شیعر/ بەرماڵەکەی دایکم.. شەماڵ بارەوانی

لەناو بەرماڵەکەی دایکمدا
ڕق
قەدەغەکراوە
و
ئایین تێکەڵ بەسیاسەت نەکراوە

بەرماڵەکەی دایکم
بەرماڵێکی لەخوا نەترسە
و
هەر لەمناڵیەوە
فێری عیشقی خوا کراوە

بەرماڵەکەی دایکم
هەمان بەرماڵەکەی
شێخ سەعیدو سەیدا ڕەزایە

بەرماڵێکە
دەستێکی ڕوو لەئاسمان و
دەستەکەیتری
لای قازی پێشەوایە

بەرماڵەکەی دایکم
بەرماڵێکی مرۆڤ دۆستەو
بۆ هەموان دایمە لەنزایە

بەرماڵێکە
تەریقەتی خۆشەویستی
لەمەولانا وەرگرتووەو
ئەخلاق لەبودا

بەرماڵەکەی دایکم
ڕەگی دەچێتەوە
سەر خـودا.