Skip to Content

پیاسه‌ك به‌ كۆڵانه‌كانی منداڵیدا …  نێچیروان شوانی

پیاسه‌ك به‌ كۆڵانه‌كانی منداڵیدا … نێچیروان شوانی

Closed
by ته‌مموز 9, 2018 General, Poems

هه‌رچه‌نده‌!
زۆرینه‌ی هه‌ره‌ زۆریان..
شه‌یدای قه‌ڵه‌م و قوتابخانه‌ نه‌بوون,
وه‌لێ كه‌مترین لادیواری كۆڵان هه‌بوو,
ته‌خته‌ڕه‌ش ئاسا
به‌ پارچه‌ گه‌چ
سپی نه‌كرابێته‌وه‌.
**********
شه‌ڕ و شادییه‌كانی زارۆیان فره‌ بوون,
به‌ڵام دڵشكان و ده‌روونئێشان..
كه‌م, یان به‌ده‌گمه‌ن بوو,
چون هه‌رده‌م
سیله‌ی كۆڵان
ماڵی گشت بوو,
یا گۆڕه‌پانه‌ گڵه‌ ئه‌وسه‌ری كۆڵان
هه‌رده‌م له‌ كه‌یفدا مشت بوو.
*****************
ئه‌وێ ڕۆژێی كۆڵان…
هه‌موو شت تامی خۆی هه‌بوو..
جه‌ژن, یاری, هاوڕێیه‌تی, هاوسێیه‌تی
ته‌نانه‌ت پرسه‌ و شینیش!
ئاخر ئه‌و كۆڵانه‌..
شوێنگه‌ی دیده‌نی و ڕازی منداڵان بوون,
ژوانگه‌ی فرێدانی پۆشاكی غه‌ریبی بوو.
خانووه‌كان بچووك بوون, به‌ڵام منداڵه‌كان
ماخۆی خه‌ونی مه‌زن بوون.
ژین سه‌خت بوو, وه‌لێ شیرین
پێیه‌كان بچووك, به‌ڵام هه‌نگاوه‌كان گه‌رموگوڕ
****************************
ئه‌مێستا هه‌ر ئه‌و كۆڵانه‌..
دره‌وشاوه‌ و جوانتره‌,
به‌ڵام یاده‌كان جوانتر.
ئێستا زارۆیان گه‌وره‌بوون,
به‌ڵام ئه‌وێستایان گه‌شتر..
ئه‌و زارۆ گه‌ورانه‌ خۆیان هاتوون و
دونیایه‌ك یادی جوانیان له‌وێ جێهێشتووه‌.
له‌ هه‌ر شوێنێكیش بن,
هه‌نگاوه‌كانیان به‌ره‌و ئه‌وێ ده‌چێته‌وه‌.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish