Skip to Content

لە سەهۆڵەکە دابەزین هەیە …. بەیان ئیبراهیم

لە سەهۆڵەکە دابەزین هەیە …. بەیان ئیبراهیم

Closed
by نیسان 1, 2018 General, Poems

لە سەهۆڵەکە دابەزین هەیە
لێرە دائەبەزم
دەمەوێ بۆن و بەرامەی سەھۆڵەكەو كۆڵانەكانی لاویم بكەم
تا بتوێمەوە و ببم بە ئاو
دائەبەزم بۆ ئەوەی ڕەنگم بگۆڕێ
پەمەیی ببم و بچمەوە سەر
ڕەنگی هەقیقی خۆم
لە پەنای دوا وێستگەی تەمەنم دابەزین هەیە
تا تێبگەم منی ژن کە پڕ بم لە جوانی
دڵێك پڕ بکەم لە ڕەنگ
………………………………

هاوڕێ دائەبەزم
تا بە گوڵاوەی شەقامەكە ئاشنا بم و
بە رەنگی باخچەكان مەست بم
تا دانە دانەی
ملوانکەی پچڕاوی تەمەنم کۆبکەمەوە
دائەبەزم چی تر ئەم پاسانە
توانای گەشتینی منیان نەماوە بۆ باخی گشتی
لێرە دائەبەزم
دانە دانەی هاوارەکانی سەر ئەم شەقامە کۆدەکەمەوە
جارێکی تر
لەسەر شوستەی ئەم شەقامە دەیانڕوێنمەوە
دائەبەزم …….منی ژن
لە دوا وێستگەی خاڵی لە ئازادی دائەبەزم
هەمو شەقامەکانی سلێمانی چەپک دەکەم
ئەیدەمە دەست ئەو مناڵانەی
کە مناڵیم دەبەنەوە گەڕەکەکانی چوارباخ
………………………………………

لە سەهۆڵەکە دابەزین هەیە
کە دابەزیم شۆستەیەک دەکەم بەهاوڕێم
بە چەخماخەی رەقیبان و لە بڵێسەی ئاگری نەورۆزدا پیاسەیەك بكەم
گریانەکانمی بۆ شی دەکەمەوە
دائەبەزم بە شار دەڵێم
بۆ منی ژن نەتوانم ژیان بكەمە گەردانەو
بەقەڵەمی سپی ڕۆحم
حیکایەتی عاشق بونم
لەسەر لاپەڕەی ڕەشی شەوانی سەهۆڵەکە بنوسمەوە
لێرە لەم شەقامە سەهۆڵیە
دائەبەزم
لەسەر میلی کاتژمێری قەدەرما دەتوێمەوە
…………………………………
لە سەهۆڵەکە دابەزین هەیە
تا بە تابلۆیەك پربم لە رەنگ
ببمە لەرە بۆ لقی شۆەربیەكان
شریتی تەمەنم دەبڕم
فڕێی ئەدەمە سەر ئەو کتێبانەی
کە تۆزیان لەسەر نیشتوەو ناخوێنرێنەوە
چاوم لێرە جێدەهێڵم
دڵیشم دەدەمە دەست فڕین
پێ یەکانم دەبەخشمە هیلاکی و
پەنجەکانم لێدەکەمەوە
بە ڕێگایەکدا هاتوم
پڕ بوە لە لاشەی ئازادی
ئەو ئازادییەی کە لە دەمی کڵۆم دراوی
ژنانی هاوڕێمەوە ڕژاون
……………………………..

هاوڕێ دائەبەزم
بە ئەسپایی دوا سڵاو
لە دوا وێستگەی دابەزین دەکەم
دەڕۆم و لەوێ لە بونێکی تردا
باخچەیەک لە هەناسە بۆ خۆم دروست دەکەم
داوای لێبوردن لە گەنم دەکەم و
ڕەنگم دەبەمەوە سەر گوڵێکی پەمەیی
بۆ ئەبەد گۆرانی عەشق دەڵێم و
دەچمە ناو دڵێکەوە
تا بمکات بە شاژنی کۆشکی باخچەیەک
باخچەیەک لە ڕاموسان و ماچ و عەشق
لە سەهۆڵەکە دابەزین هەیە
ئەمەش دوا دابەزینمە هاوڕێ .

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish