Skip to Content

له‌ نوێژی ئه‌م به‌یانییه‌مدا كه‌وتمه‌ ناو شكۆی ئاگر و ئاوی سرووش و به‌رزبوونه‌وه‌ … سه‌باح ڕه‌نجده‌ر

له‌ نوێژی ئه‌م به‌یانییه‌مدا كه‌وتمه‌ ناو شكۆی ئاگر و ئاوی سرووش و به‌رزبوونه‌وه‌ … سه‌باح ڕه‌نجده‌ر

Closed
by نیسان 1, 2018 General, Poems

ده‌می گۆزه‌ی پڕم شۆڕكرده‌وه‌ ناو زه‌ریا
زه‌ریا مه‌ی پێ خۆش نه‌كرا
گۆزه‌ و زه‌ریا ئێمه‌ پێكه‌وه‌ له‌به‌ر نازی نه‌رم و بۆنداری ئاشناییدا زۆر ڕۆیشتووین
من پیاوێكی بێ ڕێگام و پرچم هاتووه‌ته‌وه‌ سه‌ر ناوچه‌وانم
ده‌ڵێی له‌ ئاگره‌وه‌ هاتووم
خۆ بده‌نه‌ به‌ر گه‌رمایی ده‌مودووم
كتێبی حاڵم زۆر داوه‌ به‌ هاوه‌ڵانم بیخوێننه‌وه‌
له‌ یه‌كه‌م خه‌ڵوه‌تدام و سه‌رگه‌رمی ئه‌وه‌م شادبم به‌وه‌ی خۆشم ده‌وێ
خودای ناو ته‌ورات
خودای ناو ئینجیل
خودای ناو قورئان
ته‌ورات و ئینجیل و قورئان
داستانی خودایه‌كم بۆ ده‌گێڕنه‌وه‌ لاولاو به‌ په‌رژینی به‌رز بكه‌مه‌وه‌
سێبه‌ری پڕپڕه‌ له‌ دڵی ترساو
گه‌شه‌ی ڕۆح له‌ دوا خه‌ڵوه‌تدام و ئه‌م خۆشویستراوه‌م بۆ ورد ناكرێته‌وه‌
بولبولێك له‌ پاڵ گوڵێكدا دڕكی له‌ژێر پێیه‌كانی لاداوه‌
تاسه‌ی خۆی بۆ هه‌ڵده‌داته‌ ئاسمان و پێی ده‌ڵێت
تاسه‌ ساده‌یه‌ وه‌ك ده‌ستخستنه‌ سه‌ردڵی په‌یامبه‌رێك
په‌یامی وه‌رگرتبێ و له‌ چاوه‌ڕوانی ڕاگه‌یاندندا مابێته‌وه‌
یان بارینی ڕشێنه‌یه‌ك له‌ هه‌ورێكی ته‌نك و ڕووخۆشی یاڵی ئه‌سپ له‌ سه‌ما و بردنه‌وه‌ی پێشبڕكێدا
ئه‌رێ خودا له‌ شێوه‌ی چیدا ئاده‌می دروست كرد
چیشی به‌خۆی چواند و وه‌ك بۆنی خۆشیی خۆی هه‌ڵیدایه‌ ئاسمان
خۆر له‌ پشت سه‌رم ئاوابوو
به‌شێوه‌یه‌كی سه‌رسوڕهێنه‌ریش ڕۆژبه‌ڕۆژ كورتتر ده‌بێته‌وه‌
كه‌سێكی ته‌واو تووڕه‌ و ده‌م تاڵ و تفتبووش
له‌به‌ر ده‌رگای به‌هه‌شت یان دۆزه‌خ دوودڵ نه‌وه‌ستاوه‌
وه‌ك تیشكێك بكه‌وێته‌ ناو چرایه‌كه‌وه‌
یان وه‌ك به‌ردێك به‌رببێته‌وه‌ ناو گۆمێكه‌وه‌
گواره‌ی گوێی دره‌ختیش نه‌خشبه‌ند و بێپایان ده‌له‌رێته‌وه‌
مرۆڤ بێده‌نگ له‌ ئه‌ستێره‌ی دره‌وشاوه‌ ڕاده‌مێنێت و ده‌یه‌وێ شتێك بكا
به‌ڵام نازانێ چی بكات
ژیانی تاهه‌تایه‌شی نه‌دۆزییه‌وه‌
قۆزاخه‌یه‌كی خنكێنه‌ریش په‌پووله‌یه‌كی پاراو به‌ سه‌ما به‌سه‌ریدا نیشتووه‌ته‌وه‌
خودایه‌ مه‌مانده‌ره‌ ده‌ستی كه‌س و به‌زاری خۆت بانگمان بكه‌
دێمه‌ دیداری ئاشنا و له‌ دڵم ورد ده‌بێته‌وه‌
ڕێگا و ڕۆیشتن هه‌موو ئومێدیان تێدا كۆده‌بێته‌وه‌ و له‌ ساده‌یی تاسه‌دا خۆده‌دركێنن
ئاده‌م چووه‌ته‌ ناو كاته‌وه‌ به‌ گه‌رمایی پێگه‌یاندنی میوه‌دا دێت و ده‌چێت

Previous
Next
Kurdish