ژن، مه‌كوژن … ستار ئه‌حمه‌د
كاتێك تاڵه پرچی
شۆڕه ژنێك ده‌قرتێنن
خوێن له‌له‌شدا راده‌وه‌ستێ
دڵی ژیان ..
له‌ترپه‌و ئاواز ده‌كه‌وێ
چیا سه‌ری خۆی ده‌ڕنێ و
چاوی به‌مه‌لێك ناكه‌وێ
چۆن دڵتان دێ
ژن ده‌كوژن
بۆچی هه‌تاو له‌بار ده‌به‌ن
مانگ له‌گڕا ده‌سووتێنن
چۆن ده‌توانن
رازی دایكان بمرێنن
شیعر له‌شاعیرو
ئاواز له‌به‌سته‌و
ده‌نگ له‌سه‌دای دابڕێنن
كه‌ژنێك بسكی سوور ده‌بێت
به‌تابلۆی خوێن
نیشتمان گه‌رووی ده‌تاسێ
مناڵ باوكی ناناسێ
خاك سه‌رگه‌ردان
به‌دوای جوانیا وێڵ ده‌بێ
قه‌ڵه‌م تینووی
ماچی لاپه‌ڕه‌و هێڵ ده‌بێ
ژن مه‌كوژن
نه‌با دڵی یه‌زدان بشكێ
ئاسمان خوێناوی لێ بڕژێ
كه‌ژن نه‌بێت
كۆرپه له‌لانك ده‌تۆرێ
مرۆڤ بێ نیشتمان ده‌ژێ
ژن مه‌كوژن
ژیان له‌سێداره مه‌ده‌ن
له‌ژنا واتا ده‌به‌خشێ
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
