Skip to Content

چۆن مامه‌ڵه‌ له‌گه‌ڵ وه‌زعه‌كه‌دا بكرێت؟ …. عیماد عه‌لی

چۆن مامه‌ڵه‌ له‌گه‌ڵ وه‌زعه‌كه‌دا بكرێت؟ …. عیماد عه‌لی

Closed
by تشرینی یه‌كه‌م 26, 2017 General

پیش هه‌موو شتێك با كه‌س شایی نه‌كات و ئه‌وی تریش شیوه‌ن نه‌گێرێت و هه‌موو ئاراسته‌ و تواناكان بۆ ئه‌وه‌ بێت چۆن زیانه‌ كاتیه‌كه‌ كه‌م بكرێته‌وه‌.
ریفراندۆم كرا و بارودۆخێكی نوێ ده‌ستی پێكردووه‌ و به‌ سه‌ركه‌وتنی جه‌ماوه‌ری میژوویی بێت یان شكستی سیاسی و عه‌سكه‌ری راگوزه‌ر،سه‌ره‌رای گه‌له‌كۆمه‌كیه‌كان، قۆناغی حوكمی زاتی و فیدراڵی گوزه‌شت و قۆناغی سه‌ربه‌خۆیی هاتۆته‌ ئاراوه‌. ئه‌مه‌ قسه‌یه‌كی خه‌یاڵی نیه‌، جا زوو بێت یان دره‌نگ و ئه‌گه‌ر دوو هه‌نگاویش به‌ره‌و پاشه‌وه‌ بگه‌رێینه‌وه‌ به‌ڵام له‌ دواجاردا ئامانجه‌كان ده‌پێكرێن. له‌ ئه‌مرۆ به‌دواوه‌ رێفراندۆم بووه‌ سومبولی مێژوویی و بنه‌مایه‌كی یاسایی و جه‌ماوه‌ری و سیاسی كه‌ له‌ رێره‌وی مێژووی داهاتووی نزیك یان دووریدا لێكه‌وته‌ ئه‌رێنیه‌كانی ده‌رده‌كه‌ون و هه‌زار و یه‌ك سه‌ركرده‌ و ده‌سه‌ڵاتدار نه‌ك سری بكه‌ن و رایگرن به‌ڵكو ئه‌گه‌ر به‌ بریاری په‌رله‌مانیش هه‌لیوه‌شێننه‌وه‌ بایی یه‌ك عانه‌ ئه‌رزشی نیه‌ و له‌ سه‌رجه‌م رووه‌ یاسایی و سیاسیه‌كه‌یه‌وه‌ جێگه‌ی خۆی گرت وبه‌ میله‌ت و ریفراندۆمێكی تر نه‌بێت هه‌ڵناوه‌شێته‌وه‌ .

به‌ڵام بۆ ئه‌م رۆژانه‌ و ئه‌و هه‌موو گوفتار و ره‌فتاره‌ جۆربه‌جۆرانه‌ و راوبۆچونه‌ زۆر و زه‌وه‌ندانه‌ ده‌لێین؛ له‌ حه‌قیقه‌تدا 95%ی ئه‌وانه‌ی به‌ خۆیان و حزبه‌كانیشیانه‌وه‌ رایان نه‌خێر بوو بۆ ریفرادۆم یان بۆ سه‌ربه‌خۆیی، ته‌نها له‌به‌ر ئه‌وه‌ بوو كه‌ بارزانی عه‌رابی ریفراندۆم بوو نه‌ك پێشبینی وه‌زعی دوای ریفراندۆمیان كردبێت و سه‌لبیاته‌كانییان له‌به‌رچاوگرتبێت و خوێندبێته‌وه‌، واته‌ سه‌ربه‌خۆییان به‌ دژایه‌تی بارزانی گۆریه‌وه‌ و دژایه‌تی كه‌سی وحزبیان له‌ پێش سه‌ربه‌خۆیی و كوردستان دانابوو . ئه‌گینا له‌ دوا ساته‌كانی پێش ریفراندۆم بریاری به‌شداری كردن و به‌ڵێیان نه‌ده‌دا و رێكخه‌ر و سه‌رۆكی حزبه‌كانیان و سه‌ركردایه‌تیه‌كانیان ده‌نگیان به‌ به‌ڵێ نه‌ده‌دا و به‌رپرسیارێتی مێژوویان به‌ ململانێی ته‌سك نه‌ده‌گۆریه‌وه‌ و، له‌سه‌ر رای راستی خۆیان شێلگیر ده‌بوون نه‌ك گومان له‌ نه‌فره‌تی مێژوو بكه‌ن له‌كاتی ئه‌گه‌ری هه‌ڵه‌ كردنیان له‌ پرسه‌كه‌ و دیاری كردنی هه‌ڵوێست و بۆچونه‌ حزبی و كه‌سیه‌كانیان پیش بیركردنه‌وه‌ی بابه‌تیانه‌یان. جا له‌م قۆناغه‌شدا خۆیان به‌ براوه‌ی شه‌ر نه‌زانن و به‌رژه‌وه‌ندیه‌ گشتیه‌كه‌ بخه‌نه‌ به‌رچاو نه‌ك پێخۆشبونی شكستی یه‌كێك یان حزبێك و به‌گیانی تۆڵه‌ سه‌ندنه‌وه‌ ره‌فتار نه‌كه‌ن و میله‌ته‌كه‌ زیاتر توشی نه‌هامه‌تی نه‌كه‌ن، به‌ پێی بۆچونی مردنی خۆیان و تۆپینی كه‌ره‌ دێزه‌ش ره‌فتار نه‌كه‌ن .

جابۆیه‌ ده‌بێت یه‌كه‌م جار چاره‌سه‌ری نێوخۆیی بدۆزرێته‌وه‌ و گرنگترین رێگه‌ چاره‌ی په‌رینه‌وه‌ له‌ قۆناغه‌ زۆر قورسه‌كه‌ به‌ عه‌قڵانیه‌ت مه‌یسه‌ر بكرێت، ئه‌ویش به‌ :
1-وردبونه‌وه‌ له‌ بارودۆخه‌مه‌ و نه‌خزاندنی زیاتر بۆ باوه‌شی به‌رژه‌وه‌ندخوازانی ده‌ره‌وه‌ له‌ لایه‌ن كاربه‌ده‌ستانی ده‌سترۆیشتوو نه‌ك ته‌نها به‌رپرسانی راسته‌قینه‌ .
2- له‌م كاته‌دا كه‌ دوژمن ده‌سه‌ڵاتی كوردستانی خزاندۆته‌ گۆشه‌یه‌كه‌وه‌. ده‌بێت هه‌مووان به‌ یه‌ك بۆچون و دوور له‌ ره‌فتاری هه‌رزه‌كارانه‌ی هه‌ندێك به‌ یه‌كگرتوویی به‌رامبه‌ر ئه‌و دوژمنانه‌ بوه‌ستین كه‌ به‌ زوڵم كردن و زوڵم لێكراوی پشتگیری هاوه‌رگه‌زه‌كه‌ی خۆیان ده‌كه‌ن و له‌ دژی تۆ ده‌وستن ئه‌گه‌ر تۆش له‌سه‌ر حه‌ق بیت به‌ پێی بیری ره‌قی( ناصر اخاك ظالما او مظلوما). به‌ سیاسه‌ت و هه‌ر ئامرازێك بێت یه‌ك ده‌ستی كورد پیشان بدرێت بۆ ئه‌وه‌ كار له‌ كار نه‌ترازێت و هه‌موو شتێك له‌ده‌ست نه‌چێت و سه‌ده‌یه‌ك نه‌یه‌ینه‌ دواوه‌ و دوژمن له‌ شوێنی خۆی بوه‌ستێنرێت ئه‌گینا ئه‌م جۆره‌ دوژمنانه‌ ره‌حم به‌وانه‌ش ناكه‌ن كه‌ جه‌ستیان له‌ ناو ده‌ستیان بووه‌ و رایانكیشاون بۆ كوردستان و هه‌ڵخه‌ڵه‌تێنراون و ره‌فتاریان له‌كه‌ركوك و ناوچه‌ داگیركراوه‌كانی ئێستا باشترین گه‌واهیده‌ری ئه‌م قسه‌یه‌.

2- بیرنه‌كردنه‌وه‌ له‌ چاره‌سه‌ری خه‌یاڵی كه‌له‌ سه‌ر وه‌لانانی بیروبۆچون ركابه‌ر بنیات نرابێت وو پێكهاته‌ی زۆرینه‌ له‌ سه‌ر ئه‌رز فه‌رامۆش كرابێت ئه‌گینا جگه‌ له‌ ماڵوێرانی شتی تری تێدا نادۆزرێته‌وه‌ و ویستی به‌رژه‌وه‌نخوازه‌ هه‌مه‌جۆره‌كان له‌سه‌ر ئه‌رزی كوردستان به‌ ئاسانی جێبه‌جێ ناكرێت، ئه‌گینا هه‌مووان هه‌ڵه‌كان دووباره‌ ده‌كه‌نه‌وه‌ و زیانه‌كان زۆرتر ده‌كه‌نه‌وه‌.
3-بیر كردنه‌وه‌ و ره‌فتاری واقعی نه‌ك حازر به‌ده‌ست یان هاورده‌ی ده‌ره‌وه‌ كه‌ هه‌ر بۆچونێك په‌نجا لوغمی له‌ژێره‌وه‌ بێت.
4- له‌بیر كردنی ناكۆكیه‌كان یان وه‌لا نانی ململانێی نابه‌جێ به‌ عه‌قڵ و بیری قووڵ به‌ هه‌ر شێوه‌یه‌ك بێت كه‌س خۆی به‌ راستر نه‌زانێت ئه‌مه‌ ئاستی بیركردنه‌وه‌ و شیكردنه‌وه‌ و تێروانینی عه‌قلی كورده‌.
5- لیهاتوویی سه‌رجه‌م سه‌ركردایه‌تی كورد له‌م ئاسته‌دایه‌ و كه‌س نه‌گه‌یشتووه‌ به‌وه‌ی هه‌ڵسه‌نگاندنی ورد و زانستی و دروست بۆ په‌یوه‌ندی هێزه‌كان و هاوكێشه‌ دیاره‌كان بكات و كار بۆ ئامانجه‌ دیاریكراوه‌كان بكات و ئه‌گه‌ره‌كان بخوێنێته‌وه‌ كه‌ گرنگترین مه‌رجه‌كانی سه‌ركردایه‌تیه‌ .
بۆیه‌ هه‌مووان له‌ خه‌مڵاندن هه‌ڵه‌ بوون و هه‌مووان سۆزی نه‌ته‌وه‌یی به‌ شێوه‌یه‌ك له‌ شێوه‌كان زاڵ بوو به‌سه‌ریاندا و سه‌ركرده‌یه‌كی سیاسیی كیسنجه‌ر ئاسا یان بیرمه‌ندێكی وه‌ك ماركس و لینینمان نیه‌ تا بڵێین خه‌تاكه‌ی خۆمانه‌ نه‌ك بارودۆخه‌ گشتیه‌كه‌ و وه‌زعی كوردی پاش سه‌ده‌یه‌ك داگیركاری و ژیر ده‌سته‌یی . له‌ لایه‌كی تره‌وه‌ ئه‌گه‌ر سه‌ركرده‌ی بلیمه‌تشمان هه‌بێت كه‌چی ئێمه‌ به‌رهه‌می كۆعه‌قڵی سه‌ركردایه‌تیه‌كان به‌ كار ناهێنین و تینك تانكیشمان نیه‌ بۆ رێنوێنی دروست و ده‌سه‌ڵاتی داموده‌زگه‌ییشمان نیه‌ بۆ نه‌هیشتنی هه‌ڵه‌ی كه‌سی و ئه‌وه‌ی ده‌كرێت ته‌نها بۆچون و ره‌فتار و عه‌قڵیه‌تی كه‌سی و حزبی زاڵه‌ به‌سه‌ر هه‌موواندا و ئه‌مه‌ش هه‌ڵگری تۆوی سه‌رجه‌م هه‌ڵه‌كانه‌ .

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish