‌ و
كیسه‌ی چیمه‌نتۆ و
عه‌للاگه‌ی نایلۆنی پێڵاو و
كارتۆنی قه‌به‌،
له‌ لاژوورێكی هه‌وره‌بانه‌كه‌ی كه‌ڵه‌كه‌ ده‌كه‌ن
دوو ساڵ دواتر
ژنه‌كانمان،
دوای شه‌كه‌تی و
ماندووبوونێكی یه‌كجار زۆر
به‌ مێشك و ده‌روونێكی هیلاك و داته‌پیوه‌وه‌‌
به‌ بێزارییه‌كی تاقه‌ت پرووكێنه‌وه‌
كارتۆن و فه‌رده‌ پڕه‌كان
نایلۆن و گوشه‌ په‌تاته‌ی پڕ بیره‌وه‌ری
به‌ مه‌منوونییه‌وه‌
به‌ دیاری ده‌ده‌نه‌ سه‌نته‌رێكی لاوان
له‌ لاكۆڵانێكی گه‌ڕه‌كه‌كانمان،
دواتر دێنه‌وه‌ ماڵه‌وه‌ و
ده‌ستی ئۆخه‌ی به‌رز ده‌كه‌نه‌وه‌
به‌ ئیسراحه‌ت و
دڵ و ده‌روونێكی خه‌م لێ‌ بڕاو
به‌ مێشكێكی سافه‌وه‌
له‌ ژووری كتێبخانه‌كه‌ی ماڵه‌وه‌
هێمن، هێمن
لینگی لێ ڕاده‌كێشن و
لێی ده‌خه‌ون.
كتێبه‌كانمان له‌ سه‌نته‌ره‌كانی لاوان
ده‌بنه‌ خۆراكی مۆرانه‌ و مێروو.
شه‌ممه‌ی دواتر،
ژن و منداڵه‌كانمان
ژووری كتێبخانه‌كه‌ی ماڵه‌وه‌مان
ده‌كه‌ن به‌ ژووری نانخواردن
پڕی ده‌كه‌ن له‌ كاونته‌ر
كه‌وچك و پلێت و قازان،
ڕۆژانی هه‌ینی
ده‌عوه‌تی قه‌به‌قه‌به‌ی لێ ده‌كه‌ن
هه‌ر كه‌ تێر ده‌بن
عرت عرت پێده‌كه‌نن.
لێناگه‌ڕێن دراوسێ ماندووه‌كانیان
سه‌رخه‌وێ‌ بشكێنن
كه‌ تازه‌كێ‌، له‌ قوڕكاری و شێلمفرۆشی و
نۆبه‌تداری هاتوونه‌ته‌وه‌.

Previous
Next
Kurdish