Skip to Content

كه‌سێك نییه‌ وێنه‌مان بگرێ ؟ … شیعری: ئیبراهیم هه‌ورامانی

كه‌سێك نییه‌ وێنه‌مان بگرێ ؟ … شیعری: ئیبراهیم هه‌ورامانی

Closed
by ئاب 7, 2018 General, Poems

(1 )

كه‌ دایكم مرد ،
مێخه‌ك به‌نده‌كه‌یم خسته‌ گۆڕه‌كه‌یه‌وه .‌
تابه‌هه‌شت ،
بۆنی مێخه‌كی لێوه‌ بێ .

*******
(2 )


وه‌ره‌ نێو خه‌ونمه‌وه‌
له‌وێ ،
پۆلیس نیه.

*******

(3 ) ‌


تامی چه‌ند شیرینه‌ ،
گێلاس ،
وه‌ك خه‌نده‌ی تۆ.

(4 )


شیعر ده‌نوسم ،
ئه‌مه‌ بیانویه‌كی باشه‌ ،
بۆئه‌وه‌ی بزانیت
تۆم خۆشده‌وێت .

*******
(5 )

چه‌ند ئاوازێكی خۆشی هه‌یه ،‌
ده‌نگی تۆ .
كاتێك ده‌ڵێێ :
سڵاو…

*******
(6 )


كه‌ تۆ ڕۆشتی
پاییز هات .
ڕه‌نگ زه‌رد مامه‌وه .

*****
(7 )



ته‌واوی دڵم به‌خشیوه‌ به‌ تۆ
كاتێ ده‌ڕۆی ،
بیرت نه‌چێ
ئینسان ،
به‌بێ دڵ ناژی .

******
(8 )


هه‌ناسه‌ی ساردم
هێنده‌ به‌سه‌ ،
دونیا بكاته‌ به‌سته‌ڵه‌ك .

*******
(9)
بۆ شیركۆ بێكه‌س

به‌مردن بڵێن :
به‌بێ شێركۆ ،
چه‌ند ،
بێكه‌سین .
ئای چواری هه‌شت !!

*******
(10 )


ناوت ،
له‌ پارچه‌ كاغه‌زێك ده‌نوسم و
له‌نێو په‌ڕۆیه‌كی سه‌وزدا
ده‌یكه‌م به‌یه‌خه‌مه‌وه .‌
تا له‌م ده‌ردی ،
تاعه‌ونه‌ به‌دوور بم .
(11 )

خۆزگه‌ ،
دڵم ده‌هات .
پێیه‌كانتم لێده‌كرده‌وه .‌
تا بیر له‌ ڕۆشتن نه‌كه‌یته‌وه .

******
(12 )

‌چاوی بڕیوه‌ته‌ ،
چاوانم .
ده‌زانێ ته‌نیام
به‌كامی دڵ لێم ده‌ڕوانێ ….
ده‌یه‌وێت
له‌وه‌ بگات ،
بۆچی ته‌نیا بومه‌ته‌وه‌ .؟
ئه‌و پشیله‌یه‌ی ،
برسێتی گه‌یاندویه‌تیه‌ ماڵی من .
برسێتی بیر چۆته‌وه‌ و
لێم ده‌ڕوانێ .

******
(13 )
تۆ ده‌رۆی ،
من دڵم دێشێ .

ته‌موز – ئاب \2018 هه‌له‌بجه‌

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish