Skip to Content

56 Views

كێ دەتوانێت شکست بە سیاسەتی شەڕخوازی ئۆردوگان بێنێت..؟! … موزەفەر عەبدوڵا

كێ دەتوانێت شکست بە سیاسەتی شەڕخوازی ئۆردوگان بێنێت..؟! … موزەفەر عەبدوڵا

Be First!
by April 3, 2018 General
image_print

بەهۆی بەرگری قارەمانانەی خەڵکەوە دوای دوو مانگ لە شەڕو هێرشی ئاسمانیو زەمینیو بەکارهێنانی جۆرەها چەکی کوشندەو ئابڵوقەی ئابوری هەمەلایەنەو کوشتنو برینداربونو پەککەوتنو ئاوارە بونی سەدان هەزار کەس ئینجا سوپای داگیرکەری دەوڵەتی فاشی تورکیا بە سەرۆکایەتی ئۆردوگان توانی شاری عەفرین داگیر بکات .
دوای داگرتنی شارەکەش هێزی سەربازی تورکیاو هاوکارە داعشەکانی کەوتنە ئازارو ئەشکەنجەدانو دەسگیرکردنی ئەو خەڵکەی کە نەیانتوانیبو بڕۆن. ئەمە جگە لەوەی نەک ئازاری خەڵکیان دەدا بەڵکو ئازارو ئەشکەنجەی گیانلەبەرەکانیشیان دەدا لە پاڵ دزیو ڕاوڕوتو چەتەگەری یەکی کەم نمونە لە مێژودا. خۆ ئەگەر نمونەیەکی ئاوای تری تاوانی جەنگ هەبوبێت ئەوە هەر هی دەسەڵاتی خەلیفەکانی عوسمانیو باقی خەلیفەکانی پێشوتری ئیسلامی یەکان بوە تا دەگاتە خەلیفەکانی ڕاشیدی یەکانو جەنگو غەزاکانی سەردەمی محمد خۆی.
هەڵوێستی ڕیسواییو ڕیاکارانەش ،هاوکاتی ئەم کارەساتانە ، بێ دەنگە لێکردنی دەزگاکانی ڕاگەیاندنی جیهانو دەوڵەتەکان بون لەسەرو هەمویانەوە ئەمریکاو ئەوروپا کە خۆیان بە هاوپەیمانی خەڵکی ئەو ناوچانەو یەپەگە دادەنا.

تەنانەت سەرکردەکانو ڕاگەیاندەکانی یەپەگەش کە ڕۆڵی ڕابەریان هەبو لەم جەنگی بەرگری یە کەچی چاوێکیان هەر لە هاوکاری و پشتیوانی تەواوی ئەمریکاو هاوپەیمانەکانی بوون بۆ شکست پێهێنانی ئۆردوگانو پێیان وابو شەری عەفرینیش هەر شەری کوبانی یە. وە بە جۆرێکیش ڕای گشتیشیان توشی خۆش خەیاڵی کردبو.
بەڵام ئەوەی روویدا نەک هەر هاوکاریو پشتگیری ئەو دەوڵەتانە بە گەورەو بچوکیانەوە نەبون بەڵکو بەم بێدەنگی یەیان لە ئاستی میدیاکانیانو ڕای سیاسیو فەرمیان بە جۆریک لە جۆرەکان پشتیوانی ئوردوگانو سیاسەتە شەڕخوازی یەکانی بوون.
ئێستاش کە ئوردوگانو هاوبەرژوەندەکانی وەک ڕوسیاو ڕژێمی ئیسلامی و ڕژیمی ئەسەدیش کە هاوکاری ئەم شەڕو هیڕشو داگیرکاری یە بوون ،ئەوەش بەپێی ڕێکەوتنێک کە لە نیوەی مانگی جەنیوەری لە سوتشی مۆریان کردبو، بە نیازە نەخشەو پلانو گۆڕەپانی شەڕەکەی فراوانتر بکاتەوە .وە بە پێی لێدوانەکانیان هەوڵ دەدەن بە داگیرکردنی چەند شارو ناوچەی تری سوریا کە لەبەردەست هێزەکانی یەپەگەدان هەتا دەگاتە زۆر ناوچەو شاری تری کوردستانی عێراقیش لەوانە شەنگاڵو ئەو ناوچانەی کە ژێر دەستی هێزی چەکداری پەکەکەدان تا دەگاتە قەندیل.

هەمو ئەم ڕوداوانە لە چەند ڕۆژو هەفتەی ڕابردودا بۆتە هەواڵی گەرمو جێگای پرسوڕای گشتی بە تایبەتی لە لە ماسمیدیاکاندا گرینگ ترینو بەرچاوترین پرسیاریش کە دەکرێت لەمبارەیەوە ئەوەیە ئاخۆ کێ دەتوانیت شکست بەم سیاسەتی شەڕخوازی یەی ئۆردوگانی فاشی بێنێت؟
جا بەو ڕادەیەی ئەمە بۆتە پرسیاری سەرەکی ،هاوکاتیش بە جۆریک هەم ڕاو چاوەروانی زۆرێک لە سەرکردەکانی خودی یەپەگەو ، بە تایبەت ڕۆشنبیرو نوسەرو لایەنگرنیان لە دەرەوە ، وا پڕوپاگەندەیان دەکردو دەکەن ،کە تەنها ئەمریکاو هاوپەیمانەکانی کە دۆستی کوردن ، دەتوانن شکست بەم سیاسەتی شەڕخوازانەیەی ئۆردوگان بێنن ، ئێمەش وا پێویستە دەکات لە گۆشەنیگای خۆمانەوە بە تیشک خستنە سەر دووخاڵ وەڵامی ئەم پرسیارە بدەینەوەو تا بزانین ئاخۆ کێ دەتوانێت شکست بەم سیاسەتی شەرخوازی یەی ئۆردوگان بێنێت …؟!بەڵام بەر لە روونکردنەوەی ئەو خالانە وا پێویستە دەکات یەک ڕاستی ڕەهاو ڕاشکاو بڵێین بۆ پوچەڵکردنەوەی ئەو ڕاوبوچونو هەڵوێستەی کە پێی وایە ئەمریکاو هاوپەیمانەکانی دۆستی کوردنو دەیانەوێت و دەتوانن شکست بە سیاسەتی شەڕخوازانەی ئۆردوگان بێنن لە دژی خەڵکی کوردستان . ئەو راستی یەش ئەوەیە کە ئەمریکاو هاوپەیمانەکانی بە درێژایی مێژووی سەد ساڵی ڕابردوو تا ئێستا نەك هەر دۆستو پشتیوانی خەڵکی کوردستانو کێشەو مافەکانی نە بونە بە ڕاستی بەڵکو زۆربەی کات هاوپەیمانی ڕژێمە فاشی یەکانی ئەو ووڵاتانەش بونە ، خۆ ئەگەر دۆستو پشتیوانی حزبە قەومییە عەشیرەتییە دەسەڵاتدارەکانی هەرێمی کوردستان بونە ئەوەش لە ڕوانگەی بەرژەوەندی یە سیاسی یەکانی خۆیانەوەو پاشکۆبونی تەواوی بی قەدیو شەرتی ئەم حزبانەوە بووە بۆیان.

ئەوان بە ڕاشکاوی ڕایان گەیاندەوە کە هیچ کات لایەنگری بە کردەوەی مافی خەڵکی کوردستان نین بۆ بڕیاردان لەسەر مافی چارەنوسی خۆیان لەهیچ یەکێک لەو ووڵاتانە.ئەوپەڕەکەی لایەنگری هەندێک مافی سەرەتایی وەک خودموختاری یا فیدرالین .وە هەر کاتێک کار گەیشتبێتە سەر مافی دەنگدانو جیابونەوە ئەوە نەک هەر لەگەڵی نەبونە بەڵکو هاوکاری ڕژێمە سەرکوتگەرەکانیشیان کردوە بۆ سەرکوتی خەڵکی کوردستان.

دەیان جار ئەمە مێژوو سەلماندویتی هەر لەم نیو سەدەیەدا کە ئازاری ١٩٧٥و ئاشبەتاڵی جولانەوە چەکداری یەکەی بارزانی باوک بوو تا ئیستا کە داگیرکردنی عەفرینە.
ئەمریکا بە ئاشکرا دەڵێت ئێمە تا ئەو جێگایە پشتیوانی کوردین کە لە بەرژەوەندی سیاسەتو ستراتیژەکانیان بێت. وە دەڵین کوردەکان چونکە شەڕکەری باشن تا ئەو جێگایەی لە بەرژوەندی ئەمریکا بن ئەوە هاوکاریان دەکەن لەوە زیاتر هاوکاری ناکەن.ئەمە هەمو پشتیوانی ئەمریکایە بۆ کوردەکان بە ووتەی خۆیان جا ئاو بێننو دەستتان بشۆن.

بەڵام با بزانین لەهەمو ئەو کارەساتانەی کە بەسەر خەڵکی کورددستاندا هاتوە کی بە جدیو ڕونو ڕاشکاوی هەڵوێستی بە کردەوە وەردەگرێت و دێتە سەرشەقامەکانو پشتیوانی هەمەلایەنەیانە..؟!.پێم وایە ئەم جارە بۆ پشتیوانی لە خەڵکی کوبانی و عەفرین و بەرگری خۆراگرانەیان لەهەمو کاتێک باشترو زیندوتر دەرکەوت ئەم راستی یە دەرکەوت.
جا خاڵی یەکەم لە وەڵامی پرسیارەکە کە كێ دەتوانێت شکست بە سیاسەتی شەرخوازی بێنێت ئەوەیەکە ئەوە بەرەی چەپو سۆسیالسیتیو کۆمۆنستیو کرێکاریە لە سەر ئاستی ناوخۆو دەرەوەی تورکیا دەتوانێت هەم پشتیوانی مافەکانی خەڵکی کوردستان بێت تا رادەی جیابونەوەو پیكهینانی دەولەتی سەربەخۆو هەم دەتوانێت ببێتە مایەی شکست بۆ سیاسەتەکانی ئوردوگان .
جا با زیاتر ئەم خاڵانە روونکەینەوە.
ڕابەرانو کەسایەتیو ڕەوتو حزبەکانی ناو ئەم بەرە کۆمەڵایەتی و سیاسی یە لەسەراسەری وڵاتانی جیهان نەک هەر بۆ پشتیوانی لە خەڵکی ئەو ناوچانەو ئیدارەیەکانو یاساو بڕیارەکانیان و لە دژی هێرشی داعشو هاوکەرەکانیان ، بە تایبەتی ئۆردوگانو دەسەڵاتەکەی ، ڕژانە شەقامەوە بەڵکو بەناردنی کۆمەکی هەمەلایەنەی مادیو مەعنەوی ، تەنانەت پەیوەست بونی سەدان کەس لە ووڵاتانی جیاجیا ، بە تایبەتی لە ناو ڕیزەکانی حزبە چەپوکونیستەکانی تورکیا ،نیشانیاندا کە ئەوانن پشتیوانو هاوکاری خەڵکی کوردستانو کێشە ڕەواکەی .

هەر کەسێک یەک جار بەشداری ئەو ناڕەزایەتی یانەی کردبێت لەهەر ووڵاتو شارێک کە بۆ خەڵکی کوبانی و عەفرین کراوە ، یاخود تەماشای وێنەو ڤیدیوکانی کردبێت ، بۆی دەرکەوێت ئەوە هێزە چەپو کۆمۆنیستو کرێکاری یەکانە بە کردەوە پشتیوانو هاوکاری خەڵکی کوردستانن نەک دەوڵەتو ڕژێمە سەرمایەداری و حزبە بورژوازی یەکانیان.
بێگومان ئەمانە هەموی هەنگاوی گەورەو باشن بۆ پشتیوانی خەڵکی کوردستانو دژی سیاسەتی شەڕخوازانەی ئوردوگان .وە دەکرێت ئەم نارەزایەتی یانە لە دژی ئوردوگان تا رادەی داخستنی سەفارەتەکانی و دامەزراوەکانی سەر بە دەووڵەتی تورکیا بچیتە سەرو ببیتە فشاری گەورە بۆ سەریان لە دەرەوەی توکیا. بەڵام ئەمانە بە تەنها نابنە هۆکارێکی گەورەو ڕاستەوخۆ بۆ شکست پێهینانی سیاسەتی شەڕخوازانەی ئۆردوگان نەخێر هەرگیز.ئەمانە دەکرێت فاکتەری فشارو ڕیسواگەری سیاسەتی شەڕخوازانە بن.وە کارو هەڵوێستێکی باشە بەڵام لەم نیوەدا ڕۆڵی سەرەکی دەگەڕێتەوە بۆ هاتنە مەیدانی جەماوەری ئازادیخوازی ملیۆنی تورکیا خۆی. ئەگەر ئەم جەماوەرە ڕاستەو خۆ لە دژی دەسەڵاتی ملهوڕو سیاسەتی شەڕخوازانەی ئۆردوگانو حزبو دەسەڵاتەی بێتە مەیدان ، هەروەک لە خۆپیشاندانی دە ملیونی شاری ئەستەمبول ٣ ساڵ لەمەوبەر بینیمان ئەوە نە هەر شکست بە سیاسەتی شەڕخوازانە دێنن بەڵکو پاشەکشەی گەورەی پێ دەکەن لە زۆر بوارەوە.تەنانەت ڕوخانی دەسەلاتەکەی لە هاتنە مەیدانی شۆرشگیرانەیان .

بەڵام ئەوەی بۆ ئەو جەماوەرە تا ئێستا نەهاتونەتە مەیدان ، هەرچەند جار جار لێرەو لەوێ لە دژی شەڕو زۆرێک لە سیاسەتو کردەوەکانی تری ئوردوگانو دەسەڵاتەکەی ناڕەزایەتی یان دەربڕیوە ، بەڵام نەبوتە جولانەوەیەکی بەرینی کۆمەڵایەتیو سیاسی ،هۆکاری ئەمە زۆرن بەڵام دەکرێت بە کورتی ئاماژە چەند خاڵێك بدەین کە گرفتی گەورەن لە بەردەم بەرەی ئازادیخوازی تا نەبێتە جوڵانەوەیەکی گەورە.

یەکێک لەو خاڵانە پەیرەو کردنی ئۆردۆگانە بۆ ئەم سیاستی شەڕخوازیەو زاڵکردنی فەزای شەڕ لە ئاستی کۆمەڵگادا لە ڕووی سیاسی وکۆمەڵایەتی و سەربازی و دەروونییەوە بۆ سەرکوتکردنی هەر ناڕەزایەتی یەکی جەماوەری کە لە ناو تورکیا خەڵک بۆ خواستەکانیان دەریدەبڕن.
لەمبارەیەوە هەر کەسێک پێی وابێت ئۆردوگانو حزبو دەسەڵاتەکەیو سەرجەم چینی بۆرژوازی تورکیا بە تایبەتی لەم چەند ساڵەدا ئەم سیاسەتی شەڕخوازی یەی لە پێناوی هەمو خەڵکی تورکیاو بەهۆی پەرەسەندنی باری ئابوری و جێگیری دەسەڵاتەکەیو ، یەک دەست بونی چینی بۆرژوازی تورکیاوەیە، ئەوە لێکدانەوەکەی زۆر هەڵەیەو بە جۆرێک ڕەوایەتی یە بەم سیاسەتانە چونکە مەبدەئیەن شەڕ هیچ کات لە قازانجی جەماوەری ستەمدیدە نی یە.

بەڕای من تورکیا لەهەمو ڕویەکەوە لەسەر قەیرانێکی ئابوریو سیاسیو کۆمەڵایەتیو سەربازیو ،تەنانەت کەلتوری ،گەورەو پڕ ئاڵۆگۆڕی بۆ دواوە گەرانەوە ڕاوەستاوە.بەڕێخستنی ئەم شەڕانە بۆ ڕێگا گرتنە لەسەر ئەو فشارە گەورەیەی وەک هەڵم کە لە ژێرەوە دێت تا ئەو سەرقاپی مەنجەڵەکە فڕێ بدات.
هەر کەسێک لەم دە پانزە ساڵەی دەسەڵاتی ئۆردوگانو حزبەکەی لە فو دەورانو هەڵبەز دابەزەکانی ورد بێتەوە کە چۆن دەسەڵاتی وەرگرتوەو پێگەکەی لە ئاستی ناوخۆ و دەرەوە چۆنە بۆی ڕون دەبێتەوە کە ئەم سیاسەتی شەڕخوازیەو پەلهاویشتنی بۆ ناوچەی نفوز لە دەرەوەی قەڵەمڕەوی ناوخۆیی هەموی بۆ خاو کردنەوەی بارە نالەبارە ئابوری و سیاسی و کۆمەڵایەتی یە ناوخویی یەکەتی.
مەگەر دەسەڵاتێک ڕێژەی بێکاری نزیک بوبێتەوە بە لەسەدا بیستو هیچ بیمەیەکی کۆمەڵایەتییش نەبێت ، هەروەها ڕێژەی هەژاری زۆر لەسەرەوە بێت ئاخۆ وەزعی لەبارە..؟یاخود نزیک بە یەک ملیون کەس لە گەورە ئەفسەرو سیاسەتمەدارو ڕۆژنامەنوسو نوسەرو هونەرمەندو..هتد لە زینداندا بێت و ئەشکەنجە بدرێن ئەوە ئەو دەسەڵاتە لە دۆخێکی لەبارو جێگر دایە…؟! نەخێر هەرگیز.

بۆیە بۆ داپۆشینی سەرقاپی هەمو ئەم فشاری هەڵمە ناوخۆیی یە ئەم دەسەڵاتە پێویستی بە گەورە کردنەوەی نەیارەکانێتی تا هەمو چینی بۆرژوازی و باڵو حزبەکانیو، تەنانەت وردو بۆرژواو حزبەکانی، بێنێتە پشتی سیاستەکانێوە. وە بە شێوەیەکی گشتیش ئەم نەیارەیان لە پەکەکەدا بەرجەستە کردۆتەوە کە دەرهاویشتەی ناوەڕۆکی پێکهاتنی دەوڵەتە قەومییە نەژادپەرستی یەکەیانە.ئەمە جگە لەوەی بە بەهانەی هاوکاری پەکەکەوە لە ئاستی دەرەوەش دەوڵەتانی وەک سوریاو ئیرانو عیراق بە گشتی تۆمەتبار دەکەن.بە تایبەتی ناسیونالیزمی عەرەب کە ئەم چەند ساڵە لە حزبی بەعسو دەوڵەتی سوریاو شەخسیەتی ئەسەدا بەرجەستە بۆتەوە.

جا ئەم ململانێی و دژایەتیەی کە هەیە لە نێوان ئەم دوو جوڵانەوەو دەوڵەتو ڕژێمە ناسیونال ئیسلامی یەی ئۆردوگانو ئەسەد هەرچەندە خاڵی هاوبەشی زۆرییان هەیە بەڵام ناکۆکی گەورەشیان هەیە کەلێرەدا جێگای نی یە بچینە سەر ڕونکردنەوەی بە درێژی . چونکە ئەمە لە ڕووی مێژویی یەوە پەیوەستە بە سەرهەڵدانو گەشەو بە دەسەڵات گەییشتنی هەر یەک لەو دوو جوڵانەوەی ناسیونالیستیە تورکیو عەرەبیە.وە هاوکات جوڵانەوەی ئیسلامی سیاسی کە ئۆردوگانو حزبو دەسەڵاتەکەی لەمڕۆدا هەڵگری ئاواتو مەبەستە ئابوریو سیاسیو کۆمەڵایەتیو، تەنانەت کەلتوری یەکانی هەردو ئەو جولانەوەیەیە. ئەویش لە ڕێگای بەدی هێنانی یەک سیستەمی فکری ،سیاسیو سەربازیو کەلتوری ئیمپراتۆری ئیسلامیو، زیندوکردنەوەی خەلافەتی ئیسلامی وەک سەرخانێکی پێویست بۆ پاراستنی ئابوری سەرمایەو قازانجو سود لە سەپاندنی هەلومەرجێکی جێگیرو بێ ڕکابەر نەک هەر لە ئاستی تورکیادا بەڵکو لە ئاستی ناوچەکەداو تەنانەت جیهانیشدا.لێدوانەکانی ئوردوگان لەمڕۆژانەدا بۆ پێکهێنانی هیزێکی سەربازی گەورەی نیو دەوڵەتی ئیسلامی ئەگەر بە قسەش بێت پرسێکە بە شوێن ئەو ئامانجەدا.
ئەمە جگە لەوەی هەر کەسێک سەرنجی گەمەکانی ئۆردوگان بدات لەسەر ئاستی ناوخۆو ناوچەکەو جیهان، بە تایبەتی لە نێوان دوبەرەی زلهێزی جیهانی ئەمریکاو ڕوسیا ئەوە دوبارە ئەوە بەدی دەکات کە بە دوای چ پیگەیەکەوەیە.

جا بۆ شکست پێهێنانی هەمو سیاسەتەکانی ، بە تایبەتی سیاسەتی شەڕخوازییەکەی ،کە بەشێکە لەسەرجەم سیاسەتو ستراتیژی، ئەوەی دەتوانێت بەم ڕۆڵە هەستێت ئەوە هێزی ملێونی چینی کرێکارو جەماوەری ستەمدیدەو ببەشو هەژاری تورکیایە.وە پێویستە بەرەی ئازادیخوازیو یەکسانیخوازی لەنای خەڵکی کوردستانی تورکیاش ببنە هاوپەیمانو هاوکاری ئەم بەرە کۆمەڵایەتی و سیاسی یە. وە لێرەشەوە کێشەو پرسو مافەکانی خەڵکی کوردستان لە دروشمو خواستی مافی دەنگدانی گشتی بۆ دیاری کردنی مافی چارەنوسی – لەگەڵ سەرنجیشمان لەم دروشمە لەم سەردەمەدا – بەرزکەنەوەو پشتیوانی ئەم بەرە چەپو یەکسانیخوازی یە لە ئاستی ناوخۆو دەرەوە بەدەست بێنن.
دیارە ئەوە هەنگاوێکی باشو لەبارە کە باڵە ناوخۆیی یەکانی پەکەکە، کە پارتی دیموکراتی گەلانە ،بە سەرۆکایەتی دەمیرتاشو هەڤالەکانی ، لەم چەند ساڵە ئەم تاکتیکەی پەیرەو کردوە سەرەڕای ئاسۆو ئامانجە ناسیونالیستی یەکانی، توانیوێتی بەم تاکتیکەش بەشێک لە بەرەی چەپو ئازادیخوازی بکاتە هاوپەیمانی خۆی . بەڵام هەر ئەمە کافی نی یە. هاوکات لە ڕاستیدا ئەم پارتەش هەرگیز ناتوانێت ئەم تاکتیکە بگۆڕێت بۆ ستراتیژیکو هەروەها وەرچەرخانی ئاسۆو ئامانجی کۆتایی .بێگومان ئەمەش بە حوکمی ناوەڕکۆو پێگە چینایەتی یە ئابوری و کۆمەڵایەتی یە وردە بۆرژوازی یەکەیان.

لە ڕویەکی تریشەوە هۆکارێکی تر لەم نەکەوتنەیان زیاتر بە لای چەپدا خۆی لە نەبونی یەک حزبی کۆمۆنسیتی بەهێزی کرێکاری بۆ سەرجەم جولانەوەی نارەزایەتی یەکانی جەماوەر لە تورکیادا دەبینێتەوە.بەڵام لەگەڵ هەمو ئەم گرفتو لاوازیانەش هێشتا کۆمەڵگای تورکیا لەناو هەمو ووڵاتانی خۆرهەڵاتی ناوەڕاست زووترو زیاتر چاوەڕیی ئاڵوگۆڕو وەرچەرخانی بەلای چەپدا لێ دەکرێت. سەڕەرای گیان سەختی بۆرژوا ناسیونالیزمی تورک بە تایبەتی باڵە ئیسلامی یە سیاسی یەکەی کە خەونی سوڵتانیو دامەزراندنی خەلافەی داعشی ئیسلامی هەیە.

جا ئەگەر لە کۆتاییدا پرسیارەکە دوبارە کەینەوە کە کێ دەتوانێت شکست بە سیاستی شەڕخوازانەی ئۆردوگانو دەسەڵاتەکەی بێنێت دەبێت دوای ئەم ڕونکردنەوانە بڵێین کە تەنها بە هاتنە مەیدانی بەرەی ئازادیخوازی و یەکسانیخوازی، کە لێدانی دڵی لە جوڵاەوەی کرێکاریو شوسیالستی کۆمەڵگای تورکیادایە دەتوانێت شکستی پیبێنێت. وە پێویستە هەر جولانەوەیەکیش کە خوازیاری کۆتایی هینان بە ستەمی قەموی یە لەسەر خەڵکی کوردستان هاوپەیمانو هاوکارو هاو ئاسۆو ئامانجی ئەو جوڵانەوە سەراسەری یە بێت.بە بێ ئەمە پرسو کێشەو ستەمی قەومی سەر خەڵکی کوردستان تا سەد ساڵیش تریش چارەسەر نابێت.وە دەبێتە گەمەی دەستی دەوڵەتە زلهێزە ئیمپریالی یەکان بۆ ئامانجەکانی خۆیان کارەسات بە دوای کارەسات دەخوڵقێنن .

٣٠-٣-٢٠١٨

Previous
Next

Leave a Reply