Skip to Content

فەرھەنگی ڕق …. چالاک ئـاغجەلەری

فەرھەنگی ڕق …. چالاک ئـاغجەلەری

Closed
by تشرینی دووه‌م 1, 2016 General

بە بڕوای من ڕق ناشیرینترین دەستەواژە و لێکدانەوەیە مرۆڤەکان بەرامبەر یەکدی لە پەیوەند بە نەفی کردنی کۆمەڵایەتی ، سیاسی ، ھزری و تا ئـەندازەی بایولۆژی بەکار دەربرێت، کێشەی دوینا ئـەگەر بەلایەکدا خواستی بەرژەوەندی ئـابوری ، سیاسی و فیکری بەشێکی دانەبڕوای ھەڵچونەکان بێت لە ھەمبەر بە کەس ،کۆمپانیا، دەوڵەت و ئـایدیا بە دیوێکی تردا ڕقێکی چەقبەستو لە دونیای سایکۆلۆژیەتی بەشەرەکاندا پاڵنەرێکی بەھێزە بۆ خاڵی کردنەوەی ئـەو ھەستە شەڕانگێزییەی لە ناخدا چەکەرەی کردوە ، ھەرچۆنێک کەلێنکی لەبار ئـامادەبێت بۆ ئـاوێتەبوونی مەبەستەکەی ، پەلەپیتکەی نیشان ماسولکەکانی لە گرژبوون و ئـامادەباشی بە دۆخی ئـارامی و پێکان دەسپێرێت، ئـەنجام بەلادانی گوڵبێنەی نەفەس بۆ جۆشدانی کورە سایکۆلۆژیەکەی و چاوەڕوانی ھەرچی زووتری برژاندنی نانێکە کە مەبەستێتی بیکاتە ژمەخۆراکی خەڵکانێکی برسی کە چاوەڕێی نانی کورەکەیین.

ھەرچی پەیوەندی بەژیانی ئـێمە و تاکەکانمانەوە ھەیە ئـەم موفھومە لە ئـامادەگیەکی بەردەوامدایە بۆ ھەرچی ناشیرین کردنی نەیارەکەی و مکۆمکردنی قەڵای ڕق و سەلماندی خۆی بە دونیایەک کە ڕوکەش بۆتە ئـامانج و لەو دونیایەدا گرنگ نی یە ناوەخنت چەندە شێوەی بە نەوتە ڕەشەکەی ژێر ووڵاتەکەیان بچێت، گرنگ بزەی سەر لێو و وێردی درۆینەی ڕۆژگار و ڕێک پۆشی سەر شاشەی تەلەفیزۆنەکانە.

کارەسات لەو ساتەوە کاروانی بەڕێدەخات تۆ بەردەوام بیت لە جۆشدانی شەمندەفەرێک بەڵام بێئـاگا بیت لە دوا وێستگەی کاروانەکەت.
دونیای ئـێمە تەژی و پڕە لەم ئـاراستە و تێرمە، خەڵکانێک تا دواساتی ھەڵوێست و ڕووبەڕووبوونەوە بەرامبەر نادادی ژیان ، لە کاتێکدا بە چەندین بەرزی و نشێودا ھاوەڵی یەک بوونە ، ئـەمڕۆ بێباکانە ھەڵەکانی دوێنێ دەکەنە ئـەستۆی ھاوڕێی ڕۆژانی سەخت ، خەتاباری دەکات بە ساتەوەختێ کە زۆر جیاوازە لە دونیای ئـەمڕۆ ، بۆ منی بینەر و خوێنەر گرنگە بزانم ھەڵوێست و دونیا بینی تۆ چییە بۆ ئـەمڕۆ و سبەی !!، دوێنێ واتە مێژوو گرنگە وانەی دوبارە نەکردنەوەی ھەڵەکانی لێوەرگرم ، بەمن چی ئـەمڕۆ لە پێکادانێکدا لە گەڵ ھاوڕێی ڕۆژانی کولەمەرگی یەکتر تەخوین دەکەن بەکارێکی قێزەوون ، تۆ پێش ئـەوەی پێناسی بەرامبەرت بکەیت خۆتناساند ، لە کۆتاییداتێگەیشتنی من بەرامبەر نەیارەکەت ھەمان بابیشە بۆ تۆی جاڕدەر.

خەیاڵ پڵاوی و سوڕانەوە بە خولگەی گەڕانەوە بۆ ساتی دەستپێکت پەیامێکە ناکرێت سایکۆڵۆژیەتی فەرھەنگی ڕقی دەسەڵات ھەروا بە ئـاسانی بیبوێرین ، تەماشا ڕقی جەلالی و مەلایی کە جۆش دەدرێت چی فەزایەکی ئـاوەژووی لە ژیانی ئـێمەدا خوڵقاندوە !!، ئـەم تێرمە لە ڕق گەورەترین دەسکەوتی فەراھەم کردوە بۆ دەستە و تاقمێک ، بە دیوێکی کەدا شوێنکەوتوانی ئـەم دوو دژە وەکو داری تەنور دەسوتێن و بەرھەمەکەشی بە پێش چاوە زەقەکانمانەوە دەبینرێت کێ گەز و بەزی پێدگرێت!!.

ئـەگەر یەک پلیکانێ بێنە خوارەوە سەرکردەکانی یەکێتی سەردەمی شاخ و شار بە نموونە وەرگرین ، بێباکانە یەکتر تاوانبار دەکەن لە کاتێکدا بیریان چۆتەوە ئـەو کەسەی تۆ پەنجەی تاوانی ئـاراستە دەکەیت ھەر ئـەو ڕۆژانەش ئـامادە بوو خۆی بداتە بە تیری دوژمن بۆ گەڕانەوەی گیانی تۆ، ئـەم پەیامەقێزەونانەی ئـێوە پێمان دەڵێت شک لە خشەی مار و مێرو تەنانەت سێبەرەکەشتان بکەین، دیارە ئـەم حاڵەتە بۆ تەواوی سیاسەتخانەکانی گۆڕەپانی کوردی ڕاستە بە کەمتر یان زۆرتر.

ھەر بۆیە تێرمی ڕق بەشێکی دانەبڕوای ژیانی سیاسی وکۆمەڵایەتی ( شەڕی عەشیرەت بە نموونە) ئـێمە، بۆ ئـەوەی دەربازبین لەم نەخۆشیە دەبێت بە ئـاگا بێنەوە و درک بەم نەخۆشیەبکەین بێشەرەم سەردانی سایکۆلۆژیست بکەین بۆ ھەرچی گەیشتن بە مرۆڤێکی تەندروست وئـاکام فەراھەمکردنی ژینگەیەکی تەندروست ئـامادەگی دەبێت.

لە کۆتاییدا مرۆڤ بۆ بەدەستھێنانی نان بونەوەرێکی شەڕانگێزە پێش ھەر شتێکی تر بەڵام ئـەوەی تۆ جایادەکاتەوە لە ئـەوانی دی ھۆشە ، پێویستە پەی پێ ببەیت و ھۆکار بێت بۆ گەیشتن بە خواستەکانت دوور لە فەرھەنگی ڕق ، ئـاکام دوور لە ھەستی تۆ پرشنگی ھۆش ئـایندەیەکی جوان بۆ خەڵکانی دوای تۆ بەرھەم دێت ، وە ھەرورھا!!.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish