تەنها ئاشتی هەورامی ڕاستی وت … عەلی مەحمود محەمەد

دانیشتنەكانی دەزگای میری لە رۆژانی رابردوو لە شاری هەولێر,باوەڕم وایە یەك هۆكار بۆ رێكخستنی هەبوو , ئەویش بابەتەكەی ئاشتی هەورامی بوو , باقی بابەتەكانی دی و سەرو سیمای سیاسەتەمەدارانی بەشدار بووی , تەنها بۆ مكیاجی بابەتەكەی ئەو بوو , ئاشتی هەورامی زۆر بە جوانی داهات و خەرجییە فەرمییە ئاشكراكانی دیاریكرد , ئەوەی گرنگ بوو لە بابەتەكەی , وە ئەوەی دەیەویست بیڵێت و روحی پەیامەكەی بوو, ئەم ڕستەیە بوو كە وتی ((20 ملیار دۆلارمان سوتاندووە)) , مەبەستی ئەو پارەیە بوو لە كەرتی كارەباو كەرتە گشتیەكانی دیكە خەرج دەكرێت و پشتیوانی حكومەتە لەو كەرتانە , وتی تا ئەم 20 ملیارە بەردەوام بێت لە خەرج كردن , نەوت ببێتە 100 دۆلاریش موچەمان پێ نادرێت , واتا چاك بونەوەی موچە پەیوەندی بە نەهێشتنی خزمەتگوزارییەكانی كەرتی گشتییەوەیە نەك نرخی نەوت ئەمە تەنها قسەی ئاشتی هەورامی نییە , بەڵكە ئەوەی كەمترین هوشیاری زانستی ئابووری هەبێت دەزانێت ئەمە پەیامی سندوقی دراوی جیهانی و بانگەشەی نیولیبرالیزمە لە جیهان و پەیامی حكومەتی هەرێمی كوردستان و پارتەكانی پێك هێنەری كابینەكەین , ئەی ئەوە نییە وا كەرتی كارەبا دەكرێتە تایبەتی ؟؟ بۆ ئەوەی ئیتر ئەو 20 ملیارە نەسوتێنرێت, نرخی بلێتی نەخۆشخانە گشتییەكان كراوەتە 3 هەزار دینار و پشتیوانی لە خزمەتگوزارییە گشتییەكان كەم كراوەتەوە , لە دوا پەیامیشدا هەردوو لیستی سەوزو نیلی مامۆستایان داوای 25 دینار كریێی خوێندنی مانگانە لە قوتابیان دەكەن .
لە سەرو بەندی بانگەشەی هەڵبژاردنی بۆشی باوك و كلنتۆن دەستەواژەیەك باو بوو دەوترا (( ئەمە ئابورییە ئەحمەق)) , ئابوری جۆرج بۆشی باوكی ئەحمەقی لە كۆتادا دۆڕاند , سەركەوتنەكان بەسەر سەدامدا دادی نەدا و فریای نەكەوت و نەبووە فریاد رەسی كورسییەكەی, بەڵێ ئەمە ئابوورییە و ئاشتی هەورامی راستی وت پەیامی سستەمێكی نەگریسی گەیاند كە دەسەڵاتی كوردی 25 ساڵە ئەزمونی دەكات, ئێستا لە هەنگاودایە بۆ سەندنەوەی تەواوی دەستكەوتەكانی رابردوو لە گەل كە بە خەباتی دەیان ساڵەی چەپ و كرێكاران و زەحمەتكێشانی ئەم وڵاتە بەدەست هاتووە , لە غیابی چەپی كاریگەرو ساندیكای بەهێزی كرێكاریدا , وا دەكات ئیتر ئاشتی هەورامی و حكومەتە نەگریسەكەی و پارتە سیاسییە باڵادەستەكان لە بری ئەوەی پارەی داهاتی كوردستان بۆ خزمەتگوزاری گشتی بسوتێنێت , پارەی گیرفانی رەنجی شانی هەژاران دەسوتێنێت .

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.