Skip to Content

381 Views

ئایا کرۆکی کێشەکە هەر دەسەڵاتی سەرۆکایەتی هەرێمە یان کۆی سیستەمەکەیە…؟! … موزەفەر عەبدوڵا

ئایا کرۆکی کێشەکە هەر دەسەڵاتی سەرۆکایەتی هەرێمە یان کۆی سیستەمەکەیە…؟! … موزەفەر عەبدوڵا

Be First!
by July 15, 2018 General
image_print

دامەزراوەی سەرۆکایەتی هەرێم كە چەندین ساڵ بوو مەسعود بارزانی سەرۆکایەتی دەکرد،و ببوە ڕوگەیەکیش بۆ بەشێکی سەرەکی لە باڵەکانی ناو بزوتنەوەی ناسیونالیزم بە گشتی، بەڵام لەهەمان کاتدا ماکی ناکۆکی و دژایەتیشی لەگەڵ خۆیدا هەڵگرتبو بە حوکمی پوچی ناوەڕۆکی سەرجەم بزوتنەوەکەو دەسەڵاتەکەیان.
ئەگەر چی لەسەرەتای دامەزراندنی و دەسبەکار بونی قۆناغی یەکەمی لە لایەن بارزانیەوە کەمێک بێ دەردی سەر بۆی چوە بەڵام بەر لە جێگیربونی تەواوی دەسەڵاتەکەیان توشی کیشەو ململانی بون لەسەر ئەم دامەزراوەیە وەک هەمو دامەزراوەو جومگەکانی تری دەسەڵاتەکەیان.تەنانەت لە چەند ساڵی ڕابردودا ئەم کێشەیە باڵی کێشابو بەسەر هەمو کێشەو گیروگرفتە سیاسی و ئابوری و کۆمەڵایەتی یەکانو ناڕەزایەتی یە جەماوەریەکانیش لە دژیانو بونە قوربانی ئامانجدارانەی دوو لای ئەم کێبڕکێ یە.
هەردو لایان هەوڵیان دەدا ئەم ناڕەزایەتی ئازادیخوازیە جەماوەری یە بۆ مەبەستی خۆیان لەدەوری ئەم پرسو کێشەیە چەق پێببەستن تا لایەکیان لەم سەنگەرەوە پاشەکشە بە لایەکەی تریان بکات.

ئەوەبو دوا جار لەسەر درێژکردنەوەی ماوەی چەند جارەی سەرۆکایەتی بارزانی پەرلەمان بوە گۆڕەپانی شەڕو پێکدادان ،و سەرۆکی پەرلەمان کە گۆران بوو، لەگەڵ ئەندام پەرلەمانەکانیان، بە هێزی چەک شاربەدەر کران. ئێستاشی لەگەڵ بێت ڕیگایان بە سەرۆکەکەی نەدا ڕوبکاتەوە بەناو پەرلەمانداو دەستیان پێ لە کار کێشایەوە.ئەمەش بوە قوڵبنونەوەی قەیرانە هەمە لایەنەکانیانو تەنانەت وێرانتر کردنی ناو ماڵی کوردایەتیەکەیان لە ئاستی ناوخۆیی و ناوچەیی و جیهانیش.
باشترین بەڵگەش شڕو وڕی دۆخی ئێستایانە لە بەغدا کە هەر یەکەیان ئامادەن لەگەڵ دوژمنە سەر سەختە قەومی و تایەفی یەکان یەکبگرن لە دژی یەکتر.
بەڵام لەم ڕۆژانەی هەفتەی ڕابردودا لە پرۆژە یاسایەکدا کە گۆڕان پێشنیاری کردەوە بۆ بەردەم پەرلەمانەکەیان بە زۆرایەتی دەنگ بڕیاری هەڵپەرساردنی- تعلیق-ئەم دامەزراوەو پۆستەیان داوە.بەمەش جارێکی تر گۆڕان دەستی کردەوە بە زوڕنا ژەنین وشایی و هەڵپەڕکێ وەک ئەوەی هەمو کێشەو گیروگرفتەکانی خەڵکیان چارەسەر کردبێت و کردویانە بە جێگای پرسوڕایەکی گەرم.

تێۆردانەرانو ڕاڤەکارانو نوسەرانو ڕۆشنبیرانیان دەستیان داوەتە بانگشەو هاندان و خۆیان سەرگەرم کردوە بە ئومێدی ئەوەی هەم پارسەنگی خۆیان لە هاوکێشە دۆراوەکانیان هاوسەنگ بکەنەوە و هەم قەیرانە ناوخۆیی یەکانیان خامۆش کەنەوە .هاوکاتیش دەیانەوێت جارێکی تر جڵەوی نارەزایەتی قوڵی جەماوەر، کە ڕووی لەهەمو دەسەڵاتەکەیانە بە گۆڕانیشەوە ، بگرنەوە دەست بۆ بەهێزکردنەوەی کێشی خۆیان.وەک کارتێکیش بەکاری بێنن بۆ دەسکەوتی زیاتر لە هەڵبژاردنەکانی داهاتوی بەناو پەرلەمانی کوردستان.
جا پرسیاری سەرەکی لێرەدا ئەوەیە ئاخۆ ئەم بەناو دامەزراوەیەی سەرۆکایەتی هەرێمە کەوا کردویانە بەم کێشەو گیروگرفتە گەورەیەی نێوان خۆیان و دەیانەوێت خەڵکێشی پێ سەرگەرم بکەنەوە سەرچاوەی سەرەکی هەمو کێشەو گیروگرفتەکانە…؟!
لە وەڵامێکی زۆر کورتدا پێویستە بڵێین نەخێر هەرگیز..!
لێردا پێویستیش دەکات کەمێک وەڵامەکە ڕۆشن بکەینەوە.

لە ڕاستیدا ئەم بەناو دامەزراوەیە نەک هەر سەرچاوەی سەرهەڵدانی هەمو کێشەو گیروگرفتەکانی جەماوەری ستەمدیدەو بێمافکراو نین بەڵکو سەرچاوەی سەرەکی سەرهەڵدانی کێشەو ململانێ و جیاوازی یەکانی ناو ماڵی کوردایەتی خۆشیان نین.
سەرچاوەو هۆکاری سەرەکی بۆ هەمو کیشەو گیروگرفتەکان کە بونەتە بێمافی ڕەهای خەڵکو، تەنانەت بۆتە هۆی قەیرانو پەرشوبڵاویو لاوازی خودی سەرجەم دەسەڵاتەکەشیان، لەناوەڕۆکی داکەوتوییو بێ ئاسۆیی جوڵانەوەکەیان وەک جوڵانەوەیەکی بۆرژوا قەومی وعەشیرەتی لەهەمو ڕویەکی ئابوری سیاسی و کۆمەڵایەتی و کەلتور شاراوەتەوە.ئەمە جگە لەوەی حزبەکانی ئەم بزوتنەوەیە لەهەمومەرجێکی جیهانی پڕ ئاڵوگۆڕو وەرچەرخانو پاشەوپاش گەڕانەوەی سیاسو کۆمەڵایەتی و فەرهەنگیشدا دەسەڵاتیان گرتە دەست کە نەیان توانی دووساڵ تامی دەسەڵاتێکی یەکگرتوی بەهێز بکەنو توشی بنبەست بوون .

بۆیە کۆی ئەم دەسەڵاتە هیچ کات نە دەتوانێت بێ کێشەو قەیرانو شەڕو ئاژاوە بێت تا هەلومەرجێکی لەبارو ئارام بۆ بەرهەمهێنانی سەرمایەو پەیوەندی یەکانو ڕێساویاساکانیان دەستەبەر بکات نە دەتوانێت کەمترین ئەمنو ئاسایشو خزمەتگوزاریو مافو ئازادی یە سەرەتایی یەکانیش بۆ کۆمەڵانی خەڵکی بەرهەمهینەر ڕەچاو بکاتو دابین بکات لە کرێکارانو تویژە ستەمدیدەکان.ئەم دەسەڵاتە بەهەردو باڵە سەرەکیو لاباڵەکانی یەوە نە دەتوانیت باڵە لیبرالەکەو نە باڵە سۆشیال دیموکراتەکەی ڕۆژئاوا بیت تا لە سایەیاندا ڕیساو یاساو نەریتە ڕەسەنەکانی پەیوەندنی بەرهەمهێنانی سەرمایەو کەڵەکەی سەرمایەو سود وقازانج کاری خۆی بکات.
هەر لەم گۆشە نیگایەشەوە نابێت جارێکی تر جەماوەر توشی خۆش خەیاڵی ببنەوە بەو شەڕو ململانێ یەی کە دەگوزەرێت لە نێوان پارتی و گۆڕانو هاوپەیمانەکانی لەسەر دەزگای سەرۆکایەتی و هەڵپەساردنی، و تەنانەت لابردنیشی.

هەرچەند دەورانێک بە کردەوە جەماوەر توشی خۆشخەیاڵی هاتنو ناڕەزایەتی یەکانیان بوە قوربانی نێوان ململانێی ئەم باڵانەی دەسەڵات ، بە تایبەتی لە دوای ناڕەزایەتی یەکانی شوباتی ٢٠١١ وە .بەڵام لەم چەند ساڵەی دوای ئەوەوە جەماوەر بە دروستی نیشانی لێیان گرتوەو داوای وەلانانو کۆتایی پێهێنانی سەرجەم دەسەڵایان دەکەن.هەڵبەت ئەمە هێشتا نیوەی دۆزینەوەی ڕێگاکەیە نیوەکەی تری لە گرەوەی دەستەبەرکردنو دابین کردنی ئەلتەرناتیڤی شۆڕشگیرانەی خودی جەماوەرەیە بەرامبەر کۆی ئەم دەسەڵاتە بە ئۆپۆزیسێونیشەوە.

١٥-٧-٢٠١٨
موزەفەر عەبدوڵا

Previous
Next

Leave a Reply