Skip to Content

بۆنی پوونگ … عه‌بدولڕه‌حمان فه‌رهادی

بۆنی پوونگ … عه‌بدولڕه‌حمان فه‌رهادی

Closed
by ته‌مموز 11, 2017 General, Poems

خۆر تاڵه‌ تیشكێكی خۆی
به‌ باڵی سه‌مه‌نده‌رێ
بۆ تنۆكێ شه‌ونم نارد
ئه‌ویش خستیه‌ گیرفانی
تاكوو ده‌مه‌و ئێواره‌
زه‌رده‌په‌ڕ بوو به‌ میوان
شه‌وقێكی بۆ شه‌ونم نارد
كه‌ شه‌ونم تاڵه‌ تیشكی
له‌ گیرفانی ده‌رهانی
ببوو به‌ په‌ڕی تاووس
كۆتر ملیان پێ ڕه‌نگ كرد
ئاسۆ خۆی پێ داپۆشی
سروشت كردیه‌ مافۆرێ
پڕ له‌ په‌لكه‌زێڕینه‌.
2
شالوورێكی وێل و سه‌رمه‌ست
به‌ چاوی پڕ خوماره‌وه‌
هاته‌ نێو دێڕه‌ شیعرێكم
كه‌ ده‌نووكی له‌ پیته‌كانی ناوت دا
سروشت پڕ بوو
له‌ بۆنی پوونگی به‌هاری
هه‌ر ئه‌وكاته‌
ته‌مێكی پڕ باقوبریقی
شه‌به‌نگاوی
به‌لووزه‌وه بۆ داباری.

3
ڕۆژانه‌ ده‌چمه‌ نێو ڕه‌زێ
بولبولێكی ده‌نووك مۆری
وێڵ و ته‌ریو
ده‌نووك له‌نێو بۆڵێ ئه‌نگوور
بزر ده‌كا
سه‌رمه‌ستانه‌ سه‌ر ده‌ردێنێ
ڕه‌ز و باخ و ده‌شتوده‌ریش
پڕ ده‌كا له‌
سه‌دا و نه‌وای
شه‌پۆله‌كانی میلۆدی
به‌ چریكه‌ی سه‌رمه‌ستانه‌ی
ده‌مخاته‌ نێو
خه‌یاڵی خۆشی مه‌یكه‌ده‌
له‌ كونجێكا
بێ باده‌ و مه‌ی
به‌ ئازارێ ده‌تلێمه‌وه‌
پڕ له‌ نیهادی ته‌نیایی
وه‌ك هه‌میشه‌ به‌یادی تۆ
ده‌كه‌ومه‌ ناڵه‌ی جودایی.
4
نیوه‌ڕۆیان
تیشكێ خۆر له‌ ڕۆچنه‌وه‌
خورجینه‌یێ
پڕ له‌ نسارم بۆ دێنێ
تژی له‌ به‌فراوی وشه
شێدار به‌ ئاونگی شیعر و‌
مشت له‌ ڕه‌نگی
شین هه‌ڵگه‌ڕاوی وه‌نه‌وشه‌.
5
خۆر مشتێ له‌
ئه‌له‌ندی ده‌مه‌و كازیوه‌ی
ڕژانده‌ نێو گیرفانی ته‌م
ئه‌ویش دایه‌ به‌ر بارانی
تیشكی ئاره‌نگی ئه‌ستێره‌
دواتر كردیان
به‌ په‌لكه‌زێڕینه‌ و ناردیان
بۆ ئه‌و ئاسمانه‌ی كه‌ تۆی لێی.

Previous
Next
Kurdish