شەوکەت ئەمین کورکی ئەندامی لێژنەی دادوەری کاندیداکانی خەڵاتی ئاسیا پەسیفیکە

مه‌نسوور جیهانی ـ “شەوکەت ئەمین کورکی” ئەندامی لێژنەی دادوەری کاندیداکانی خەڵاتەکانی ئیسکرین “ئاسیا پەسیفیک” ناسراو بە “ئۆسکاری ئاسیا”یە.
سینەماکاری کورد “شەوکەت ئەمین کورکی” بە نوێنەرایەتی لە هەرێمی کوردستان ئەندامی لێژنەی دادوەری کاندیداکانی یازدیەمین خولی خەڵاتەکانی ئیسکرین “ئاسیا پەسیفیک” APSA ناسراو بە “ئۆسکاری ئاسیا”ی لە ئەستۆدایە و بە هاوڕێیەتی لەگەڵ “هۆنگ ” Hong-Joon Kim مامۆستای زانکۆ و بەڕێوەبەریی فیستیڤاڵی نێودەوڵەتی “پۆچۆن” Puchon لە وڵاتی کۆریای باشوو و هەروەها “میناکشی شیدە” Meenakshi Shedde راوێژکاریی کۆمەڵێک لە فیستیڤاڵە گرینگە جیهانییەکان لەوانە: بەڕڵینالە، دوبەی، تۆرێنتۆ، بووسان، ئەمستردام و … لە وڵاتی هیندستان، “گۆڵنارا ئەبیکێیاوا” Gulnara Abikeyeva ڕخنەگری فیلم و سەرپەرەستی پێشووی فیستیڤاڵی نێودەوڵەتی بریزبین لە وڵاتی قەزاقستان، “کیکی فۆنگ” Kiki Fung ڕخنەگر، نووسەر و لە وڵاتی هۆنگ کۆنگ و “جوولیا ریگ” Julie Rigg رۆژنامەنووس، بڵاوکەرەوەی فیلم و ڕخنەگر لە وڵاتی ئۆستوڕاڵیا کاندیداکانی قۆناغی کۆتایی “ئاسیا پەسیفیک” هەڵدەسەنگێنن.
“شەوکەت ئەمین کورکی” کە ساڵی 2014 بە فیلمی سینەمایی “بیرەوەرییەکانی سەر بەرد” Memories On Ston لە هەشتەمین خولی ڕێوڕەسمی خەڵاتەکانی ئیسکرین “ئاسیا پەسیفیک” ASIA PACIFIC توانی خەڵاتی “تایبەتی یۆنسکۆ بۆ هاوبەشی بەرچاو و هەروەها پاراستنی جۆری کەلتوورەکان”ی ئەم ڕێوڕەسمە بەدەستبێنێت، بە نوێنەرایەتی لە هەرێمی کوردستان سەرۆکی لێژنەی دادوەرانی بەشی فیلمی دیکۆمێنتاریی، فیلمی گەنجان و فیلمی ئەنیمەیشنی نۆیەمین خولی خەڵاتەکانی ئیسکرین “ئاسیا پەسیفیک” ناسراو بە “ئۆسکاری ئاسیا”ی لە وڵاتی ئوستوڕاڵیا لە ئەستۆدابوو.
“شەوکەت ئەمین کورکی” ساڵی 2007 بە فیلمی سینەمایی “پەڕینەوە لە غوبار” Crossing the Dust خەڵاتی باشترین دەرهێنانی لە خەڵاتەکانی ئیسکرین “ئاسیا پەسیفیک” بەدەستهێنابوو و وەکوو ئەندام لە ئاکادیمیای “ئاسیا پەسیفیک” وەرگیرابوو.
هەروەها لە ساڵی 2011 سیناریۆی “بیرەوەرییەکانی سەر بەرد” لە نووسینی هاوبەشی “شەوکەت ئەمین” و “مەممەد ئەکتاش” پێش لە دەسپێکردن بە قۆناغی وێنەگرتن، توانی
خەڵاتی “باشترین سیناریۆ” لە ئاکادیمیای خەڵاتەکانی ئیسکرین “ئاسیا پەسیفیک” لە هەمان ساڵدا بەدەستبێنێت. خەڵاتەکانی ئیسکرین “ئاسیا پەسیفیک” دەوڵەتی کۆئینزلەندی ئوستوڕاڵیا بە پشتیوانی یۆنسکۆ و هەروەها فیدراسیۆنی نێونەتەوەیی یەکێتی بەرهەمهێنەرەکانی فیلم (فیاپف) هەموو ساڵێک بە باشترینەکانی سینەمای “ئاسیا پەسیفیک” دەبەخشێت. مەبەست لە پێشکەش کردنی ئەم خەڵاتانە، ڕێزلێانە لە دەستکەوتە سینەماییەکانی فیلمەکانی ناوچەی “ئاسیا پەسیفیک” و هەروەها دروستکردنیی بازاڕێکی جیهانی فیلمە.
ڕێوڕەسمی کۆتایی یازدەیەمین خولی خەڵاتەکانی ئیسکرین “ئاسیا پەسیفیک” ناسراو بە “ئۆسکاری ئاسیا” شەوی 23ی نۆڤەمبەری 2017 لە شاری بریسبان لە ویلایەتی کۆئینزلەند لە وڵاتی ئوستوراڵیا بەڕێوەدەچێت و تیایدا سینەماکارانی سەرکەوتووی بەشە جۆراوجۆرەکان، لەوانە: باشترین فیلم، باشترین دەرهێنان، باشترین بەڕێوەبەریی وێنەگرتن، باشترین فیلمی منداڵان، باشترین فیلمی دیکۆمێنتاریی، باشترین فیلمی ئەنیمەیشێن، باشترین سیناریۆ، باشترین فیلمی گەنجان، باشترین ئەکتەری پیاو و هەروەها باشترین ئەکتەری ئافرەت لە لایەن ئەندامانی لێژنەی دادوەرانەوە دەناسێندرێن و خەڵات بەسەریاندا دابەشدەکرێت.

بۆ زانیاری زیاتر:
http://www.asiapacificscreenawards.com/2017/09/apsa-names-11th-apsa-international-nominations-council/?_ga=2.144046646.2098734954.1506867386-1871388564.1506867386

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.