Skip to Content

نامه‌یه‌ك بۆ هونه‌رمه‌ند زیره‌ك میره‌ …   سه‌ردار جاف

نامه‌یه‌ك بۆ هونه‌رمه‌ند زیره‌ك میره‌ … سه‌ردار جاف

Closed
by ئاب 14, 2018 General, Opinion

خه‌مێ بۆ دڵشكانی داهێنه‌رێ

به‌ داخه‌وه‌ جگه‌ له‌ ناو و ناوباگتان له‌ نزیكه‌وه‌ ئاشنایه‌تیمان له‌ گه‌ڵ ئێوه‌ی ده‌ست و په‌نجه‌ڕه‌نگین و هه‌ڵقوڵاوی كانیاوی بیر و داهێنان نییه‌، ئافه‌رین و ده‌ستخۆشانه‌ی ئێمه‌ و سه‌دان هه‌زاری وه‌ك ئێمه‌ چه‌نده‌ باڵا و پڕ مۆڕاڵ بێ به‌ره‌و ترۆپكی ئاسمان هه‌ڵكشێ و هه‌ڵبزنێ، له‌ ته‌ك هه‌موو ئه‌و خۆشه‌ویستییه‌ی كه‌ له‌ ناخی ئێمه‌مانان بۆ ئێوه‌ و هه‌سته‌ ناسك و جوان و باڵاو داهێنانه‌كه‌تان هه‌یه‌، ناكاته‌ بوغز و رك و كینه‌ی كوڕێژگه‌یه‌كی هه‌ڵخه‌ڵتاو و دواكه‌وتوو و مێشك شۆراوی بیری توندئاژوویی گروپه‌ ئیسلامییه‌كان، كه‌ سبه‌ی كارێكی نامه‌ردانه‌ له‌ هه‌مبه‌ر ئه‌و په‌یكه‌ره‌ جوانه‌دا بكات، عه‌قڵیه‌ته‌ هه‌مه‌جییه‌ته‌كان هه‌میشه‌ ئه‌و جۆره‌ بیركردنه‌وانه‌ گۆش و باڵا ده‌كه‌ن ، چونكه‌ له‌ مانای خۆشه‌ویستی تێ ناگه‌ن، هه‌رگیز وشه‌ی خۆشه‌ویستیشیان پێ قبول نییه‌، جا چ جای بگاته‌ په‌یكه‌رێك نمونه‌ی ئاوێزان بوونی دوو ڕه‌گه‌زی جیاواز بێ، كه‌ هێمای خۆشه‌ویستی بێت بۆ نه‌ته‌وه‌یه‌كی به‌دبه‌خت و بێ پشت و په‌نا.

ئێمه‌ له‌ ئێوه‌ تێده‌گه‌ین و حاڵیین كه‌ چه‌قۆ چ مانا و مه‌غزایه‌ك ده‌به‌خشێ، ده‌زانین برای شمشێره‌، لێ ده‌ترسین رۆژێ ئه‌و شمشێره‌ نه‌فره‌ت لێكراوه‌ بێته‌ ده‌نگ و ئه‌و دڵه‌ پڕ سۆز و خۆشه‌ویستییه‌ی ئێوه‌ و ماندووبونتان شه‌قار شه‌قار بكات و له‌ گه‌ڵ خۆتدا ئێمه‌یش بگریه‌نێت، له‌ ئێستاوه‌ دبێژین چۆن گریاین بۆ به‌خشینی ئه‌ڵقه‌ زێڕه‌كه‌ی په‌نجه‌تان به‌ كه‌مپینی هاوكاری گه‌ل بۆ زانا و بلیمه‌ت و خۆشه‌ویستی نه‌ته‌وه‌كه‌مان كاكه‌ كۆچه‌ر بیركار، گریانیشمان بۆ ئه‌و عه‌قڵییه‌ته‌ به‌رته‌سك و بیرهه‌مه‌جیانه‌ هه‌یه‌ كه‌ له‌ ڕێ لادراون ، ده‌ترسین ئه‌و خه‌ونانه‌مان هه‌رده‌م كوت و زنجیر و زیندانی كراو بێت و خۆشه‌ویستی له‌ رێی ژیانمانا ون بێت.

وه‌ك تاك و كومه‌ڵ و هاوشاری و هاونیشتیمانییه‌كانمان بشێ كاره‌كه‌تان ببێته‌ مایه‌ی شۆردنه‌وه‌ی ناخی شه‌ڕانگێزیمان و ئیدی ده‌ست به‌رداری ئه‌و كاره‌ قێزه‌ونانه‌ی یه‌كدی ره‌فزكردنه‌وه‌ بین، دخازم كاری ئێوه‌ به‌ر له‌تاك، كروب و ده‌سته‌ و تاقم وپارته‌ رامیارییه‌كانی نیشتمانم فێری ئه‌وینداری و خۆشه‌ویستی یه‌كتر و لێبورده‌یی بكات، ده‌نا ئێمه‌ی به‌دبه‌خت له‌ خوارێ هێنده‌ی ئه‌وان ركمان له‌ یه‌ك نابێته‌وه‌، ره‌نگه‌ په‌یكه‌ره‌كه‌تان به‌ جۆرێك له‌ جۆره‌كان هانمان بدات ، و ته‌واو هۆگری خۆشه‌ویستیمان بكاته‌وه‌ گه‌ر ئه‌وان بهێڵن، یان هه‌ر له‌ ڕێوه‌ به‌ ناوی ئایینه‌وه‌ چه‌مۆڵه‌ی قبوڵنه‌كردن له‌ په‌یكه‌ره‌كه‌تان ده‌نرێت.

ئاخر ئێمه‌یش ناتوانین یا فێر نه‌كراوین ناوی ئێوه‌ هاوچه‌شنی قوربان سه‌عیدی ئازه‌ربایجانی به‌ زیندوویی بنوسینه‌وه‌، ئه‌و رۆمانێكی ئه‌فسانه‌یی نوسی خۆشه‌ویستی ( عه‌لی ) موسلمان و ( نینۆ) ی مه‌سیحی له‌ 1937 نوسییه‌وه‌، دواتر ئه‌و په‌یكه‌ره‌ باڵایه‌ی لێ به‌رجه‌سته‌ بوو، كه‌ نها جوانی به‌ شاری ( باتۆمی ) جۆرجیا به‌خشیوه‌، ئاویته‌ی ئه‌و ئاوه‌ روونه‌ی شاره‌ كه‌نارییه‌كه‌ بووه‌، جێ په‌نجه‌كانی هونه‌رمه‌ند( ته‌مارا كفیسیتادز) ی په‌یكه‌رتاشی جۆرجی پێوه‌ دیاره‌ و ڕه‌ونه‌قی باتۆمی جوانتر و باڵاتر نیشانداوه‌، گه‌رچی په‌یكه‌ره‌كه‌ی باتۆمی جووڵه‌ی تێدایه‌ و ئاوێته‌ی یه‌كدی ده‌بن و هیمای تێكه‌ڵاوبوون و پرۆسه‌یه‌كی سیكسی نیشان ده‌دات و له‌ ساڵی 2010 ه‌وه‌ شكۆمه‌ندتر نیشان ده‌درێت و پڕ بینه‌رتر ده‌بێ و ناودارتر ده‌رده‌كه‌وێت، له‌و په‌یكه‌ره‌ی ئێوه‌یشدا ره‌نگه‌ ئاوێته‌بوونی لێوی كچ و كوڕه‌كه‌ قبوڵ نه‌كرێت و ببێته‌ مایه‌ی هه‌ڕه‌شه‌ی رووخان.

ئاااخ ده‌سه‌ڵات له‌ كوێی ، كه‌لتوور له‌ كوێی ، هۆشیاری له‌ كام كونج خۆت خلفاندووه‌ و كۆمه‌ڵێ كه‌ست گه‌وج كردووه‌، پێشتریش هه‌ر له‌ ( سلێمانی ) دا كاری ره‌فز كردنه‌وه‌ی قێزه‌ونانه‌ بینرا و هیچ نه‌كرا ، ئه‌وه‌ ره‌نجی داهێنه‌ری كورده‌ كه‌له‌ وڵاتی خۆیی پاداشت ده‌درێته‌وه‌، كه‌ هه‌میشه‌ داهێنه‌ر دل و بیر و ئاوه‌ز و ئه‌ندێشه‌كانی له‌ قاڵبدانی تیرۆربوونی كاره‌كه‌ی ده‌خولێته‌وه‌، ئه‌وه‌یش هه‌ر داهێنانی كوردییه‌ كه‌ به‌رهه‌می ڕه‌نج و شه‌ونخوونی له‌ تاراوگه‌دا كۆچه‌ر بیركار باڵا ده‌كات .

Previous
Next
Kurdish