Skip to Content

676 Views

موسـڵمانی کورد ڕەنج بەبـایە …  کاوە هادی

موسـڵمانی کورد ڕەنج بەبـایە … کاوە هادی

Be First!
by June 25, 2017 General
image_print

دینداری ئامڕازێکە بۆ گەشـتنە ئامانج ، گچکەترین و ئاسـانترین ئامانج ، رازیکردنی دید و تێڕوانینی کۆمەڵگەیە لە تاکی ناو کۆمەڵگە ، بە داخەوە ئەم تاکانە زۆرینەی کۆمەڵگە پێکدێنن . ئەم زۆرینەیە بەرهەمی هـزر و ئەقڵی خۆیان نا چـننەوە ، وەک مـشەخۆر بەرماوەی ریش سپیەکان گەرم دەکەنەوە ، کە هەمان بەرماوەی چەند سـەدەیەکی رابوردوە ، نەوە لە دوای نەوە ئەم چێشتی مجەورە دەرخواردی یەک دی دەدەنەوە ، بێگومان زۆرینەی رەها کۆکن لە ئامانجدا بەڵام ناتوانن یەک رەنگ و یەک دەنگ بن لە هەڵسوکەوت و دید بۆچونیاندا . هەندێکیان کەیف و سەفای خۆیان دەکەن و مسـقالە زەڕەیەکیشی تێدا دەهێڵنەوە بۆ بەرقاپیەکەی خودا ، کـفرناکەن و بە ئینشەڵاوماشەڵا قسـەدەکەن ، لەو دوازدە
مانگەی سـاڵ یەک مانگی خۆیان دەپارێزن لە زگ و نەفەس و هەوەسبازی . هەندێکیان هەرچی خودا پێی ناخۆشـە دەیکەن و دەیخۆن و دەیخۆنەوە ، هەرلە دزی و درۆزنی و لاقەکردنی ژن ومنداڵ هەتا دەگات بە پیاوکوشـتن و خوێنڕێژی ، هەرکاتێ تەمەن هەڵکشـا بۆ لێواری مەرگ ئیدی ، گۆشـەی مزگەوت بەرنادەن و سـەریان بچێت یەک نوێژیان ناچێت ، ئاخر دەنگۆیەکی زۆر ترسـناک هەیە دەڵێت … گرنگ نیە چیت کردوە و چیت نەکردوە ، چەندە پیاو و ژن و منداڵت کوشـتوە ، گرنگ ئەوەیە یەک جار بەڕاستی و لەدڵەوە بڵێیت (( شـایەتمان دێنم کە تەنها اللە خودایە وە موحەمەدیش نێردراوی خودایە )) ئیدی دڵنیابن لە ڕۆژی دواییدا قاپیکانی بەهەشـت بۆ ئێوە دەکەونە سەر گازەرەی پشـت و هەتا هەتایە لەو باغانەی بەهەشـت ، بە سـێکس و شـەراب و میوەهاتی خۆش دەیگوزەرێنن !!!. هەندێکی دی لە هەرەتی منداڵی و تافی لاویدا لە گشت مافەکانی ئەو تەمەنە جوانە خۆیان بێ بەشدەکەن ، رەنگ زەردو لەڕو و لاواز ، لەترسـی عەزابی قەبر ناوێرن سـەری خۆیان بخورێنن ، ئاواتە خوازن یەک رۆژ زودتر ماڵئاویی لەم ژیانە کاتییە بکەن و بگەن بەو ژیانە بێ کۆتاییە بە مولاقاتی پێغەمبەری نازدار و خوا گیان شـادبن !!!.

هەندێکی دی هێندە بە گوتەکانی قورئان و فەرمودەکانی موحەمەد بێ هۆشـکراون ، ئەگەر لە سـاتێکدا خوێنی ١٠٠مرۆڤ برێژن ، بریسکەی سـمێڵیان دێت و شـانازی دەکەن کە بوون بە شـێری خودا ، هێندە تامەزرۆی ئەو باغانەی بە هەشـتن دەسـت وەرئەدەن لە کاری خودا ، خۆیان دەست دەنێن بە دوگمەی مەرگ و شـەهادەتـدا ، ئەم شـێرانەی خودا شـەهـیدن لە پێناو سـەرکەوتنی دینەکەی خودا ، بە پۆسـتاڵی قوڕاوی بە دەسـتی خوێناوی یەکڕاست بۆ بەرزایەکانی بەهەشت بۆ باغ و کۆشـکە تاپۆ کراوەکان بۆ شـەهیدانی سـەروەر دەڕۆن ، حۆرلعەین و کەنیزەکی پاکیزە و سـەرمۆرکراو بۆ ئەمان بێ حسـاب و کیتابە لە ٧٧ وە دەستپێک دەکات هەتا ٧٧هەزار !!!. تەواوی جەنگاوەرانی ئەم ئاینە له هەردوو دیرۆکی کۆن و نوێیدا ، بەم شەرابە هۆشـبەرە بێ هـۆشـکراون ، بنواڕنە قەتڵوعامی تیرە و هۆزەکانی مەکە و مەدینە ، قەتلوعامی بابوباپیرانمان نوێترین خوێنڕێژی تاوانی شـەنگاڵ و قەتلوعامی خوشکو برا ئێزیدیەکان بوو . تەواوی پاداشـتەکانی ئەودونیا بۆنێرینەکانە ، من تەنها یەک پاداشـتم بیسـتوە بۆ مێیینەی موسـڵمان … گەڕانەوەیان بۆ لای مێردەکانی ئەم دونیایان خۆ ئەگەر زاڵمێکیش بووبێت و سێ ژەمە نانوشـەقی دەرخوارد دابێت ، بەمەرجێک دەبێت ئەو ئافرەتە ئەهلی بەهەشـتبێت و ڕۆژێ لە ڕۆژان دڵی مێردەکەی نەڕەنجاندبێ ، دەنا چاوی بە پشـتەملی خۆی بکەوێت چاوی بە بەهـەشت ناکەوێت ، هەرچەندە موحەمەد لە دێڕزەمانەوە نوقلانەی دۆزەخی بۆ لێ داون ، ئەوەنیە کە لەسەر پشتی بۆراق فڕی بۆ ٧تەبەقەی ئاسـمان و بینی … زۆرینەی ئەهلی جەهەنەم ژنان بوون ، ئەمە لە کاتێکدا هەم قورئان و هەم موحمەد خۆیشی دەڵێت ، بەهەشـت و دۆزەخ دوای ڕۆژی ئاخیر بەرپادەبن ، واتە هێشـتا نە بەهەشـت ڕازاوەتەوە نە ئاگرکەی دۆزەخیش گڕدراوە ، تۆ بڵێیت ئەم نێردراوی خودایە سەردانی کام دۆزەخی کردبێت ؟ .

ئەم پەرەگرافەی سـەرەوە تەنها تایبەت نیە بە بڕوادارانی کورد و ئاینی ئیسـلام ، گشتگیرە بە تەواوی ئاین و نیمچ ئاینەکان ، وێڕای رێز و تێگەشـتنم بۆ تەواوی بیروباوەڕەکانی تاک بە تاکی ئەم گۆی زەمینە ، من چەند سوورم لەسەر بڕواکانی خۆم ، تۆش مافی خۆتە دە هێندە سـووربیت لەسـەر بیروبڕوای خۆت ، هەر لە مانگاپەرست و گاپەرست و خوداپەرست هەتا ئاگرپەرست و سروشت پەرست و جوان پەرستان ، بوونی بڕوا و نەبوونی بڕوا زۆر تایبەت مەندە بەو مرۆڤەوە ، ئەوەش کاریگەریی شـتگەلێکن کە تەنها ئەو کەسە لەو کەمەنکێشـیە تێ دەگات ، جا ئەگەر ئەرێنی بێت یان نەرێنی خۆی سەرپشک و فریاڕەسی خۆیەتی . تەنیا خاڵی جیاوازم ئەوەیە بەتۆپزی بیروباوەڕی خۆت نەسەپێنی بە سەر کەسێکی دی کەدا ، ترسولەرزی درۆ بڵاو نەکەیتەوە بە نێو چینە لاواز و کەم تواناکان ، خۆ ئەگەر کار گەشـتە بەکارهێنانی شمشێر و چەک بۆ سەپاندنی بیروڕا ، ئەوا دڵنیابە کە تۆ بەکتریا و ڤایرۆس بڵاودەکەیتەوە نەک بیروبڕوا . بنەبڕکردنی هەموو ئەو بەکتریا و ڤایرۆسـانە ئەرکی سەرشـانی هەموو مرۆڤێکی خاوەن ویژدان و خاوەن بیرێکی مرۆڤ دۆسـتانەیە . بە گوتەیەکی بیرمەندی میسری کۆتایی بەم درێژدادڕیە دەهێنم و دواجار دێمە سەر ڕەنجەڕۆیی موسـڵمانی کورد ، سەید ئەلقمنی لە کۆڕبەندێکا گوتی … هەموو دوپشکێک کوشـندەیە ، بەڵام ئایا هەموو دوپشـکێک لە ماوەی تەمەنیدا شـەرەفی کوشـتنی مرۆڤێکی بەردەکەوێت ؟ .

ئاین دەشـێت وەک تەواوی ئایدۆلۆژیەکان بکرێت بە ئامرازێک بۆ بەرفراونی قەڵمڕەوی دەستەڵات ، بۆ داگیرکردنی خاک و نیشـتمانی دەرودراوسـێکانی دوور و نزدیک . جێگەی سـەرسـوڕمانە ئاینێک لە بیابانێکی وشکی پر لە کێشە و تاوان ، بارگاوی بەدڕندایەتی و خوێنڕێژی سـەرهەڵبدات و لە ماوەیەکی کورتدا خۆی بسـەپێنێ بەسـەر تەواوی ناوچەکەدا ، پەل هاویشـتن بۆ وڵاتانی دراوسـێ ، ناعەرەب و ناموسڵمان بن و خاوەنی فەرهەنگ و شـارستانی خۆیان بن ، نەک تەنها داگیرکردنیان بەڵکو گۆڕانیشـیان بۆ عارەب و بۆ موسـڵمان ، نموونەی میسـر و شـام و تونس و مەغریب ، تەواوی سەرچاوە مێژویەکان پێمان دەڵێن … نیشـتمانی عارەب تەنها نیمچە دورگەی عارەب بووە ، جگە لە چەند هۆزێکی پەرت وبڵاو نیشـتەجێ لە دەرەوەی ئەم نیمچەدورگەیەدا ، بەڵێ ئەوە تەنها هێز و شەڕانگێزی عارب نەبوو بەڵکو ئەوە ئاینی ئیسـلام بوو کە عارەبی کرد بە یەکێک لە نەتەوە گەورەکانی جیهان و کاریگەر لەسەرمـێژوی گشت دونیا ، دواجار قۆستنەوەی ئەم ئاینە لە لایەن خەڵکانی ناعارەبەوە ، بۆ بەهێزکردن و بەرفراوانیی دەسـەڵتی قەڵمڕەویان ، ئەوە دەسەڵاتی ئیمپراتۆریی * عوسـمانیەکان بوو گەیشـتە ئاوروپا و ئەفریقا و ئاسیای ناوەڕاست ، بە هێزوبازوی شـەڕانگێزی خۆیان و وزەی ئەم ئایدۆلۆژیەی کە ناویان لێ نابوو ئاینی ئیسـلام ، دەنا تەنها دڕندەیی تورک وتەتار بەس نەبوو بۆ ئەم پێشـڕەفتە گەورەیە و بەردەوامیی حوکمی ٦٠٠سـاڵەی عوسمانیەکان ، هەر ئەمەش بوو بە بەردی بناغەی دامەزرانی دەوڵەتێکی گەورە و گرنگی وەک تورکیای ئەوڕۆ .
دوای داگیرکردنی ئێران و خاپورکردنی کلتور و شـارستانیەتیان لە لایەن عاربی موسـڵمانوە ، ئێرانیەکان دەستەوەستان بەچۆکدا نەهاتن ، هەر زوو بەزوو خۆیان کردە موسـڵمانی شـیعە ، دەنا کێشمەکێشی سونە و شـیعە نە لە دوور نە لە نزدیک پەیوەندی بەو خەڵکەوە نەبوو ، بەڵام ئەوە وزەی ئەو ئایدۆلۆژیە بوو کە ناویان لێ نا (( ئالی شیعە ))و خۆیان پاراست لە داگیرکاری عارەب و تورک و دامەزرانی دەوڵەتی* سەفەوی ، دواجار بوو بە بەردی بناغەی دەوڵەتێکی بەهێزی خاوەن دەسەڵات لە تەواوی ناوچەکە و جیهاندا . هەرچەنەدە ئەوڕۆ تێگڕای دوڵەتە عاربەکان ، لەژێر هەم هەڕەشە و هەم ڕەحمەتی هۆردک ئێرانی شیعە و تورکیای سونەدایە ، بەڵام ئەمە شەقی مێژوە مێژوش شەرمی لە هیچ کەس نیە ، هەرکەسـە باج و خەراجی هەڵە و ڕاستی خۆی دەدا . هاوشێوەی عآرەب سەرجەم ئەم گەل و وڵاتانە ، بە کۆمەکی بەکارهێنانی ناوی ئیسـلام و دینداری خۆیان پێ دروستکرد و لە بوون بە عارەبیش خۆیان پێ پاراست .

لە مەحاڵ مەحاڵتر بوو میللەتێکی لاوازی پەرتوبڵاو ، لە فۆرمی تیرە و هۆزدا بەرگری بکات لە خەڵک و خاکەکەی ، لە کاتێکدا دوژمنێکی دڕندەی مرۆڤخۆری بەربەری ، بە شـمشێرێکی خوێناوی و ئایدۆلژیەکی سـیحراوی هەڵی کوتابێتە سـەری . تەسلیم بوونمان و موسـڵمان بوونمان ، باشـترین و تەنها بژاردە بوو لە پێناو مانەوە و درێژەدان بە ژیانی کولەمەرگی ، خۆ ئەگەر کوردیش بیتوانیایە هاوشـێوەی ئەو نەتەوانە ئەم ئاینەی بەکاربهێنایە بۆ خۆدروسـتکردن و دامەزرانی ئەمارەتێکی کوردی و پاشـان بۆ دەوڵەتێکی مۆدێرنی بەهێز و خاوەن پێگە ، ئەوامن یەک بسـتەڕێ ڕێم نەدەکرد بەبێ مێزەر یان عەمامە ، ئەو فرسـەتە لەدەست دەرچوو ، مۆدێلی بەکارهێنانی ئاین و بەناوی سەرخستنی ئاینی خودا بۆ دامەزرانی ئیمارە و خەلافە و ئیمپراتۆری نەما ، تەنانەت ئەبوبەکر بەغدادی و ئۆردوغانیش ئەسـپی خۆیان تاودا بەڵام نەیان توانی ڕۆح بکەنەوە بەر سـوڵتان و خەلیفەکاندا . ئەی کورد لەم بێ حاڵوئەحواڵیەیدا چیداوە لە هەڵگری ئاڵای ئیسـلام ؟ دەیەوێت لە پێناوی چـیدا ئاینی ئیسـلام سـەربخات ؟ بۆ خۆی لێ بوگە بە موسـڵمانی نمرە یەک ؟ جارجارە دەدەن بەگوێماندا کە گوایە کورد لە عارەبی نیمچە دورگەی عارەب باشـتر لە قورئان تێ دەگات ، تورک و فارس خواڕەحم بە ئیمانیان بکات ، گوایە ئەوان لەنگاوقوچ لەم ئاینە پیرۆزە گەیشـتون !!!. خوا هەڵناگرێت ناوبەناو دوژمنانی کورد ، بە کیمیاباران و ئەنفالکردن و ڕفاندنی کچ و خوشـکەکانمان وە بیرمان دەهێننەوە ، بە ئاشـکرا دەڵین ئێوە هێشـتا کافرن و سـەر و ماڵتان حەڵاڵە بۆ ئێمەی موسوڵمان . لەمیمبەری مزگەوتێکی ئالی شـیعەوە کاکی ئیمام دەیشـڕاند بۆ ئەو هەموو لە خواترس و خەڵکە نورانیە (( نەکەن خوێنتان تێکەڵی خوێنی کورد بکەن ، جونکە بە ئیسپاتەوە ، کورد قەومێکە لە قەومەکانی جـــن ))ئێسـتا قبوڵمانە موسـڵمانیەتیمان لێ وەرناگرن ، قەیناکە کافروبێ دینین بەڵام خوا

هەڵناگرێت ئێمە نە خێوین و نە جنۆکە ، مەلایەکی تورکی سـونی لە مزگەوتێکی فرە گەورە و پڕ حەشاماتدا ، هەردووک دەسـتی ڕوەو خودا بەرز کردبۆە ، یەک لە سەریەک دوعـای خراپی لێ دەکردین و حەشـاماتەکش بە دویدا ئامین ئامینیان بوو ، کاکی مەلا بە تۆپ و تەیارە دڵی ئاو ناخواتەوە ، بە ڕەجەب طەیب ئۆردوغانی دەگوت ، حەق وایە بە چەکی نەوەووی لەم مار و دوپشـکانە بدەیت ، ئاخر من کەسم نە دیوە نان بداتە مار و دوپشـک ، ئەو حەشامەتەش ئامین ئینشـڵایان دەگوتەوە ، باوکم بمانکوژن چـەکی نەوەوویش بەکاربێنن بەڵام ویژدان خۆشـە بۆ مرۆڤ ، ئێمە لە پێش هەموو ئێوە مرۆڤ بوین لە سـەر ئەم خاکە . ئێمە نە جنۆکەین نە مارین نە دوپشـک ، تەنها تاوانمان کوردبوونمانە . ئیدی بە هەموو خوشـک و برا جنۆکە و مار و دوپشـکەکانم دەڵێم ، چی دی خۆمان هەرزان فرۆش نەکەین و چی دی وزەی خۆتان بە بادا مەدەن .

کاوە هادی
……………………………………………………………………………………………………………………..
( * ) دەوڵەتی عوسمانی لە ساڵی 1299 وە هەتا ساڵی1923 حوکمیان کرد . بۆ ماوەی نزدیکەی 600 ساڵ .
لە سەدەکان ١٦ و ١٧ دا زۆربەی خاکی هەرسێ کیشوەری جیهانی کۆنی لەژێردەستابوو ، واتە هەموو ئاسیای
ناوەڕاست ، بەشێکی زۆری باشوری ڕۆژهەڵاتی ئەوروپا ، ڕۆژئاوی ئاسیا و باکوری ئەفریقای دەگرتەوە .
( * ) دەوڵەتی سەفەویی .. سەفەوییەکان لە ساڵی 1501 وە هەتا ساڵی 1736 حوکمیان کرد ، دەوڵەتێکی
بەهێزی شیعە مەزهب بوون ، لە گەڵ عوسمانیەکان لە ڕۆژئاواوە و لە گەڵ ئوزبەکەکان لە ڕۆژهەڵاتەوە
شەڕ و کێشەی زۆریان هەبوو .

Previous
Next

Leave a Reply