Skip to Content

417 Views

ئاژه‌ڵانی خوێنه‌ر … عه‌بدولموته‌ڵیب عه‌بدوڵڵا

ئاژه‌ڵانی خوێنه‌ر … عه‌بدولموته‌ڵیب عه‌بدوڵڵا

Be First!
by October 27, 2016 General, Poems
image_print

له‌ سێبه‌ری ئه‌و دارستانه‌ له‌به‌ر كتێبان ده‌مێنم
بیرم له‌ گه‌ڵا ئاڵاوه‌
دڵم تووند تووند وه‌ك چۆله‌كه‌یه‌كی جێماو ده‌جریوێنێ‌
له‌به‌ر رۆناكی خه‌ریكم
ده‌گه‌مه‌ كۆتایی باران
وه‌ك ئه‌وه‌ی خۆم ونكردبێ‌ كتێبێكم له‌ ده‌ستدایه‌.

ئه‌و دارستانه‌ وه‌ك كتێبان ده‌خوێنمه‌وه‌
عاشقه‌كان له‌ ژێر سێبه‌ری خه‌یاڵم ده‌چنه‌ ماچان
له‌ پشته‌وه‌ هاوڕێكه‌م به‌ دوو ده‌ستان چاوم ده‌گرێ‌
له‌ پشته‌وه‌ زه‌وی به‌ بزه‌ پێمده‌ڵێ‌ دڵ ئارامه‌
هه‌میشه‌ دنیا ده‌جولێ‌ بۆ پێشه‌وه‌
كتێبێكم له‌ ده‌ستدایه‌ رێگا رۆناك ده‌كاته‌وه‌.

ئه‌و دارستانه‌ وه‌ك كتێبان مه‌ستم ده‌كات
ئاسمانی وشه‌م خه‌یاڵه‌، له‌ چێژی زه‌وی ناسره‌وێ‌
وڵات هیچی به‌سه‌ر هیچه‌وه‌ نه‌ماوه‌
به‌لادا دێ‌
وشه‌یه‌ك ده‌مگرێته‌وه‌، هاوڕێیه‌كی گه‌ڵا ئاسا
باوه‌ش بۆ كتێبی ده‌ستم ده‌كاته‌وه‌.

ئه‌و دارستانه‌ به‌سه‌ر هیچه‌وه‌ ده‌ڕوانێ‌
ئاژه‌ڵانی خوێنه‌ر ده‌ڵێن له‌به‌ر كتێبان ده‌مێنین
خوێنه‌رانی ئاژه‌ڵ ده‌ڵێن له‌به‌ر دارستان ده‌مێنین
من خه‌ریكه‌ له‌ هیچه‌وه‌ به‌رده‌بمه‌وه‌
با وه‌كو گه‌ڵا ده‌مانبا
مردنیش چه‌شنی كتێبان.

1/10/2016

Previous
Next

Leave a Reply