Skip to Content

356 Views

بەییانامە لەسەر بەرپا کردنی ڕفراندۆم!! … حزبی کۆمۆنستی کرێکاری چەپی عێراق

بەییانامە لەسەر بەرپا کردنی ڕفراندۆم!! … حزبی کۆمۆنستی کرێکاری چەپی عێراق

Be First!
by June 25, 2017 General
image_print

کێشەی نەتەوایەتی بە سەربەخۆێی کوردستانی عێراق لە ڕیگای ڕفراندۆمەوە چارەسەر دەبێ!!
زوڵمی نەتەوایەتی لەسەر خەڵکی کوردستان لە چوار وڵاتی ڕۆژهەڵاتی ناوەڕاستدا( عێراق و ئێران و تورکیا و سوریا) مێژوویەکی دوورو درێژی هەیە کە نزیکەی یەک سەدەیە، دەیان کارەسات و کۆمەڵ کوژی و کاولکاری و دەربەدەری و ماڵ وێرانی بە دژی ئەم شوێنە کورد نشینانە لە ناوچەکەدا دروست کردوە، سەرباری قەدەغە کردنی بەکار بردنی زمانی دایکی و پۆشینی جل بەرگ وپراکتیک کردنی بۆنەکانیان. بەشێکی سەرەکی مێژووی هاوچەرخی ناوچەکە، ئەم زوڵم و زۆرداری و ئەم غەدرەیە. ئەم کێشەیە لە هەر وڵاتێکدا بە شێوەیەک چارەسەر دەبێ.

لەکوردستانی عێراقدا لەچەند دەیەی ڕابردودا گەورەترین کۆمەڵ کوژی بە بەکارهێنای چەکی کیمیایی لە هەڵبجە و دەیان شارو دێی و ناوچەدا و ئەنفال کردنی ١٨٠ هەزار کەس و لەناوبردنیان و کاولکردنی دەیان شارو شارۆچکەو وێران کردنی هەزارن لادێ و ڕاپێچ کردنی دانشتونەکانیان و گردکردنەوەیان لە ئودوگا زۆرەملێکان و دابڕێنیان لە شوێنی نشتەجی بوونیان و مەحروم کردنیان لە کارو ژیانیان، ئیعدام کردنی بەکۆمەڵی لاوانی ناڕازی و سەرکوتی بێ پەردەی حکومەتە ناسێونالستە عەرەبیە یەک لەدوای یەکەکاندا لەسەرخەڵکی کوردستان، هەروەها کارکردی تەبلیغاتی ناسێونالستی حزبە ناسێونالستیە کوردیەکان، قەڵشتێکی زۆری لە نێوانی خەڵکی کوردستان و عێراقدا دروست کردوە. سڕێنەوەی ئەم قڵشتە و کارکردەکانی ئەم هێزە کۆنەپەرستانە کارێکی ئاسان نیە، بەتایبەت لە غیابی دەوڵەتێکی سۆشیالستی یان دەوڵەتێکی سیکیولاری غەیرە قەومیدا، ولە ئەمڕۆشدا و لە چوار جێوەی دەوڵەتێکی ئیسلامی- قەومیدا کە هەر ڕۆژە باوەشێنی دەمارگیری دینی و قەومی دەکات.

لە ٢٦ ساڵی ڕابردودا لە دوای جەنگی خەلیجی یەکەمەوە، چەند جار فرسەت هاتوەتە پێشەوە ئەم کێشە نەتەوایەتیە چارەسەر بکرێ و بەگەڕانەوە بۆ ئیرادەی خەڵکی کوردستان و لە ڕێگای ڕفراندۆمەوە بۆ جیابونەوە لە عێراق و دامەزراندنی کوردستانێکی سەربەخۆ، بەڵام ناسێونالزمی کوردو حزبە دەسەڵاتدارەکانی لە ڕێگەی ڕێکەوتن لە گەڵ حکومەتی بەعس و دواتر لەگەڵ هێزە ئیسلامی وقەومیەکانی بەغداوە، ڕێگای بەغدا و حوکمی زاتی و فیدراڵیەتیان هەڵبژارد، ئەوەندەی تر ئەم کێشەیەیان قوڵتر کردەوە. ئەگەرچی زوڵمی قەومی لەسەر خەڵکی کوردستان کۆتایی هاتوە، بەهۆی کورد بونەوە خەڵک زوڵمیان لێ ناکری، بەڵام کێشەی قەومی لەسەر جێ خۆیدایە، هەر ئێستا ئەگەری پێکدادن و شەری ماڵ وێران کەری تر لەدەرگای خەڵکی کوردستان دەدات.

کۆمۆنزمی کرێکاری بەڕابەرایەتی مەنسوری حکمەت لە ١٩٩٥ وە ستراتیژی جیابوونەوەی خستە بەردەم کۆمەڵگە، حزبە دەسەڵاتدارەکانی کوردستان ڕیگری جدی بوون لە جێ بەجێ کردنی ئەم ستراتیجیەدا. لەو کاتەوە ئەگەر چی ناوەڕۆک و هۆیەکانی داواکاری ڕیفراندۆم بۆ سەربەخۆیی گۆڕانی زۆری بەسەردا هاتوە بەڵام کۆمۆنزمی کرێکاری و حزبی کۆمۆنستی کرێکاری چەپی عێراق هەمیشە و لە کۆنگرەی یەکەمی خۆیدا و لە بەییانامەکانیدا تەئکیدی لەسەر رفراندۆم وسەربەخۆیی کردوەتەوە بە رێگا چارەی گونجاوی زانیوە بۆ کۆتایی هێنان بە کێشەی قەومی لە کوردستانی عێراقدا.
ئێستا کە بەشێک لە حزبە دەسەڵاتدارەکانی کوردستان و لە زمانی مەسعود بەرزانیەوە چونەتە ژێر باری گەڕانەوە بۆ ڕئی خەڵک و بەرپا کردنی ڕفراندۆم بۆ سەربەخۆیی و جابوونەوە لە عێراق، خەڵکی کوردستان نابێ ئەم فرسەتە لەدەست بدەن، لە ٢٥ ئەیلولدا کە وەک کاتی بەرپاکردنی ڕفراندۆم دیاری کراوە بەشدرای جددی بکەن، نابێ ڕێگە بدەن ناسیونالزمی کورد مامەڵە بە دەنگی ئەوانەوە بکات بۆ سازش لەگەڵ بەغدا و دەوڵەتانی ناوچەکە. ئێمە بانگەوازی خەڵک دەکەین دەنگ بدەن بە جیابوونەوە. پێمان وایە جیابوونەوەی کوردستان کێشەی نەتەوایەتی چارەسەردەکات و زەمینەی گەشەکردنی خەباتی چینایەتی خۆشتر دەکات بۆ دامەزارندنی دنیایەکی ئازاد و یەکسان و سۆشیالست، ئەو دارە لە دەستی بورژوازی کورد دەخاتە خوارە کە ئەم خەباتە بەلاڕیدا ببات و ڕوو بەڕووی بەغدای بکاتەوە ڕێگە خۆش دەکات بۆ رزگار بوون لە دەسەڵاتی ناسێونالیزمی کورد و حزبەکانی کە هەر ئێستا بوەتە خواستێکی سەر زمانی هەموو خەڵک و جێ پێیان پێ لەق دەکات. پێویستە سەرنجامی رفراندۆم بە جیابونەوە و بە دامەزراندنی دەوڵەتێکی سەربەخۆی سکیولاری غەیرە قەومی و غەیرە دینی کەلەسەر بنەمای هاوڵاتی بوونی یەکسان دابمەزرابێت کۆتایی بێت.

بۆ بەرپا کردنی ڕفراندۆم و سەرکەوتنی پرۆسەی جیابوونەوە ئەم خاڵانە بە گرنگترین هەنگاو دەزانین:
١- ڕفراندۆم بۆ خەڵکی کوردستانە و پێویستە فرسەتی یەکسان بۆ هەموو هاوڵاتیانی کوردستان فەراهەم بکرێ بۆ دەنگدان لە سەر جیابوونەوە یان مانەوە لە عێراقدا.
٢- ڕفراندۆم دەبێ هەموو کوردسان بگرێتەوە بە هەموو ئەو شوێنانەی زۆرایەتی دانشتوانەکەی کورد زمانن، کە هەرئێستا لەرووی عەمەلیەوە لە ژێر دەسەڵاتی هەرێمی کوردستاندان. ئەگەر دواتر هەر ئیدعایەک چی لەلایەن حکومەتی عێراقەوە یان لەلایەن بەشێک لە خەڵکی ئەو شارانەوە بخرێتە ڕوو، پێویستە ڕفراندۆم بۆ ئەوە بکرێت ئەو شارە دەیەوێ لە چاورچیوەی کوردستان یان عێراق بێت.

٣- پێویسەت ڕفراندۆم سەرپەرشتی بکرێت لە لایەن ئورگانە نێو دەوڵەتیەکانەوە وەک نەتەوە یەکگرتوەکان.هەروەها بوار بۆ دەزگا ڕاگەیاندنە جیهانیەکان خۆش بکرێت ڕووماڵی ڕفراندۆم بکەن.
٤- سەرنجامی ڕفراندۆم هەرچیەک بێت دەبی هێزە سیاسیەکان و حزبەکان پابەندی جێ بەجێ کردنی بن، ئیرادەی خەڵک دەبێ بە ڕەسمی بناسرێت لەسەرووی هەموو ئیرادەیەکەوە بێت.
٥- بە دوای ڕفراندۆمدا و بە بەدەست هێنانی دەنگی پێویست بۆ جیابوونەوە، دەبێ هەنگاوەکانی جیابوونەوە دەست پێ بکات و ئورگانی پێویستی بۆ دیاری بکرێت.
ئێمە هەموو خەڵکی کوردستان بە هەموو پێکهاتەکانیەوە بانگەواز دەکەین ڕفراندۆم زۆر بە جدی بگرن و بە دەنگی بەڵی بۆ جیابوونەوە بەشداری هەمەلایەنە بکەن.

حزبی کۆمۆنستی کرێکاری چەپی عێراق
٢٢ حوزەیران ٢٠١٧

Previous
Next

Leave a Reply