Skip to Content

مه‌رگ  …. سه‌ردار جاف

مه‌رگ …. سه‌ردار جاف

Closed
by ته‌مموز 11, 2017 General, Poems

پێشكه‌شه‌ به‌ مه‌رگی خۆم ……

ئه‌گه‌ر هاتی
به‌ ئاسپایی له‌ ده‌رگاكه‌ی دلًم بده‌
چونكه‌ منیش ….
ناخی كه‌سم ، هه‌رگیز دانه‌خورپاندووه‌
فێری سه‌مای ماسی ببه‌
شه‌پۆل له‌ نێو چاوانمه‌وه‌ لرفه‌ ده‌كا
چونكه‌ رۆحم بۆنی ده‌ریای هه‌ڵگرتووه‌

*************************
ئه‌گه‌ر هاتی
چۆڕێ فرمێسك
له‌ كانیاوی كێلی گڵكۆی دایكم بێنه‌
تینوێتی شه‌وم بشكێنه‌
چونكه‌ خه‌وم وا ساڵێكه‌ بێدارییه‌ و وشكبوونه‌
گۆزه‌یه‌ك سۆزی باوكیشم
لێوه‌كانمی پێ ته‌ڕته‌ڕكه‌
چونكه‌ خه‌مم خه‌رمانێكی پڕ باڵایه‌
كه‌س لێی ناگا
هه‌ر هه‌ردووكمان
چاومان پڕپڕ ئه‌شكی روونه‌

******************************

ئه‌گه‌ر هاتی
له‌ سه‌ر ژێكانی مۆسیقا
هه‌نگاو بنێ
با خه‌یاڵم نوقمی به‌سته‌و گۆرانی بێ
چاوه‌نواڕی روخسه‌تی بێدادیم مه‌كه‌
با ژان و ئازاری ژیان
هه‌ر ده‌سله‌ملی شه‌وانی بێ

*************************

ئه‌گه‌ر هاتی
به‌ ئاونگی سپێدانی دولبه‌ره‌كه‌م
پاراوم كه‌
چونكه‌ هه‌ر ئه‌و پاكشۆری زه‌خمم ده‌ر ده‌كا
له‌ سه‌ر هه‌ر گردێكی وڵات
له‌ نێو هه‌ر چه‌مێكی ئه‌وێ
نغرۆی جوانی سروشتم كه‌
نه‌با له‌ پڕ خۆشه‌ویستی خاك و خۆڵم
له‌ نێو گۆڕیشا ده‌رم كا

****************************

ئه‌گه‌ر هاتی
به‌ر له‌ هاتن ، ئه‌و ته‌ڵقینه‌م له‌ گه‌ڵ خۆدا بۆ مه‌هێنه‌
نه‌با پاساری و كه‌ناریی
چه‌مه‌ جوانه‌كانی ئه‌وێ لێم یاخی بێ
به‌ر له‌ هاتن ، كفنه‌ سپییه‌كه‌ تووڕ بده‌
له‌ په‌ڕه‌ گوڵی گزنگا
ئاڵای ئه‌وێم بۆ بدووره‌
نه‌با خواكه‌ی ئه‌و وڵاته‌ بێته‌ ده‌نگ و
نزای ره‌قیبان ساقی بێ

*****************************

ئه‌گه‌ر هاتی
پێیان بڵێ ، گریان و شیوه‌ن به‌ سه‌رچوو
ده‌نگ هه‌ڵمه‌بڕن
نه‌با ره‌شۆڵ و مه‌ردان و كاوێسه‌كه‌م
نه‌عره‌ته‌ی سۆز و ئاوازیان نه‌ڵێنه‌وه‌
پێیان بڵێ ، ڕشپۆش مه‌بن
به‌ر له‌ جاویدانی هاتن
سه‌راپا دڵم ڕش بووه‌
نه‌با ئاوه‌ز و بیرم له‌ وه‌ڵامی گۆڕ هه‌ڵه‌ بكه‌ن
ڕێی سروودی زمانی خود به‌ربده‌ن و
ته‌ریقه‌تێ بڵێنه‌وه‌

****************************

ئه‌گه‌ر هاتی
با گۆڕه‌كه‌م نهێنی بێ
نه‌ له‌ پارك و نه‌ له‌ گرد و مه‌زارگه‌دا
نه‌عشم نه‌چێته‌ ژێر خاكێ
نه‌با به‌ ڕاڕه‌وی دوژمن
ئه‌و دڵخۆش و ئه‌زیزانم ئه‌سرین ڕێژ بێ
جه‌سته‌م سووتماكی وڵات كه‌ن
له‌ مه‌زاری شێمحێدینی شاره‌كه‌ما
په‌رش و بڵاوه‌ی سوتووم كه‌ن
با ئه‌و خاكه‌ به‌ر ژیله‌مۆی رۆحم كه‌وێ و
برینی گیانم سارێژ بێ

9 / 7 / 2017
ئه‌ڵمانیا

Previous
Next
Kurdish