منداڵی کوژراوێک …. شیعر – نووسینی:حـەمە ھـیـوا
ئەوەتام دەبینم
دەبینم پیاوێکی ڕیشسپی
فرمێسک بە چاوانیدا دەبارێت
پیاوێکی پشت چەماوە
جاڕ دەدات بە ھەورەکاندا
ھاواری خودایەک دەکات
خودایەک
بێ پیرۆزی کتێبەکان
خودایەک
بێ خاچ
بێ شمشێر
بی بەھەشت و دۆزەخ
خودایەک
کە ئاگری سوری
ئەم دنیایە دەکات بە باران
دەیبارێنێت بە سەری
کوژراوەکانی شەڕ،
لە جەنگدا منداڵێکم بینی
منداڵێک
قاچەکانی تا ئەژنۆی بڕاو
منداڵێک
خوێنی مەییو
بە لوتیدا شۆڕدەبێتەوە
منداڵێک بە بەرچاویەوە
پێغەمبەر پەرستەکان ھێرشیان ھێنا
ھێرشیان ھێنا و دایک و باوک
بونە قوربانی
منداڵێک دەبینم
پڕ بە گەروی دەقیژێنێت
خودایە!
ئەی خودای
شەوە تاریکەکانی من
ئەی خودای دڵە شەھیدەکەی من!
خودایە تاوانم چیبو
وەک پێغەمبەرەکان دەستت نەھێنا
بەسەرمدا
وەک پێغەمبەرەکان
نێرینیەکی نورانیت
لە ئاسمانەوە بۆ نەناردم!
من چیبکەم
ئەودەم نەبووم
ئێستا من
تفەنگ دەبینم
خوێن دەبینم
برین دەبینم
بێ نازی دەکێشم!
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
