Skip to Content

185 Views

دوو شیعر   شیعری: … عەبدوڵا سڵێمان(مەشخەڵ)

دوو شیعر شیعری: … عەبدوڵا سڵێمان(مەشخەڵ)

Be First!
by August 7, 2018 General, Poems
image_print

ئێوە چ شیعرێکتان دەوێ؟

ئێوە شیعرێکتان لێم دەوێ پڕ لەپێچ و لە پەنا بێ
دوور لە دەردەکانی ژیان هەڵبکورمێ و
بەچاوی تیژی وشەوە
ببێ بە پەت تا ئینسان دیلی فەنا بێ
ئێوە شیعرێکتان لێم دەوێ شەرمن .. بێدەنگ
دەنگی یاخی لێوە نەیێ
دەروازەی نائومێدی بێ و
پەنجەرەکانی خەیاڵی
جەستەی قاقا و لەشی ماندوو و
گیانی هەلابەهەلای گیانبەختکردووانی پێوە نەیێ
ئێوە شیعرێکتان لێم دەوێ پڕ لە لوغز و ناڕۆشن بێ
نەهێشێنێ دڵی بێبەزەیی سەرمایە
ڕوو بە هەق نەدوێ و لانەدا پەردە لەسەر ڕووی دزێوی ئەم دونیایە
ئێوە نازانن شیعری من گشت بەیانییەک بەر لەوەی غەدر خەبەری ببێتەوە
ئەو لەبەر دەرگای کارگەکان
لەمەیدانی کرێکارانی شارەکان
لەنێو کونجی تاریکایی زیندانەکان
لەنێو ترس و هەڕەشەی پیاو دژ بە ژنان خەریکی ئاواز چڕینن
مەقەستێکن بێهەدادان خەریکی ستەم بڕینن
من ناتوانم شیعرێ بڵێم بێدەنگ بێدەنگ لەبەردەم قاپی کۆشکەکانی سوڵتان و
چەوسێنەران لە چاوەڕوانی پارە بێ
من ناتوانم شیعرێ بڵێم دوور لەزام و لە ئازار و دەردی خەڵکی زەحمەتکێش بێ و
نووتەکێ بێ پێچەوانەی ڕێ چارە بێ
من دەربار نیم.. کۆیلە و مەسینەهەڵگر نیم بۆ هیچ هێز و دەسەڵاتێ
شیعرم ئازادە و ملکەچی قەت لا نییە بۆ مەعاش و خانوو و عەرزە و
سەر شۆڕ ناکات لەبەردەم هیچ پیا هەڵگوتن و خەڵاتێ
من شیعرێکتان بۆ دەنووسم لەناو کارگە بۆ کرێکار ببێ بە چەتری تووڕەیی
لەنێو کۆڕی خانەوادەی زەحمەتکێشان تووڕ هەڵبدا لە عەیب و عارە و شوورەیی
ئەو شیعرەی من لەگۆشەی زیندانی غەدرا
ببێ بە پەنجەرەی حەزێ
لەنێو دەریا و ڕێگای قاچاخی هەڵاتن لە زوڵم و زۆر
بۆ گەرووی ئینسانی ڕێبوار ببێ بە شەراب و ڕەزێ
من شیعرێکتان بۆ دەنووسم خاوەن بەڵێنی تاسەر بێ
لەگەڵ ئازاری ئینسانەکان بژێت و
لەگەڵ خەڵکی ئاوارەدا دەربەدەر بێ
وشەکانی ببن بە ژێ بۆ دەنگی پڕ لە بانگەواز
ببن بە ورەی پۆڵایین ببن بە گۆرانی و ئاواز
گەر دەتانەوێ ببینن شیعری مەشخەڵ چەند کەڵەگەت و سەربەرزە
لە لووتکەیا بۆی بگەڕێن نەک لەم دەشتایی و سەر ئەرزە
من شیعرێکتان بۆ ئەنووسم لەگەڵ خەندە و وێردی زارتان
لەهەڵپەرکێ و لە سەما بێ
بۆ لەدەستدانی ئازیزان هەم لەپرسە و لەخەما بێ
من شیعرێکتان بۆ ئەنووسم خاکیی سادە
بۆنی هەمان بۆنی باران
تاسەی هەمان تاسەی خەڵک بۆ ئازادی
چاوگ هەمان مانیفێستی جاری جاران
من شیعرێکتان بۆ ئەنووسم
نیگای هەمان نیگای پڕ لە خۆشەویستی بۆ ڕزگاری کرێکاران
شیعرێک ببێتە ڕووبار و دارچنارەکانی خەون ئاو بدات و
ڕۆحی ڕۆژگارە وشکەکانی تێکۆشان تێراو بکا و
گۆرانییەکەی (لینین) زیندوو بکاتەوە
شیعرێک ببێتە کەنارێک بۆ کەپڵی عەشق
کەپڵی ئارەزووی خەبات و
کەپڵی ئومێد و ڕزگاری بەرەو سنوورەکانی ئومێد و خۆزگە بباتەوە
شیعرێک دەستێکی سەوزەڵانی ژیان بێ و
دەستەکەی تر، گڕ بێ دژ بە نا یەکسانی زۆر و غەدر
شیعرێک بۆ ڕەهێڵەی ستەم بۆ ئینسان ببێ بە چەتر
من ئەو شیعرە شۆڕشگێڕە ئەنووسم و
ئێوەش چی ناو دەنێن بنێنن
با وڕێنەکانی نووسەرانی دەربار، نووسەرانی بورژوازی
کڵاو بێخەمی لەسەر نێن.

ئەیلوولی ٢٠١٧

سروودی کۆڵبەر

لەم سەرەتای سەدەی بیست و یەکەی تیایدا زیندووم دەژیم
وەکو ماشێن وەکو ڕۆبۆت کار دەکەم و
ئارەقەی ئیش بۆ ژیانێکی سەربەرزانە دەڕێژم
لەنێو پەتووی ڕۆژگارەکان، لەسەر پشتی ئەستێڵکێک لە خەم و حەسرەت
دانە دانە چرۆی خەون و ئومێدەکان لەنێو چاڵی زەمەنی غەددار دەنێژم
سەیری دەستەکانم دەکەم زبر و شەقار
پێستی ژێر هەتاوی ژینم شەق شەق بووە
وشەی یاخیم ڕوو بە ستەم و زۆرداری سەرمایەدار تا بڵێی زبر و ڕەق بووە
ئەمن دەڕۆم پەیژەکانی ڕوو لەسەر و ڕوو لە خواری تێکۆشانم ناسیوە هەر وەک حەزی خۆم
لەتاو برسێتی هاوچین و ئەوڕەشەخێزانەی هەمە ڕۆژانە خەم و داخ دەخۆم
من کۆڵبەرم…کۆڵی ژانی ئەم ژیانەم بەکۆڵەوە
لەناو ئەم چاخە نوێیەوە چاخی بە گوند بوونی جیهان
وێڵم بەدوای ناو و نیشان
لەم پەراوێزی زەمەنە بە پشتی کۆم و هەناسەی تاساومەوە
بۆ بژیوی ماڵومنداڵ کەوتومەتە سۆراخی نان
لە کەلێنی زامەکانی ئەم ڕۆژگارە دەڕوانمە ئەو خۆزگانەی کەوا هەڵدێن وەکو هەتاو
من لەچاوی برسێتییەوە خەریکە ئەبمە ئەو خەونە ڕەنگینانەی
بەرەو ڕووی ڕۆژەکانم دێن بە غار پرتاو
من لەزاری هاوارەوە ئەوا دەبم بەو گۆرانییەی هەموو دەمێک دەمڵێتەوە
دەستی ڕەشی ژێر سێبەر ڕیشی ئاخوندێک
بێئەوەی ئۆخەیەک بکەم هەناسەم دەبڕێ و ئەوسا دەمکوژێتەوە
مێزەرێک لە تەڵە و ستەم
هەر بە تەسبیحی ئیعدام و خوا پەرستی کۆڵەکانم لێوەردەگرێ و
دەیخاتە سەر شانی ماڵو منداڵی برسی و بێچارەم
برینێک دەخاتە ڕۆحم، ڕۆحی هەژاری بێپارەم
من کۆڵبەرم… تەنها خۆم و تەنها مانگ و ئەستێرەکان دەزانین چۆن ڕەنجم داوە
ئەژدیهای مەرگ لە ناوەختدا چۆن قەپاڵی لە ڕۆحی زامدارم داوە
توولەڕێگای ئەو هەڵدێر و شاخانەی سنوور دەزانن دڵی من چەند پڕ تاسەیە
ژێر گەوەڕ و تاشە بەردەکان بینەری وەرینی دونیایەک خۆزگە و هەناسەیە
بۆرژوا دەزانێ ئەو کارە مەرگهێنەرەی دەیکەین
لەسەر شانی ڕۆژەکانی ئەم تەمەنەم بست بست دەمخاتە ژێر ئەرز
گیانم لە قەفەس دەنێت و دامدەڕزێنی لەژێر قەرز
من کۆڵبەرم…ئاوازێکم دێتە گوێ غەمگین و هێمن
سۆناتایە بۆ ئەو دەرد و بەڵایانەی وەکو باران دەبارێنە سەر جەستەمان
ئەومیلۆدییە دڵ گوێی لێیە هەناسەیە بۆ بەستەمان
چەند دەکوژرێم..چەند لەنێو مەنجەنیقی زۆر دێمە سووتان
وەکو گەنم لەنێو بەرداشی ژیان و مەرگی ناوەخت دێمە کوتان
کۆڵ نادەم و کۆڵی ژینم بەکۆڵەوە
باڵەخانەی ئەم ئومێدەم نایە سەر یەک
لەنێو دڵی ئەم لووتکە و شاخ و دۆڵەوە
من کۆڵبەرم…کۆڵنەدەرم گڕم لافاوم جەربەزەم
بۆ نەمانی چەوسانەوە و ژێردەستی و کۆیلەتی ژیان
ڕەهێڵەم زریانم تەرزەم
من کۆڵبەرم.. بەکۆڵی خۆم حەسرەتەکانم دەبەم بۆ بازاڕی ژین
ڕق و دەرد و برسێتی و خەم
وەکو تۆزی دوای کارکردن دادەتەکێنم لەخۆم و
چاپووک چاپووک هەڵدەزنێم بە شاخەکانی ڕزگاربوون
هەتا ئەو ڕۆژە بێتە دی منی ڕەنجدەر
دژ بە ستەم
دەبم بە باهۆزی سوور و بە گەردەلوولی تووڕەبوون

ئەیلوولی ٢٠١٧

Previous
Next

Leave a Reply