Skip to Content

113 Views

گوڵی ڕچیو …   سه‌ردار جاف

گوڵی ڕچیو … سه‌ردار جاف

Be First!
by August 10, 2018 General, Poems
image_print

ده‌ریای خه‌م و بێداریمه‌
كه‌چی هه‌تاو
خوی له‌ منا رووت كرده‌وه‌
له‌ راسته‌ رێی ژین دێمه‌وه‌
سه‌ر به‌ كونی رووباری بایه‌كا ده‌كه‌م
له‌ كۆته‌ڵدانی غوربه‌تا ئۆقره‌ ناگرم
به‌ به‌ژن و باڵای شۆخێكا
هه‌ڵده‌زنێم …….. نایه‌مه‌وه‌
تا تێر ئازاری ئه‌وین بم
كه‌ف و كوڵێ هه‌ڵبڕێژم
رێگای ته‌مه‌نم ون بكه‌م
شه‌رابی مه‌ستی ئه‌و ئیشقه‌م
نه‌نێم به‌ قووڵی بینمه‌وه‌
لێوه‌كانم له‌ به‌ر شه‌پۆلی هاڵاوا خۆیان ناگرن
ناتوانن نا ، قورتار بن و ، شه‌وی تارم كون كون نه‌كه‌ن
نازانم نا
ئیتر چۆن من بۆ مه‌نزلی
ژین بێمه‌وه‌ ……………
هۆ كیژه‌ شۆخ و شه‌نگه‌كه‌م
له‌ ده‌رگای ئافاتی ناخا مه‌مهه‌ژێنه‌
رووم لێ مه‌نێ ، به‌ باوه‌شی حه‌ز و ویست و ئیشقاویما
داچه‌مێوه‌
په‌ڕه‌ی دڵم
هێنده‌ به‌ سوێ و پڕ برینه‌
له‌و دیو په‌نجه‌ره‌ی شلێریم
جه‌سته‌ سوتاو
له‌ هۆگریشما خه‌مڵیوه‌
ده‌ی خودا فریادڕه‌سم به‌
گڵكۆی دڵم
ناڵه‌ ناڵی نزاكانی
گاشه‌ به‌ردی به‌ره‌و ئاوی ژین گۆڕیوه‌
ده‌سا په‌ری
ژێڕه‌خه‌ری پڕ بارانم بۆ راخستووی
بگه‌ڕێوه‌ …….
***********
له‌م تاریكستانه‌ی ته‌مه‌ن
كێ ده‌سگر و گۆچانی رێی ئه‌وینم بێ
با هه‌موو دونیا رۆشن و
زێڕچێته‌وه‌
فه‌رشی سووریش كاڵا به‌ باڵای رێگام بێ
كه‌ من عه‌وداڵ و سۆراغ بم
چما ژین نوێ
ده‌چێته‌وه‌
ئااای خودایه‌
بشێ بیری ئه‌و نازداره‌م
گه‌رمی رێگای ته‌مه‌نم بێ و
به‌ره‌و ناو جێگه‌م بێته‌وه‌
ته‌نهایی وا بۆم خه‌مڵیوه‌
هێنده‌ پڕكاری خنكانمه‌
ئای له‌و كاته‌ی كه‌ چرپه‌ و سرته‌ی خۆیم بۆ هه‌ڵده‌ڕێژێ
له‌ نیشتیمانی حه‌سره‌تا
گیانه‌ڵاییم پێ ده‌نێژێ
مه‌گه‌ر دواسات
ته‌نها و ته‌نها ده‌ست له‌ ملی مه‌رگم بنێ
به‌ به‌ر كێلی گۆڕه‌كه‌ما
راببوورێ
چراتۆڕی ئاهه‌نگی دوا دوای ژیانم
وه‌ك بوخچه‌ی گوڵ
به‌ سه‌ر جه‌سته‌ی خۆڵاویما
هه‌ڵوه‌رێنێ
منیش خولیام
نازانم ئه‌و روحه‌ شێته‌م
كه‌نگێ تێكه‌ڵ و هۆگری
ئه‌و ئاهه‌نگه‌ی مه‌رگم ده‌بێ
ئااای له‌و موژده‌ جه‌رگبڕه‌
له‌ گه‌ڵ هه‌ڵكردنی بایا
به‌ به‌ر هه‌ست و گوێم ده‌كه‌وێ‌
ئااای له‌و خه‌راباته‌ی هه‌یه‌ و پێی دڵسازن
به‌ كه‌یفه‌وه‌ ده‌مسوتێنێ
شادبارانی ئه‌و ده‌كه‌م و
به‌ره‌و رووی ئه‌و ئاكامه‌م دێ
ئه‌م ئه‌وین و ئیشقه‌ی هه‌مه‌
نغرۆی خۆڵه‌میشی ته‌زیو
هه‌ر ئافه‌رینێكی ده‌وێ
په‌ریم له‌ سۆنگه‌ی سۆزه‌وه‌ بۆ بگرێت و
ئۆقره‌گری ئه‌و ئاهه‌نگ و به‌زمه‌مان بێ
هه‌ی شێته‌كه‌م
شین و رۆرۆت له‌ ناخما تۆو كردووه‌
به‌ باڵاما هه‌ڵده‌گه‌ڕێی
وا ده‌زانی دووریم بێ ده‌ربه‌ستیمه‌ لێت
ئازاری ژین … ژانی برین
جه‌سته‌ی دوا ته‌مه‌نی منی
بنكۆڵ و زێوار كردووه‌
هه‌ر چركه‌یه‌ك
له‌ ده‌رگای برینێ ده‌ده‌ی
به‌ ئه‌ندیشه‌ما ده‌گه‌ڕێی
به‌ڵگه‌ی حاشاهه‌ڵنه‌گرت بۆ بهێنم
هه‌تا باوه‌ڕبوونی تووڕه‌ت
له‌ مه‌نگی ده‌ریا و شه‌پۆل ده‌ی
یا زه‌نگی مۆبایلێكم بۆ لێ نه‌ده‌ی
تووخوا په‌ری
گه‌ر له‌گه‌ڵ فه‌له‌ك و ڤینۆس
شه‌ڕی جوانی بۆ من ده‌كه‌ی
له‌ هه‌ناوی ئیشقاویما ئه‌سرینه‌كانم بسڕه‌وه‌
تۆ ده‌بێ هه‌ر بێیته‌وه‌ لام
دڵنه‌وایی شێتیم بكه‌ی
هه‌تا دڵم
له‌ به‌ر پێتا ببێته‌ كێڵگه‌ی ئه‌وین و
خووڕه‌ی خوێنی خۆی خه‌ڵاتكا
ده‌ تۆ وه‌ره‌و ڕێم لێ مه‌گره‌
تینوی واینی لیوه‌كانم
بۆ ماچی كه‌ردنێ نه‌كه‌م
تێر تێر له‌ هه‌ناسه‌ نه‌بم
له‌ حه‌وزی تاوانی ئه‌وین
بۆ ئامێزم پڕ خه‌تاتكا

لیمبۆرگ _ ئه‌ڵمانیا
7 / 8 / 2018

Previous
Next

Leave a Reply