Skip to Content

بۆ بەرهەم ساڵح ؟ … شێرکۆ کرمانج

بۆ بەرهەم ساڵح ؟ … شێرکۆ کرمانج

Closed
by تشرینی یه‌كه‌م 27, 2017 General

پێکهێنانی حکومەتی ڕزگاریی نیشتیمانیی بۆتە وێردی سەر زمانی هەموومان بەڵام:
کێ سەرۆکایەتی بکات؟
لە کێ پێکبێت؟
چۆن پێکبێت؟
ئەرکەکانی چی بن؟
ئەم پرسیارانە کەمترین قسەیان لەسەر کراوە، ئەم بابەتە هەوڵێکە بۆ قسەکردن لەسەر ئەم چەند پرسیارە. لای زۆربەمان ڕونە کە پێکھێنانی حکومەتێکی ڕزگاریی نیشتیمانی لە ئێستادا زەرورەتێکی حەتمیە لە ھەرێم. بۆیە بەچاکمزانی کە چەند بیرۆکەیەک بخەمەڕوو بۆ گفتوگۆیەکی جدی.
لەسەرەتاوە دەمەوێت ئەوە بڵێم کە من بەچاکی دەزانم کە سەرۆکایەتی حکومەتەکە بە د. بەرھەم ساڵح بسپێردرێت لەبەر ئەم ھۆکارانە:
١- بەرھەم ساڵح کاندیدێکە کە لەوانەیە ھەموو لایەنەکان، پارتی و یەکێتی و گۆڕان و یەکگرتو و کۆمەڵ و حیزبەکانی دیکەش قەبوڵی بکەن.
٢- بەرھەم ساڵح کەسێکە کە ھەم ئەزموونی لە بەڕێوەبردنی حکومەتی ھەرێم ھەیە ھەم کەسێکی تەکنۆکراتە.
٣- بەرھەم ساڵح لەنێو دامودەزگا عێراقیەکان ناسراو خۆشەویستەو پەیوەندییەکی بەربڵاوی لەگەڵ بکەرو کەسایەتییە سیاسییە کاریگەرەکانی ناو عێراق ھەیە.
٤- بەرھەم ساڵح ئەزمونی لەکاری دیبلۆماسی ھەیە بە ئاستە نێودەوڵەتیەکەشەوە. ئەو لە ناوەندە نێودەوڵەتیەکان بەتایبەتی ئەمریکاو بەریتانیا ھەم ناسراوە ھەم پەیوەندی توندوتۆڵی ھەیەو ڕێزلێگیراویشە.
٥- بەرھەم ساڵح کەسێکی کاریزماییەو قسەکەرێکی چاکەو توانای داڕشتنی ئارگیومێنت‌و دەربڕینی بیرۆکەکانی زۆر لەسەرەوەیە.
بۆیە ھەنگاوی یەکەم بۆ ھەستانەوە پێکھێنانی حکومەتێکی نیشتیمانییە بە سەرۆکایەتی بەرھەم ساڵح بەبەشداری ھەموو لایەنە سەرەکییەکانی کوردستان بەمەرجێک ئەندامانی کابینەکەی لە گۆڕان ٢٥٪ و یەکێتیی ٢٥٪ و پارتی ٢٥٪ بەشێوەیەکی یەکسانانە پێکبێت. ئەو ٢٥٪ دیکەش بۆ ھەموو لایەنەکانی دیکە تەرخانبکرێت بەمەرجێک کە نەوەی نوێش پشکی بەرکەوێت.
واچاکە هیچ ئەندامێکی کابینەکە لە ئەندامانی ئەو نوخبە سیاسییە نەبن کە لە پێش شکستی ئۆکتۆبەر لە پۆستە باڵاکانی حکومەت‌و حیزب‌و پێشمەرگە بوون.
حکومەتە پێکهێنراوەکە ئەرکی بەڕیوەبردنی حکومەتی هەرێمی پێبسپێردرێت‌و پۆستی سەرۆکایەتی هەرێم هەڵبوەشێنرێتەوەو دەسەڵاتەکانی سەرۆکی هەرێم بە ئەنجومەنی وەزیران بسپێردرێت‌.
تەواوی بڕیارەکانی حکومەتی ڕزگاریی نیشتیمانی واچاکە بە زۆرینەی ڕەها دەربچێت، واتە ڕازیبوونی لانیکەم ٧٥% ئەندامانی ئەنجومەنی وەزیران. ئەمەش مسۆگەرکردنی بڕیاری دەستەجەمعیە لەم کاتەدا کە لە هەموو ئانوساتێک کوردستانیان پێویستیان بە کۆدەنگی‌و یەکڕیزییە.
حکومەتە پێکهێنراوەکە حکومەتێکی ڕاگوزەر بێت‌و مافی گفتوگۆکردنی لەگەڵ حکومەتی بەغدا لەسەر پرسە چارەنوسسازەکاندا نابێت هەبێت.
یەکێک لە ئەرکە هەرە سەرەکییەکانی حکومەتی ڕزگاریی نیشتیمانیی هەڵوەشاندنەوەی دەستەی بەڕێوەبەری کۆمسیۆنی باڵای هەڵبژاردنەکان بێت‌ لەگەڵ دانانی دەستەیەکی نوێ لە کەسانی پرفیشناڵ‌و بێ لایەن.
ئەرکێکی دیکەی سەرەکی حکومەتەکە ئامادەکارییە لەگەڵ ڕێکخستنی هەڵبژاردنێکی پاک‌و بێگەرد.
دوای هەڵبژاردنەکان حکومەتێکی نوێ لەسەر بنەمای کورسییەکانی پەرلەمان دادەمەزرێت‌ کە توانای گفتوگۆی لەگەڵ بەغدا هەبێت لەسەر پرسە چارەنوسسازەکان.

Previous
Next
Kurdish