چۆن … هیوا سه‌عید
ئەگەر بڵێم:
لە شیعرێک گوڵێک بووە ئەستێرە
دەڵێن ئەوە کەی شیعرە، درۆیە.
گوڵ چۆن دەبێتە ئەستێرە!
ئەگەر بڵێم:
لە چیرۆکێک پیاوێک بووە قالۆنچە
دەڵێن ئەوە کەی چیرۆکە، درۆیە.
پیاو چۆن دەبێتە قالۆنچە!
ئەگەر بڵێم:
لە فیلمێک پزیشکێک لە لابورەکەی مرۆڤی دروست دەکرد
دەڵێن ئەوەی کەی فیلمە، درۆیە.
پزیشک چۆن مرۆڤی پێ دروست دەکرێ!
ئەگەر ڕاستیتان دەوێ
ئێوە پێم بڵێن ئەدی دار چۆن دەبێتە مار؟
درەخت چۆن بەبێ ئۆکسجین دەڕوێ؟
منداڵ چۆن لەدایک دەبێ بەبێ باوک؟
مردوو چۆن لە گۆڕ هەڵدەستێتەوە؟
مەنجەڵێک شیو چۆن بەشی شارێک دەکا؟
وشترێک چۆن دەتوانێ شیری نەتەوەیەک بدا؟
دەریا چۆن بە مشتێک دەبێتە دوولەت؟
مەودای نێو دوو وڵات چۆن بە چاوچوقانێك دەبڕدرێت؟
مرۆڤ چۆن بەپێ دەچێتە ئاسمان؟
ئەگەر قەبارەی خۆر گەورەترە لە زەوی، چۆن ماوەی دروستکردنی زەوی زۆرترە لە خۆر؟
ئەوە شیعرە!
ئەوە چیرۆکە!
ئەوە فیلمە!
