پێکەنینی ناو گریان.. عەلی حەمەڕەشید بەرزنجی

منی بچکۆلە ھەر کە ھاتمە ژین
بە گریانی من کەوتنە پێکەنین
فرمێسکی شادی لە ڕووتان باری
بۆ ئێوە بووم بە مایەی بەختیاری
ھەریەک بەجۆرێک وەسفی دەکردم
چی جوانیم ھەبوو بۆ خۆی دەبردم
یاخود ھەرکەس کێی خۆشبوویستایە
دەیوت بەبە گیان وەکو ئەو وایە
ھەر ڕۆژەی جۆرێک خۆم نیشان دەدا
ھەتا دڵخۆشی بە ھەمووان بگا
ڕۆژێک وەک بابە ڕۆژێک دایە گیان
ڕۆژێکیش تەواو وەکو ھەردووکیان
بەڵام ئێستاکە ھەروەکو خۆم وام
نازدار و شیرین جوان و بێ ھاوتام
ھەر سەرنج دەدەن لە دەست و قاچم
بۆ تەنھا ساتێک لەبیرتان ناچم

٢٠٢١/١/١