سەفەرێک لەگەڵ خۆم… جەلال عەبدوڵا ساڵح

چەمێ ڕوا، جۆگەلە دێ
گەڵا دەمرێ، لق گوڵی گرێ
نازانم سبەی چی دەبێ
ژیان ئێستایە نەک دوێنێ

…

خۆر لە پەنجەرەی هەورەوە
سەیرم دەکا و لێم ون دەبێ
خەیاڵم وا لەلای خەجێ
تەشی و خوری دەلاوێنێ

…

چی لە جوانی تاڤگە بکەم؟
چاوم وەک جاران نایبینێ
بە کۆڵانی کۆچ دا دەڕۆم
دڵ لێ ئەدا، قاچ دەترسێ

…

شەو دەڕوات و تاریک دادێ
کۆڵانی خەم تەواو نابێ
ڕێگای ونی ژیان دەبڕم
ئەمڕۆ لێرە سبەی لەوێ

…

وەک چۆلەکە دەجریوێنێ
هەستی غەریبیم بۆ ئەوێ
چۆن بگاتە هەتاوی دێ
پێی هیلاکم ، هەنگاوی ڕێ

…

دەنگی مەل و جوانی گوڵێ
ڕۆحی ماندوم دەلاوێنێ
ئەو قیبلەمە، لەهەرکوێ بێ
ڕووی تێ دەکەم ، خۆشم دەوێ