Skip to Content

نا بۆ ستەمکاری بارزانی … دەبێت (نا)ش بێت بۆ ستەمکاری عەبادی … ئازاد ئارمان

نا بۆ ستەمکاری بارزانی … دەبێت (نا)ش بێت بۆ ستەمکاری عەبادی … ئازاد ئارمان

Closed
by تشرینی یه‌كه‌م 29, 2017 General

“ئەو گەلەی کە گەلانی تر دەچەوسێنێتەوە زنجیرەکانی دیلیەتی خۆی پتەوتر دەکاتەوە.”. کارل مارکس
ئەمرۆ نارەزایەتی لە سیستەم و دەسەڵاتی حکومەتی هەرێم ئەگەر چی تاوەکو ئێستا رێکخراو نییە، بەڵام لە ئاستێکی زۆر بەرزدایە و تورەیی جەماوەر رۆژ بە رۆژ لە هەڵکشاندایە. سەرئەنجام لایەنی کەم ئەم نارەزایەتیانە دەبێت شکست پێهێنان و هەڵوەشانەوەی حکومەتی هەرێم بەدواوە بێت. سەرەرای ئەم هەلومەرجە تازەیەش کە رووبەرووی خەڵکی کوردستان بۆتەوە لە لایەن رژێمی ستەمکاری مەزهەبی توندرەوی حکومەتی عێراقەوە. بە بەرچاوی هەموو دونیاوە بە لەشکرکێشی هێزەکانی سوپای عێراق، پۆلیسی فیدرالی و میلیشیایی حەشدی شەعبی شاری کەرکوک و بە گشتی نزیکەی سەدا پەنجای خاکی کوردستانیان بە پەلاماری درندانە داگیرکردەوە و حکومەتێکی نیزامییان لەم شوێنانەدا راگەیاندووە.

ئەوەی من لەم نووسینەدا دەمەوێت جەختی لە سەر بکەمەوە ئەوەیە بەشێک لە ئۆپۆزیسۆنی کوردستان و چاڵاکوانەکانیان لە ئەندام پەرلەمانیانەوە بگەرە تاوەکو چاودێری سیاسی یان چاڵاکوانەکانیان لە فەیسبووک و سۆسیال میدیاوە. دژایەتی و نارەزایەتیەکانیان لە بەرامبەر دەسەلاتی ستەمکارانەی حکومەتی هەرێم، وایان لێ دەکات بکەونە هەڵەیەکی مەترسیدارەوە و سیاسەتە مەزهەبی و شۆڤینیەکانی حکومەتی عێراق لە بەرامبەر خەڵکی کوردستان ئۆکەی بکەن بە جۆرێک لە جۆرەکان بکەونە بەرەی عەبادی و پێیان وابێ حکومەتی عەشدی شەعبی دەتوانێ داواکارییە رەوا و پەنگ خواردووەکانی ٢٦ ساڵەی ستەمکاری هەرێمیان بۆ جێ بەجێ دەکات. و لە هەرێمێکی خۆشگوزەران بەهرەمەند دەبین و پارەی دزراوی نەوت و غازەکانمان بۆ دەگەرێتەوە.

مەگەر نابێت لە خۆمان بپرسین ئایا ئێستا کرێکاران و خەڵکی رەنجدەر و زەحمەتێکێشی بەغداو بەسرا و نەجەف و کەربەلا ئاستی ژیان وگوزەرانیان لە ئێمە باشترە ئازادی و مافە مەدەنییەکانیان لە ئێمە بەرفراوان ترە؟ پەروەردە و تەندروستییان لە ئێمە باڵاترە؟ ئایا لەوێ حکومەتی هاوڵاتی بەرقەرارە؟ یان حکومەتی مەزهەبی و میلیشیایی؟

هەر کەسێک تۆزقالێک نیگەرانی هەیە و لای رۆشن نییە کارکردی ئەم هێزە مەزهەبییانە چییە و چ کارەساتێکن بۆ سەر کۆمەڵگا. دەتوانێ سەیری ئەزموونی حکومرانی ٣٨ ساڵەی کۆماری ئیسلامی ئێران بکات.
بۆیە پێویستە ئێمە لە دژی ستەمکاری بێینە مەیدان جا ئەم ستەمکارییە لە ژێر پەردەی نەتەوەپەرستی دا بێت یان لە ژێر فراوانکردنی دەسەلاتی مەزهەبی شیعەگەرایی دابێت. ئێمە نابێت باوەرمان بەم پەندە هەبێت کە دەڵێت ” دوژمنی، دوژمنەکەم دۆستمە” نابێت دژایەتی دەسەڵاتدارانی هەرێم وامان لێ بکات بە خێرهاتن لە دەوڵەتی عەبادی بکەین. کە روون وئاشکرا دیارە سیاسەتی حکومەتی حەشدی شەعبی، درێژکراوەی سیاسەتی پان ئیسلامیزمی کۆماری ئیسلامی ئێران و گەیشتنە بە هیلالی شیعی لە رۆژهەلاتی ناوەراستدا.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish