خیانەتم لێ بکە!… هیوا سەعید
لەو شاعیرە لاوازانە نیم
بڵێم خۆشەویستەکەم بێ وەفا بوو، بە تەنیا بەجێیهێشتم.
تۆ هیچ کات خۆشەویستم نەبوی،
خۆم بە قوربانت دەکرد، چێژم لەو بچوکییەی خۆم دەبینی!
نیەتم ئەوەبوو بەو ڕێیە داگیرت بکەم و
ئارەزوەکانم بەسەرتدا تاقیبکەمەوە.
سەیری ئەو دوڕوییەی من بکە
دەمویست بە نوشتانەوە بگەمە خۆشی
تەماشا عاشق و خواپەرست هەر یەک کەسن!
وەفا زیندانە،
بەو خیانەتە کەلەپچەی دەست و پێت کردەوە،
دەرونی خۆت واڵا کرد.
تەماشا مەعشوق و کۆیلە هەر یەک کەسن!
نە دەمەوێ بە چیرۆکی تەنیا مانەوەم
گەمە لەگەڵ سۆزی کەس بکەم،
نە ڕێ بە کەسیش دەدەم بەزەیی پێمدا بێتەوە.
ئەوە بە گەورەترین سوکایەتی بە خۆم و ئەو دەزانم.
تەماشا عاشق و سیاسی هەر یەک کەسن!
لەو شاعیرە بەهێزانەم
دەڵێم تۆ خۆشەویستم نەبوی، کەرەستەم بوی!
بێ وەفاییت نەکرد، خۆت ئازاد کرد.
کەسی من نەبوی هەتا بەجێمبێڵی
بە تەنیایی لەدایکبوم، بە تەنیایی دەمرم.
