Skip to Content

تێنوویه‌تی … سۆران محه‌مه‌ده‌ سووره‌

تێنوویه‌تی … سۆران محه‌مه‌ده‌ سووره‌

Closed
by ئاب 27, 2017 General, Poems

1
ده‌نگی زه‌نگوڵه‌ی مێگه‌له‌ بزنی خوداكان دێ.
له‌كوێوه‌یه‌؟‌‌
ئه‌م ده‌نگه‌ نائاشنا نییه‌. ده‌زرینگێته‌وه‌.
ده‌نگێكه‌ بۆ بزوان.
من له‌خودا خه‌سێنراوه‌كان كه‌وتوومه‌‌وه‌.
تاریكی به‌من نه‌بێ بژار ناكرێ.
من تاریكی ده‌سمم، لێ هۆكار له‌مه‌دا چییه‌؟

2
كوێره‌ڕێیه‌ك ده‌چێته‌وه‌ ئاوه‌دانییه‌كی ‌قه‌ره‌باڵغ مردوو.
ئه‌زیه‌تم دیت، ئه‌م كوێره‌ڕێیانه‌ تێكناكه‌نه‌وه.
‌كه‌وتوومه‌ته‌‌ سه‌ره‌تاتكێ له‌گه‌ڵ هه‌نووكه و به‌یان
ئه‌وه‌تا بۆ دواجار بۆن به‌ده‌سماڵ و ده‌ست به‌مه‌مكدانه‌ په‌مه‌یییه‌كه‌ دادێنم.
سوێی بیره‌وه‌ریی…
نازانم چما ئه‌م نه‌هاتییه‌ تووشه‌، شۆره‌ك نه‌بوو له‌بوونم!
ئاخۆ لێكترازان وسه‌رهه‌ڵگرتن، له‌بێناسنامه‌یی و غه‌ریبی كوردانه‌دایه‌‌‌؟
3
هه‌ناسه‌بڕكێمه‌، لێ له‌ده‌می فریا(ی-ان)دا په‌نایه‌ك له‌به‌رچاوگرتن نه‌نگییه.
ده‌نگێك: توندتر بڕۆ، چه‌توونی ئه‌م تووله‌ڕێیانه‌ برینی ده‌م ئاوه‌ڵان.
گیلگامێش ئاسا سام و بێكه‌سنیشتووی ڕێگه‌كانم لێسته‌وه.‌
گیاگه‌نه‌مه‌ی ڕۆخ ڕێگه‌ و هه‌ورازان مێرووله‌یی له‌شم بوون.
بۆ نوێكردنه‌وه‌ی‌ سه‌ره‌تاكانی به‌قوڕ سوقدراویش
گه‌ڕ و گه‌وه‌ڕه‌كان شوێنباوه‌شتیان ده‌خستمه‌وه‌.
سه‌ره‌تای ئه‌م كوێره‌ڕێیانه‌ بۆكوێ به‌په‌له ‌بوون و كۆتایییه‌كیان نه‌نووسییه‌وه‌؟

4
بۆ كۆتایی، كۆتایییه‌كی چاره‌نووسساز هه‌یه؛‌ نه‌گه‌یشتنه‌.
كه‌ نووسینیش خه‌رمانه‌ی ڕێكردن بێ،
بوونت، كۆنووسینه‌وه‌ی نه‌گه‌یینه‌كانه‌‌.
ئه‌ز به‌پرسیاران تێنوومه‌ و
پێچ-ه‌ڵ-پێچی ئه‌م ڕێڕۆیشتنه‌ش‌ تراویلكانه‌‌ ده‌كشێ.
‌ده‌می كراوه‌ی پرسیاریش:‌ تێنوویه‌تی.
گه‌ره‌كمه‌ بپرسم: ئه‌وه‌ ڕێگه‌كانن په‌لكێشی تێنوویه‌تیم ده‌كه‌ن یان نه‌ناسینه‌وه‌یان؟

5
پێده‌شت هه‌نگاوه‌كانم به‌ناخی خۆیدا ڕۆده‌با و
نیگای ڕاساوی به‌ر ئاوێنه‌ی یاده‌وه‌رییش، هرووژمم بۆ دێنێ.
مانگی ئه‌نفالی كورد تادێ ده‌كشێ و
كفنی ساڵه‌ چڵكنه‌كانی به‌ربه‌رانمان ده‌به‌ر مێژوو ده‌كا.
زه‌رده‌شت خۆری شكۆی خۆی له‌شاخ به‌دره‌وشانه‌وه‌ سپارد.
زه‌مه‌نیش پێده‌شته‌كان به‌تۆزی خه‌لافه‌تی ئیخوان ده‌خنكێنێ.
كات چه‌ند به‌بێ سه‌بووری ئاره‌قی بنهه‌نگڵمان ده‌رده‌دا.

6
ته‌نیا ڕۆیشتن هه‌یه‌. ڕاپسكان سه‌رهه‌ڵگرتنه‌. ئاوڕدانه‌وه‌ هه‌ڵه‌ته‌بوون.
تۆ بێگانه‌، وه‌ك چاره‌نووسی كورد؛ بێندانیش له ‌ڕۆیشتندایه‌.
خه‌ونت ماڵاوایییه‌كه‌ له‌یاده‌وه‌ریی، نه‌ك بیرهاتنه‌وه‌ی نه‌ست.
ورته‌ورتێ: ده‌كرا خودا پێناسه‌یه‌كی ترمان بداتێ
ڕێگه‌كان ناگه‌نه‌ نه‌گبه‌تی هیچ ئیدیۆلۆژیایه‌ك، فڕین نه‌بێ.
له‌ ده‌نگی ئه‌سغه‌رییدا، چاره‌نووسی كورد خۆی ده‌چڕێنێ.
ئایشه‌شانیش سه‌ری به‌سه‌ردا شۆڕكردۆته‌وه‌ و ته‌قه‌ڵه‌كانی ئه‌م زامه‌ ده‌ژمێرێ.

7
من له‌هه‌موو شتێك چووم، ‌ڕۆیشتن نه‌بێ.
نه‌گه‌یشتن هه‌یه‌. كۆتایی وه‌رزه‌ڕێ چێنابن.
كه‌ تێنوویه‌تی بزنه‌ڕێی چیاكانیش ده‌ستغه‌ڵه‌تی داین‌
بیستم و نه‌مبینی:
من له‌وه‌ سه‌ختترم، به‌م نێزیكانه‌ بمرم.
ئیتر له‌م جوگرافیایه‌،
تێنوویه‌تی به‌یانییه‌كی تر ئاوس ده‌بێ.

———————————————–

گیاگه‌نه‌مه‌: (له‌ ناوچه‌ی نێوده‌شت و دۆڵه‌ڕه‌قه‌… تاد به‌كار دێت) جۆره‌ گیایه‌كه‌ له‌ پاوان و شاخ شین ده‌بێت، شێوه‌ی له‌ گه‌نم و جۆ ده‌چێت. مه‌ترێك یان زیاتر باڵا ده‌كات، بۆ وڵسات زه‌ریفه‌ و چاك ده‌یخوات.
سوقدراو: سواغدراو، سواقدراو.

* ئه‌م ده‌قه‌ له‌ ژماره‌ (7) 1-1-2017ی ڕۆژنامه‌ی هیچ بڵاو كراوه‌ته‌وه‌.

Previous
Next
Kurdish