Skip to Content

مەشعەل بە نوێنەرایەتی كێ دەسخۆشانەی داگیرکردنی عەفرین لە ئوردوگان دەکات؟! … موزەفەر عەبدوڵا

مەشعەل بە نوێنەرایەتی كێ دەسخۆشانەی داگیرکردنی عەفرین لە ئوردوگان دەکات؟! … موزەفەر عەبدوڵا

Closed
by نیسان 5, 2018 General

خالید مەشعەل ، ڕابەری پێشوی جوڵانەوەی ئیسلامی حەماسی فەلەستینی (حەماس) ،کە تاقمێکی کۆنەپەرستو تیرۆیستی ئیسلامی هاوشێوەکانی کوردستانە ، لەمڕۆژانە لە بۆنەیەکدا دەسخۆشانەی لە ئۆردوگان کردەوە بۆ داگیرکردنی شاری عفرینو کوشتوبڕی خەڵکەکەیو فەرهود کردنی سەروماڵیان.
ئەم هەواڵەش بۆتە جێگای پرسوڕاو هەڵوێستگیری بەرچاوی زۆر کەس کە لە دەزگاکانی ڕاگەیاندنوتۆڕەکۆمەڵایەتی یەکاندا ڕەنگی داوەتەوە. بە تایبەتی بۆتە بەهانەیەک بۆ تەقینەوەی بورکانی ڕقو قینەی قەومی زۆرێک لە ڕۆشنبیرو نوسەرو سیاسەتەمەدارە ناسیونالیستەکان لە دژی هەمو خەڵکی فەلەستین، وەک ئەوەی مەشعەل نوێنەری هەمو ئەو خەڵکە بێت.

جا بۆ نادروستی نیشاندانو دژی ئینسانی بونی ئەو ڕابوچونو هەڵویستەش دەکرێت بەهەمان شێوە بپرسین کە ئاخۆ تاقمە ئیسلامی یەکانی کوردستان هەمویان ،بە تایبەتی یەکگرتو کۆمەڵی ئیسلامی کە پاڵپشتی ئوردوگانو دەسەڵاتەکەین، تەنانەت دۆستی حەماسیشن ، نوێنەرایەتی هەمو خەڵکی کوردستان دەکەن لەم سیاسەتو هەڵویستانەیان؟!

بە ڕای من ئەمانەی کوردستان نەک هەر نوێنەرایەتی زۆرایەتی خەڵکی کوردستان ناکەن تەنانەت ئەوانەش کە خۆیان بە موسلمان دەزاننو پەیرەوی هەمان ئاینی ئەو تاقمە ئیسلامی یانە دەکەن نوێنەرایەتی زۆرێک لەوانەش ناکەن. بێگومانە هەزاران کەسی ئاسایی سیاسی و نا سیاسی خۆیان بە موسلمان دەزانن وەک کەلتورو نەریتیکی سەپیندراو بەسەریاندا بەڵام لە ڕویی سیاسی یەوەو بە کردەوە دژی هەمو ئەم تاقمە ئیسلامیانەن.ئەوە ڕاستە هەمو رژێمو تاقمە ئیسلامی یەکان لە ڕووی فکری و سیاسی یەوە نوێنەرایەتی ناوەرۆکی ئیسلام دەکەن بەڵام ئەوەش راستە کە زۆرایەتی ئەوانەی خۆیان بە موسڵمان دەزانن پەیرەویەکی زۆر زۆر کەمی ناوەڕۆکی ئیسلام دەکەن وەکو دەستورو یاساو ڕێساو نەریتێک بۆ ژیان. شێوە ژیانی هاوچەرخانەی زۆربەی ئەوانەی خۆیان بە موسڵمانان دادەنێنن پێچەوانەی ناوەرۆکی دەقەکانی قورئانو شەریعەیی ئیسلامە . بە ووتەی هەمو مەلاو ئیسلامی یەکان بەشی زۆری خەڵک هیچ لە ئیسلام نازانن تەنها ئەو کاتە ئیسلامو خوداو پێغەمبەریان کەمێک دێتەوە یاد کە بە ناچاریو بەزۆر ڕودەکەنە مزگەوتو دوو سەرماوقولات لێدەدەن بەناوی نوێژەوە.

تەنانەت ئەم ڕاوبۆچونە بۆ حزبە قەومی یەکانیش وایە. بە دەیان هەزار کوردزمان، تەنانەت ناسیونالیستن لە ڕووی سیاسی و فکری یەوە بەڵام پارتیو بارزانی ، یاخود یەکێتی و تاڵەبانی، بە نوێنەری خۆیان نازانن . هەرچەندە ئەو حزبانە لە زۆر ڕوەوە بەرگری لە ئاسۆو ئامانجی ناسیونالسیتی ئەوانیش دەکات.
بۆیە ئەم هەڵویستە بۆ مەشعەلو حەماسیش هەر وایە.نابێت و هەڵەیە بەبەهانەی ئەم ڕاوهەڵوێستە فکری و سیاسی یەی مەشعەلی تاوانبار هێرش بەریتە سەر هەمو خەڵکی فەلەستینو عەرەبزمان. یاخود نوکولی لەو کێشەو ستەمی قەومی یە بکەیت کە دەیان ساڵە لەسەر ئەو خەڵکەیە. یاخود دەسخۆشانی سیاسەتەکانی دەوڵەتی رەگەزپەرستی ئیسرائیل بکەیت کە لە دژی ئەو خەڵکە پەیڕەوی دەکات.

ڕاستی یەک هەیە ئەویش ئەوەیە لەو کاتەوەی دەوڵەتی ئیسرائیل بە هاوکاری دەوڵەتە ئیمپریالیستەکان لەسەر بنەمایەکی قەومی و دینی پێکهاتوە کێشەو پرسو ستەمی قەومیش لەسەر خەڵکی فەلەستینیش سەریهەڵداوە. هەر وەک چۆن کێشەو پرسو ستەمی قەومی دەیان ساڵە لەسەر خەڵکی کوردستان هەیە لەوەتەی ئەم دەوڵەتە قەومی یانە لە عێراق سوریاو تورکیاو ئێران پێهکهاتون.لەسەر ئەم بنەمایەش دەیان ساڵە کارەسات قەوماوە.

کەسانێک ئەم ڕاستی یانە نەزانیتو کوێرانە بە یەکسانی هێرش بەرێتە سەر مەشعلو حەماس لەگەڵ هەمو خەڵکی فەلەستین ئەوە وەک ئەوە وایە کە مەشعەلو حەماس بە نوێنەری هەمو خەڵکی فەلەستین بزانێت وبناسێت.ئەمەش هەر وەک ئەوە وایە کە یەکگرتو کۆمەڵ بە نوێنەری هەمو خەڵکی کوردستان بزانیت کە بەهەمان شێوە پشتیوانی لە کارو سیاسەتەکانی ئوردوگانی فاشی دەکات .

ئەوانەی ئەم ڕاوبوچۆنو هەڵوێستەیان هەیە یان لە ناڕۆشنییانەوەیە یان لە نەزعەی سیاسی شۆڤێنیستی قەومی یەوەیە.
لە واقعدا مەشعەلو حەماس نەک هەر نوینەرایەتی زۆرایەتی خەڵکی فەلەستین و کێشە ڕەواکەی ناکەن بەڵکو عەباسو فەتحیش بەهەمان شێوە نوێنەرایەتی زۆرایەتی خەڵکی فەلەستینو تەنانەت کێشەکەشی ناکەن .

هەمو لایەک لەسەر هەقە کە ئیدانەی سیاسەتی شەرخوازانەو سەرجەم سیاستەکانی ئوردوگانی قەومی و ئیسلامی و، تەنانەت دەوڵەتی تورکیاش بکات ،کە لەسەر بنەمایەکی قەومی دامەزراوە.هاوکات پێویستە ئیدانەی ڕاوهەڵوێستی مەشعەلو هەمو سیاسەتو کردەوەکانی حەماسیش بکرێت. بەڵام هەڵەیەکی گەورەیە ئەمانە بکەین بە بەهانە بۆ هێرش بردنە سەر خەڵکی فەلەستینو کێشە ڕەواکەی.

ئەگەر کەسانێک بە فرمێسکە تیمساحی یەکەی نەتەنیاهو خۆشخەیاڵ دەبێت کە بۆ کوژرانی مناڵانی کوردستان دەیڕێژێت یاخود بە بزەو خەندەکەی بۆ دەوڵەتی کوردی دەیکات ئەوە یان لە ناڕۆشنیو خۆشخەیاڵیانەوەیە یاخود لە بونی نەزعەی شۆڤینیانەوەیە.
بە ڕاستی دەوڵەتی تورکیاو ئوردوگان هەروەک دەوڵەتی ئیسرائیلو نەتەنیاهو کە هەردولایان خاوەنی سیاسەتی سەرکوتگەرانەو ڕەگەزپەرستانەن بەرامبەر بە خەڵکی ناوخۆی ژێر دەسەڵاتەکەی خۆیان ئەوە هەرگیز ناتوانن ببنە ڕزگارکەری خەڵکانی دەرەوەی دەسەڵاتو دەوڵەتەکانیان.

بۆیە هەر کەسێک لە ڕوانگەیەکی سیاسی چینایەتییەوە لەم ڕواداوانە بڕوانێت ئەوە پیویستە پەری بەم ڕاستیانە بەرێت .لەسەر ئەم بنەمایانەشە کە مەشعەلو حەماس نوێنەرایەتی هەمو خەڵکی فەلەستین و کێشە ڕەواکەیان ناکەن. بەڵکو بە نوێنەرایەتی هەمو ئەو دەسەڵاتو جوڵانەوەو تاقمە ئیسلامی یانەی هاوشێوەی خۆیان دەسخۆشانە لە ئۆردوگان دەکەن بۆ داگیرکردنی عفرین کە تاقمە ئیسلامی یەکانی کوردستانیش دەگرێتەوە .

٣-٤-٢٠١٨
موزەفەر عەبدوڵا

Previous
Next
Kurdish