Skip to Content

تۆ تۆییمه‌ … ڕه‌نجه‌

تۆ تۆییمه‌ … ڕه‌نجه‌

Closed
by ئایار 17, 2018 Poems

نه‌خۆشییه‌كی بێده‌رمان..
چاو له‌ ڕێگه‌یه‌كی دوورو
جێژوانێكی ڕوخاو،
به‌ حه‌سره‌تێكی ئاگرینه‌وه‌
چاوه‌ڕێی هاتنی شیعرێكم..
له‌ژێر زمانمدایه‌و
بۆ چاوه‌ خه‌واڵوه‌كانی تۆ نه‌بێ
نایه‌
تۆش نایه‌یت و
له‌شه‌وگاری منیشدا
ڕۆژنابێته‌وه‌!

خاتوونه‌كه‌م!
من له‌ تۆدا
بۆ خۆم ده‌گه‌ڕێم
بۆ مێژووی له‌دایكبوونم
كه‌ هێشتا ده‌ستی پێ نه‌كردووه‌و
ساتێكی نابێ
بۆ ده‌ست پێكردن.
تۆ هه‌موو شتێكت له‌ مندا
دیاره‌
ئه‌وه‌ی دیار نییه‌
منم
سه‌ده‌یه‌ك ئه‌ولاتره‌
مه‌لێكی.. سه‌رباڵ شینی..
لێدراو
وه‌خت و ناوه‌ختی نییه‌
له‌ تاریكایی مندا
ده‌فڕێ و
له‌ ڕووناكایی تۆدا…
ده‌نیشێته‌وه‌.

لێگه‌ڕێ
با هه‌ر خۆشمبوێی
با هه‌ركاتێ بمه‌وێ ..
بتهێنمه‌ ژووره‌كه‌م
من هه‌ر، بۆ ئه‌وه‌ هاتووم
تۆم خۆشبوێ
بۆ ئه‌وه‌ش ده‌ڕۆم ..
تۆ له‌گه‌ڵ خۆما
ببه‌م
لێگه‌ڕێ
باهه‌ر خۆشمبوێی
قیبله‌ به‌ بۆ شیعره‌كانم!‌
شیعر..
ڕووی له‌ قیبله نه‌بێ ‌…
به‌تاڵه‌!
تۆ تۆییمه‌و..
نێوانمان دوور نییه‌
با دووریشبێ
ترپه‌ی هاتن…
له‌ دڵه‌كانیشدا بێ
هه‌ر هاتنه‌!
ئێمه‌ ئه‌گه‌ر ڕێگه‌كان
دوورمان ده‌خه‌نه‌وه‌ …
ده‌توانین، له‌ ووشه‌كانه‌وه‌ بێینه‌وه‌
ئه‌گه‌ر نه‌مانتوانی ماڵی یه‌كتر ئاوه‌دان بكه‌ینه‌وه‌
ده‌توانین له‌خه‌ونی یه‌كتردا بژین

پێمخۆش بوو من بێم
داخه‌كه‌م ئه‌وه‌ ناكرێ
من ڕێگه‌ی هاتنم لێ وونه‌ …
وا تێگه‌یشتم ..
كه‌چی وا نه‌بوو
ئه‌وه‌ی وون بووه‌
منم!.
من ئیتر چاوه‌ڕێ ناكرێم..
هه‌ر ئه‌بێ چاوه‌ڕێ بم!
ئه‌ی ناكرێ تۆ بێی؟
هه‌ر هه‌نگاوێكت ..
به‌ هه‌زار له‌ من وه‌رگره‌و
لێگه‌ڕێ با هه‌ر خه‌ون …
به‌ هاتنتنه‌وه‌ ببینم
بۆنی هاتنی تۆ
مانه‌وه‌ی منه‌
تا تۆ دێی
من چاوه‌ڕێم و
تا من چاوه‌ڕێم
ئه‌زانم..
هێشتا ماووم!!
———————
ڕه‌نجه‌ دوورترین ژووری دونیا

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish