لە باوەشی هیوا …. یوسف ئیبراهیم
باڵت گرتووە بەئاسمانی هیواوە ئەفریت
هەزار جار ون ئەبم لە بێ دەنگیت
روو زەردێکی لە پایزی ئاشقێک زەردەخەنەم بۆ ئەکەی
لە مینبەرێکی رووخاوەوە بانگمان ئەکەی
خۆشەویستی، خۆشەویستی
لە باوەشی مەرگ نادۆزرێتەوە
بەزیندوویی بیکەن بەسەروایەک
تا ئەژین
رق تەنها بەرامبەر رق بگرن
کەباڵتان گرت هەڵفرن
بەدەوری یەکتری
نەبن بە گیانەوەرێکی کۆچەری
کە هەر وەرزەو کەسێ لە باوەش کەن
کز کز بە گوێی مندا ئەچرپێنی
دروود دروود بۆ گیانی پاک
لە جەستەت هەڵگرە تا ئەتوانی
دروود دروود بۆ رووخسارێک
فریاد رەسە بۆ دڵتەنگی
نەیشێوێنی تا ئەتوانی
منیش دەستی بچوکت ئەگوشم
سەرت دەخەمە سەر سینەم
وشەکان سەمایەکی سەیر لە قورگم ئەکەن
دەڵیم جێ پێت ئەگرم
دوور یان نزیک
قژم لادەبەم
وەک تۆ
سەمایەک لە ئاسمانی هیوا ئەکەم
یوسف إبراهيم
—————————-
تێبینی : هیوا لەم شیعرەم بەدوو مەبەستە یەکەم وەک هیوا خۆی، دووەم وەک نەخۆشخانەی هیوای سلێمانی.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
