وەختی شەو پێ دەکەنێ؛ زەوی دەپژمێ… بۆتان لەتیف عەبدولقادر
ئەم شەو کە چوومە دەرەوە
زەوی ئارەقەی ڕەش وشینی لێ دەچۆڕا !
ئاسمان ٣٠ ئەستێرەی پێ کردبوو !
ئەم شەو..
ئەم شەو کەچوومە دەرەوە
ئاسمانم دیت
خۆشەویستی ئەکردە باران و
پەردەیەکی لەڕەنگی من هەڵکێشراوی
بەسەر ئەستێرەکانی دادابوو !..
ئەم شەو ئاسمان
حەوتەوانەو ٢٣ ئەستێرەی دیکەی
بەپێکراوی هێشتبوونەوە !..
لەسەرەخۆ
سەرم بەرز کردەوە بۆی
تێی ڕامام وهەناسەکەم پێکەنینێکی هەڵکێشا
بەس نەم زانی ئەمە نمایشی چی یە؟!..
زانی سەرسام وشاگەشکەم..
زانی چاوم
زمانی ئەم نمایشەی نازانێت و
هۆش ونەستیش سەرگەردان !..
دوای دوو سێ جار چاو تروکاندن وئامێز
ئامێزی برژانگەکانی!..
شەو پێکەنی..
پ گوتی: من (ب)ێم
ێ گوتی: من (ۆ) م
ك گوتی: من (ت)ێم
ئە (ە) گوتی: من (ئا=ا)م
ن گوتی: من هەر (ن) و
(ی) ش گوتی:
منیش ئامرازی پەیوەندی
نیوانی تۆو دڵی ئاسمان !..
ئاسمان:
لەگەڵ هەموو ساڵێکی شەو
پەردە لەسەر ئەستێرەیەک لائەبەم !..
هەتا شەوت ڕاکشاو بێ
دڵی منیش رۆشنترو
باڵام تێرتر لەئەستێرەو
روخسارم تەژی لەبەژنت !..
یەکسەر زەوی پژمی و
دووگوردێکی سەوزی بۆ ڕاخستم و
بە فرمێسکی دەستنوێژی بۆ هەڵگرتم !..
سوجدە..
سوجدە..
سوجدە..
چەمانەوەی سۆزو
کڕنۆشی باوەڕو
داهاتنەوەی بیرو
ڕژانەوەی ڕەنگم بۆ خودا !..
خودایە رێزم ٣٠ چراو
ئومێدم ئاهەنگی ئاسمان !..
من داماو..
تۆ پڕ سۆزو خۆشەویستی و
ڕژاندنی میهرەبانیت پەسارمە
لەنیگەرانی وئاڵۆزی ڕازو نیگا !..
خودایە..
خۆزگەی خواردنەوەی بۆنی خاک
تەریک بوونمە لەباخچەی ئاژەڵان !..
بۆتان لەتیف عەبدولقادر”پــایـــان”
٢١ ی ١٠ ی ٢٠١٣ ALEX
