Skip to Content

نان … ستار ئه‌حمه‌د

نان … ستار ئه‌حمه‌د

Closed
by ئازار 27, 2018 General, Poems

له‌نان گه‌ڕام
به‌ر پێت كه‌وتم
بۆ شیر گریام
نه‌مزانی من فرۆشراوی
به‌های نه‌وتم
بێئاگا بووم
له‌شكۆتان
له‌كاریزمای ره‌گ و بۆن و
ئازایه‌تی نێو هه‌ولێرو
هه‌ڵاتنی نێو كه‌ركوكتان
په‌نجه‌كانم تاوانبارن
خۆیان شین ده‌كرد به‌بۆیه‌
ده‌نگی تۆیان بڵند ده‌فڕان
پێیه‌كانم به‌بڕین چێ‌
شیڕه‌ی شه‌به‌ق به‌په‌له‌ بوون
به‌ره‌و هۆڵی هه‌ڵبژلردن
بۆ ناو نووسین و
بۆ ده‌نگدان
خه‌تای من بوو
پێڵاوه‌كانی تۆم فێر كرد
چۆن پاشووی جه‌سته‌م رامووسێ‌
من بووم خوێنی خۆم پێت به‌خشی
هه‌تا دوژمن لێت بترسێ‌
تۆو میره‌كانتان چیتان كرد
بوونه‌ مۆری شه‌رمه‌زاری
بۆ سه‌راپای میلله‌تی كورد
له‌بیرته‌ به‌رامبه‌ر ناحه‌ز
چۆن هه‌ڵاتن
پێڵاوه‌كانت فڕێ‌ ده‌داو
ده‌رپێت له‌دوو به‌جێ ده‌ما
ئێوه‌ نه‌بوون
له‌ده‌رگه‌ی دزو جه‌رده‌دا
وه‌ك تیاتووره‌ كه‌وتنه‌ سه‌ما
رووتان ره‌ش بێت
له‌خۆ هه‌ڵده‌ن
گه‌ر هێنده‌ پیاوو بوێرن
له‌سه‌ر خاكی زه‌وت كراوتان
ئاڵای كوردستانتان هه‌ڵده‌ن
شه‌رمه‌زاربن
ئابڕوو له‌ئێوه‌ به‌ شه‌رمه‌
بۆ هاوخوێنتان رۆسته‌م زاڵن
له‌ئاست دوژمن ده‌بنه‌ نۆكه‌ر
ده‌كه‌ونه‌ مامه‌ حه‌مه‌

ستار ئه‌حمه‌د

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish