لە بری بەغدادی ، ئەردۆگان ! … عەبدوڵا ساڵح

دوا پەیامی بەغدادی بە ئاشکرا پێوەی دیارە کە ، لەلایەک باری ناوخۆی داعش ڕو لە لێژیە و لەلایەکی دیکە بانگەوازێکە بۆ هاوپەیمانانی کە ئەگەر ئاڵاکە کەوت ئێوە بەرزی بکەنەوە . تورکیای ئەردۆگان ئەوساش و ئێستاش بە گەورەترین و بەهێزترین هاوپەیمانی داعش لە ناوچەکە هەژمار دەکرێ ، دژایەتی ئەردۆگان لە پەیامەکەی بەغدادی دا جگە لە خۆڵ کردنە چاو بەمەبەستی بەڕیدالابردن ناتوانێ چیتر بێت ، من گومانم هەیە کە ئەگەر ئێستا بەغدادی لە تورکیا نەبێ ، ئەوا دوای گرتنەوەی ڕەققە ، ئەگەر بە زیندویی مایەوە ، هەر لەتورکیاوە بەرەو مەنزڵی تازەی گوزەر دەکا ، ڕەنگە لەژێر چاوپۆشی دەوڵەتدا ئەم سات و سەودایە ئەنجام بدرێ ! . ئەوەی پێی وایە بەغدادی ئەردۆگانی خستۆتە نێو زائیدی قەناسەکەیەوە ، یا فری خواردوە، یا لە ئەجیندای ئیسلامی سیاسی کەمتر ئاگادارە . ئەم ئەجیندایە، کە ئاڵا هەڵگرەکەی لە ئێستادا داعشە، وەک ڕادیکاڵترین هێزی ئەو بەرەیە . زۆرن ئەو هێزە ئیسلامیانەی ئەمڕۆ لەمەیداندا وەک هێزی میانە ڕەو خۆیان وێنا دەکەن تاکو هەل و مەرجیان بۆ لەبار بێ ئەمجا حەقیقەتی خۆیان بۆ کۆمەڵگا دەرخەن کە نمونەیەکی دیکەی داعشن ! ئەمریکاو ڕۆژئاوا زۆریان بە باڵی ئاک پارتیدا هەڵدا کە نمونەی ئیسلامی میانە ڕەوە ، ئێستا راستی ئەو ” میانەڕەویە ” لەسەر دەستی ئەردۆگان دەرکەوت !
پەلاماری هاو سەرۆک و ئەندام پەرلەمانەکانی هەدەپە جگە لەوەی پەلامارێکی دڕندانەیە بۆ سەر مافی ڕەواو بێئەملاوئەولای دانیشتوانی کورد زمانی تورکیا ، جگە لەوەی پەلامارە بۆ سەر حیزبێک کە لەسەر ئاستی تورکیا شەش ملیۆن دەنگی هێنا ،جگە لەوەی دیمۆکراتیەتەکەی ئەردۆگان بەبادا دەبا ، ئاڵقەیەکە لە زنجیرەی جێبەجێکردنی ئەو ئەجیندایە ، ئەڵقەکانی پێشوتر بریتیبون لە ، دەستگیرکردنی ڕۆژنامە نوسان، داخستنی کەناڵە تەلەفزیۆنیەکان ، ڕاپێچانی نەیارانی ئەردۆگان بە بیانوی جۆراو جۆر ، لەسەرکار لابردنی دەیان هەزار کارمەند ، پەلاماری هێزە چەپ و کرێکاریەکان ، شەڕ لە دژی پەکەکە، وێرانکردنی شارەکانی کوردستانی تورکیا و ترس و تۆقاندن و دەستگیرکردنی هاوڵاتیانی کوردزمان ، ئەمانەو گەلێکی دیکە لە ڕەفتاری فاشیستیانەی ئەردۆگان لەسەر ئاستی ناوەوە . هاوکاری و پشتیوانی ئاشکرای داعش ، پەلامار و دآگیرکردنی خاکی سوریا ، هاتنە ناو خاکی کوردستانی عێراق ، شەڕو ئاژاوە نانەوە لەگەڵ ئەرمینیا ، پشتیوانی لە بەشە نا شەرعیە تورکیەکەی قبڕس ، دوژمنایەتی لەگەڵ یۆنان ، ئیپتیزازی ئەوروپا و بەکارهێنانی کارتی پەنابەران بۆ دەسکەوتی سیاسی لەسەر ئاستی دەرەوە . ئەمانەو گەلێکی دیکە لە ڕەفتاری فاشیستانە ، ئەو ڕێبازەن کە ئەردۆگان گرتویەتەبەر بۆ وەلانانی نەیارانی خۆی لەسەر ئاستی ناوەوەو تەنانەت لەسەر ئاستی ناوخۆی حیزبەکەشی بەرەو جێبەجێ کردنی ئەو سراتیجیەتە درێژ ماوەیە کە دوا ئەڵقەی بریتیە لە زیندوو کردنەوەی خەلافەتی عوسمانی و سەپاندنی یاساکانی شەریعەت بەسەر کۆمەڵگادا .
هەر هەڵوێستێک بە مەبەستی دەڕبڕینی ناڕەزایەتی و نیگەرانی تا دەگاتە ئیدانە کردنی ئەم سیاسەتە ، بەتایبەتی لە پەیوەند بە دەستگیرکردنی سەڵاحەدین دەمیرتاش و ڤیگەن یۆکسیکداغ ،لە هەر کەس و لایەنێکەوە بێت جێگای تەقدیرە ، بەڵام ناکرێ بیرمان بچێ کە هەڵوێستی ” ژێر لێو ” لەژێر فشاری شەپۆلی ناڕەزایەتی جەماوەردا ڕوون و ئاشکرایە و ماهیەتی خاوەنەکەی و سات و سەودای ، چ ئابوری سیاسی و چ ئایدۆلۆژی ، لەگەڵ ئەو ڕژێمە فاشستیە دەردەخا .
بێشک دەست کۆتا کردنی ئەو دیکتاتۆرە کاری بەتەنیا دانیشتوانی کوردستانی تورکیا نیە ، دەخوازێ کە هەموو قوربانیانی دەستی ئەم سیاسەتە لەسەراسەری تورکیا بە هەموو چین و توێژو نەتەوەو ئاینەکانەوە ، کرێکاران و زەحمەتکێشان ، لاوان و قوتابیان خەباتی یەک دەنگ و یەک ڕیزی خۆیان پتەو بکەن بەمەبەستی پوچەڵ کردنەوەی ئەم سیاسەتە دژی ئینسانیە ، بەم کارەیان خۆیان و وڵاتیان و ناوچەکەش لەو سەرکێشیانەی ئەردۆگان و هاوپەیمانانی ڕزگار دەکەن .
5 / 11 / 2016

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.