دلۆپێ باران کەوتە سەر دڵم … كاروان ئه‌حمه‌د


لەلێوار دەریا دانیشتووم
نەوڕەسەکان بەڵەمی
ڕاوچیەکی نزیک لەخۆریان
کردووە بەهێڵانەی خۆیان
ئاگری منداڵە سواڵکەرەکان
دامرکایەوە
هەموان ڕۆیشتنەوە
تەنیا من لێرە مامەوە
سەرما ڕوومەتی ڕنیم
ڕەشەبا یاخیەکان تێپەڕین
باران دایکرد
شوێنپێی گەڕانەوەم وون بوو
شەهێن هات
دڵۆپە ئاوی چۆڕاوی
بڕژانگەکانمی
ووشک کردەوە
ئاوی دەریا هەڵکشاو داکشا
پاپۆڕەکان سەرنشینەکانیان داگرت
گەڕانەوە
تاریکی باڵی کێشا
یەک دوو ئەستێرە
پڕژانە سەر فرمێسکەکانم.