Skip to Content

81 Views

چیرۆك: خدر تەئخیر … نووسینی: کۆڕش وەحید

چیرۆك: خدر تەئخیر … نووسینی: کۆڕش وەحید

Be First!
by August 25, 2018 General, Literature
image_print

بەدەم چوالە خواردنەوە بە راڕەوەکەدا دەڕۆشت و کتێبەکانی ڕێکدەخست، هەر کارمەندێکی کچی بدیایە دەستێکی بۆ بەرزدەکردەوەو بە دەنگێکی نەرمی لەخۆبایی و مەکراویەوە دەیگوت (های)، دەزانیت پاش کەمێکی تر لە پەخشی راستەوخۆی کەناڵی فەنتەڵۆس چاوپێکەوتنم هەیە، خەمت نەبێت گەر پێشی ڕانەگەن ئەوا لە فەیسبوکەکەم یەکسەر دوای تەواو بوونی چاوپێکەوتنەکەم دایدەبەزێنم، دڵی زۆر خۆش بوو، خوشی نەیدەزانی چۆن لەو گوزەرەدا بە جەنابی (پرۆفیسۆر) ناوبانگی پەیدا کردبوو، بەڵام هاوڕێ کۆنەکانی هەر بە خدر تەئخیر بانگیان دەکرد.. نەیدەتوای خۆی لەوان بگۆڕێت، بەڵام بۆ ئەوەی لەو نازناوە ناخۆشە رزگاری بێت هەموو دەرگاکانی بە رووی ئەواندا دادەخست، حەزی نەدەکرد بیری مەلعونەکەی بکەوێتەوە، کە چۆن هەر لە مێردمنداڵیەوە (نەزانی) لا رازاندبووەو نەیهێشت بە هیچ بێت، بەڵکو وای لێکرد خۆشی لێبێتە پڕۆفیسۆرو دان بە نەزانیەکەیدا نەنێت، هەرچەندە پێستی رووی هێند قایم بوو چەندان جار تەریقکرابووەو پێچەوانەی قسەکانیان بە بەڵگەوە پێ دەگوت و دزینی ناونیشان و ناوەڕۆکی کتێبەکانی پیدەگوترا بەس ئەو بەسەر خۆی نەدەهێنا، بەم دوو دێڕە شیعرە زۆر کاریگەر بوو، هەر ئەوەشی لەبەر بوو..

بە خۆم زۆر چاك ئەفامێنم بە شێتی چەشنی مەجنوونم
بە بێ ئەقڵی لە لام وایە فەریدی روبعی مەسکنووم

ئەم دوو دێڕەی جارجار لەبەر خۆیەوە دەیگوتەوە، بەڵکو ئاوازێکی خۆشیشی بۆ دانابوو، بەڵام لای کەس نەیدەگوت، هەر لە دڵی خۆیدا دووبارەی دەکردەوە.. لە ناوەڕاستی چاوپێکەوتنەکەدا کەف لەدەمیەوە بڵقەی دەکردو بەرەو سەقفی ستۆدیۆکە بەرز دەبووەوە، لە بینەراندا وابوو لە بانێۆی حەمامدا بەرنامەکە تۆمارکراوە، خۆی سوور کردبووەو دەیگوت: “سیستەم کۆتی لەمپەر مەلی داهێنانە، ئەو مەلانە لە قەفەزدا بەند دەکات و دەبنە دەستەمۆی ڕژێم، ئەو مەلانە بە گەورەو بچوکیانەوە دەبێ ببنە گیڤارا تا ناویان لە تۆماری ئەدەبیاتی کۆماردا بە نەمری بمێنێتەوە”.
بەشێك لە تەماشاکاران واقیان وڕما بوو لەم فەلسەفانە، وایاندەزانی ئەم پڕۆفیسۆرە تازە لە مەریخەوە دابەزیوە، نەیاندەزانی بەم وتەیەی ڕووی تاقمێ سەر خێڵی سەرەتایی سپی دەکردەوە کە لافوگەزافی حوکمداری و دەوڵەتدارییان لێدەدا، بەڵام ئەو وای نیشان دەدا نەخێر وانیە ئەوانە هیچیان کەمتر نیە لە رژێمە دیموکراسیخوازەکانی رۆژئاوا، بەڵکو درێژکراوەیەکی ڤۆڵتێرو شۆڕشی فەرەنسان، بۆیە رۆشنبیر دەبێت بەرەنگاریان بێتەوە، دەبێت تا دوا هەناسەی یاخی بێت.

رۆژێك ئامادەبوویەکی کۆڕەکەی کە لە ناو حەشاماتەکەدا خۆی گرمۆڵەکردبوو تا نەیبینێت چونکە نەیدەهێشت ئامادەی کۆڕەکانی ببن، هەستاو پێی گوت: ئەم چەواشەکاریە تاکەی تۆ هەر خدر تەئخیرەکەی فەنتەڵۆسی، دەزانم مانگانە لە هەردوو لا چەند وەردەگریت و دەخۆیت ، گیرفانتی پێ گەرم دەکەیتەوەو گیرفانی ئەو خەڵکە داماوەش کێچ و ئەسپێ تەراتێن و ڕاوڕاوێن دەکات لە ناویاندا، ئیتر ئەم دروشمە درۆزنانەت لە پای چی، بۆچی خەڵکی سادەو دڵسافی تازە خوێنەر هەڵدەخەڵەتێنیت؟
کابرا قسەی تەواو نەکرد هەر هێندەی زانی دوو بۆدی گاردی بەردەرگا تووڕیان دایە دەرەوە.. بەڵام ئەو بەسەر خۆی نەهێنا، کەمێك بەر یەخەی چاکەتەکەی تەکاندو بۆینباخەکەی راست کردەوەو بەئامادەبووانی گوت: ئەو کابرا شێتە چۆن خۆی گەیاندووەتە ئێرە؟ کۆڕی پڕۆفیسۆرێکی وەك من نابێت ئاژاوەی تیا دروست بێت، ببورن ئەگەر سیلسیلەی ئەفکارتانی پچڕاندبێت.

ئەو هەر کاتێك دڵتەنگ بووایە و نزیك بووایەتەوە لەو قەناعەتەی کە ئەم ئەو پرۆفیسۆرە نیە کە خەڵك ناوی دەبەن، بەڵکو کەسایەتی پرۆفیسۆرێکی تری بزربووی هەڵگرتووەو کەسایەتیە حەقیقیەکەی خۆی هەر خدر تەئخیرە، یەکسەر دەچووە پشت سەفتە کتێبێکەوەو سێڵفییەکی خۆی دەگرت و دایدەبەزاند، ئاوها دڵخۆشی خۆی دەدایەوە، ئاوها بە زۆر بۆ خۆی دەسەلماند کە چەند هزرمەندێکی لێهاتوو و بێ وێنەیە، زوو زووش لەماڵەوە لەبەر ئاوێنەی ژووری نووستنەکەدا پرۆڤەی ئەوەی دەکرد ئەگەر دەمی وشك بوو و یان بوو بە تەڵەی تەقیو چۆن چارەسەری بکات و لەبیر خۆی بەرێتەوەو خۆی لێ ڕزگار بکات.

من بێزار بووم لە چالاکیە ئەدەبیەکان، ئیتر بڕیارمدا بەشداری ئەو چالاکیانە نەکەم، هەتا ئەوەی دەشیزانم لە بیرم نەچێتەوە، بەڵام شەوێکیان خەریك بوو خەو دەیبردمەوەو تەماشای گەمەی نێوان بەرازیل و کرواتیام دەکرد، هەر هێندەی نەبرد بەرازیل دۆڕا، نازانم چۆن دۆڕا؟ یەکسەرکاکی پرۆفیسۆر لە بەرنامەیەکی تایبەتدا دەرکەوت وسەرو دڵی گرتم، لەسەر شاشەکە نووسرابوو جەنابی پرۆفیسۆری پێشوو و سەرۆکی دەزگاکانی هەموو رۆشنبیران و چاپەمەنیەکان و هزرمەندانی دەڤەری فەنتەڵۆس ئەمشەو میوانی بەرنامە تایبەتەکەمانە، باش بوو کارەبا بڕاو ئەو کەفو بڵقانەی دەمی جەنابی پرفیسۆرم نەدی تا بیری حەمامکردنم بکەوێتەوە بەم خەواڵاوییەوە.


نووسینی: کۆڕش وەحید

Previous
Next

Leave a Reply