کۆمەڵەی کتێب دۆست و نیچەیزم … هاوتا کوردستانی
کۆمەڵەی “کتێب دۆست”ی خورماڵ کۆمەڵەیەکن هەڵگری شوناسی دۆستایەتی کردنی کتێب و ئاشتبوونەوەی تاک و کتێب و تاک و کۆمەڵ و تاک و خوود کار دەکەن ، لەم پێنج شەش مانگەی تەمەنیدا توانیویەتی کۆمەڵێک پڕەسیپ بەرز بنرخێنێ و کۆمەڵێ جووڵەی هەیمەنەدار بکات ، چونە نێو ناواخنی کتێب و چوونە نێو دونیای کتێبەکان و پرسگەلەکانەوە، بەها و کردارە عەمەلیەکان وای کردووە هەنگاوەکانیان شوێن پێی خۆیان جێ بهێڵن .
کۆمەڵەیەک کە پێکهاتوە لە گەنج و لاوانێکی بەهرەمەند و لێهاتوو وە خاوەن تێڕوانینێکی گشتگیر و عەقڵانی بۆ سەرجەم پرس و پرسگەڵۆکەکان ، کە مەودای هزری و ڕۆشنگەری پێکەوەی کۆکردونەتەوە و بارگاوی بوون بەڕەهەند و ئاکارە باڵاکانی هزری و لە ڕێگەی دانیشتنەکانیان پێگە مەعریفیەکان شەن و کەو دەکەن و پڕەنسیپی کارەکانیان لەسەر مۆڕاڵیەتێکی تۆکمە و قایم خۆی بونیاد ناوە ، بەهەموو شێوەک جیاوازتر دەردەکەون و بەشێوەیەک لە شێوەکان جیاوازیەکی گشتگیر بەدی دەکرێت لە کارەکانیاندا و وە خۆیان کەنارگیر کردووە لەو دید و تێڕوانینە کلاسیکی و پاتریارکیەی کە بەدرێژایی ماوە لە کۆمەڵگای کوردیدا بەرجەستە بووە و ئامادەیی هەبووە بەڵکو فۆڕمێکی دیکەیان هێناوەتە نێو ئاکارە مەعریفیەکانەوە .
هیوادارم ئەمە دەستپێکێکی جوان و ناوازە بێت بۆ سەرجەم گروپ و کۆمەڵە و ڕێکخراوەکان کە بە پڕەسیپیەکانیاندا بچنەوە و شوناسێکی دیکە هەڵگرنەوە و ئەم کۆمەڵەیەش بێتە پێشەنگ بۆ ئەوانی دیکەش ،
وە کۆمەڵەی کتێب دۆست لەتەقەلای ئەوەدانە کە هزرگەری و ئەو فۆڕمە لەتێڕوانین و بەرخوردە عەقڵانیانە بکەن بە کولتورێکی کۆمەڵگای کوردی و تازەگەریەک و بوونیادێکی دیکە و شوناسێکی دیکە بەرجەستە بکەن و ئەو کولتورە جێبهێڵن کە ئامادەیی هەیە و خۆیان کەنارگیر بکەن لەو فۆڕمە مەعریفیەی کە بەشێوەکی شاقووڵی درێژکراوەی هەمان بەها داخراوەکانی هاوچەرخبوون و کرانەوەیە لە ئێستای کوردستاندا .
کە تەواو ئاوێزان بوون و فۆرمەڵە بوون بە فەلسەفەکەی نیچەنیزم کاتێک کە ڕێچکەی فەلسەفەکەی فردریک نیچە دەڵێ ” من داوای جەنگ ئەکەم ، جەنگێکی بێ ئاگر و ئاسن ، جەنگێک تێیدا تێزەکان و بیرەکان لەپێکداداندا بن و خاوەن بیرەکانیش لە مەیدان ” مەبەستی هەڵوەدا بوونی جەنگێکە کە جەنگی دیالۆگە هزریەکانە کە تێیدا پێکدادانی بیرە جیاوازەکاندا بێت و جەنگێک پێچەوانەوەی جەنگەکان کە ئاگر و ئاسن ئامڕازی جەنگەکە بێت ، عەقڵانیەت و بەرخوردەکان ئامڕازی جەنگەکەن و وە لەبری ئاژاوە و کوشتار، کامەرانی و گەشتن بەدەروازەی حەقیەقەت بەدوای خۆیدا دەهێنێ ، ئەمەش ئەو فەلسەفەیه کە تەواو ڕەگی داکوتیوە لەم کۆمەڵەیەدا .
سەرەڕای بوونی هەل و مەرج و بارودۆخە نالەبارەکانی کۆمەڵگای کوردی لەزۆر لایەنەوە بیگرە لەلایەنی سیاسی و کۆمەڵایەتی و فیکری و بیگرە هەتاکو لایەنی ئابووری و ئەو دۆخە نالەبارەی، زۆرینەی نەک هەمووی توشی نائومێدی و دەستەوسانی کردووە و وای کردووە زۆر بەها کەنارگیر بێت بەڵام لێرەوە هەموو ئەوانە لەلایەک و تەقەڵا و هەم و خەمی ئەمانیش لەلایەک وای کردووە شتەکان نەوەستێت و کەشتی مەعریفەت بەشێوەک لەشێوەکان هەنگاوی خۆی بنێت و نەوەستێت و تادەگاتە کەنارێکی ئارام و هێمن .
لەبوونی لەم فۆڕمە لەگروپ و کۆمەڵە و ڕێکخراوەکان ئەتوانێت دەروازەیەکی گرنگ و جەوهەردار بێت بۆ کردنەوەی زۆر دەرگای دیکە و وە ئامادەییان بەتایبەت لە کۆمەڵگای کوردیدا جێگەی ئومێدە و دەتوانین زۆر ئومێد و هیوایان لەسەر هەڵچنین و بتوانن ئاڕاستەیەکی دیکە بدەنەوە بۆ کۆمەڵ و بەها چەسپیوەکان و بتوانن نوێبوونەوەیەک بەتەواوی مانا نوێ بوونەوە بەرجەستەی نێو تاکەکان و کۆمەڵیش بکەن ، وەسەلمێنەری هەموو ئەوانەش ئەوەیە لە غیابی بوونی لەم فۆڕمەی کارکردن و مامەڵەی مەعریفی بەدرێژایی ئەو تەمەنە مەعریفیەی کوردی ئەم هەنگاوانەی تێدا بەرجەستە نەبووە وە ئێستاش پشتکردن لێان دەمانباتەوە هەمان ئاقارەکانی ڕابردوو و دیسان داخرانەوە بەڕووی هاوچەرخبووندا و تەنها بەپشتیوانی کردن و دەست خستنە دەستی نێو تاکەکانیش بێت لەتوانایاندا هەیە ڕێڕەوێکی دیکە بەرجەستە ببێت و هەموو تاکێک تێکەڵ ببێت بە پرسی ئینسانبوون و تاکەکان بگەڕێنەوە نێو پرسی ئینسانبوون بەمانا مۆدێرنیەکەی نەوەک بەو مانا ئینسانیەی کەئێستا لەکۆمەڵگای کوردی بەرجەستەیە .
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
