وەرزی باران.. شیعری\ سمکۆ ئەحمەد ڕەشید

کراسەکەم
هێشتا بەسەر تەنافەکەوەیە
ئەوەی با بردی
ترپەی تەمەن بوو

دەست لە سێبەری درەختەکان
دەکێشمەوە
بەژنە هەتاوێکم هەیە
فێنکترە

هەموو بۆشاییەکانی خۆم
بە (تۆ) پڕ دەکەمەوە
تۆ وشەی گونجاوی منی

،بەسەر ستونەکانەوە
ئاڵاکان گیان لە دەست دەدەن
کە با دەخەوێ

لە ترافیکەکان ناوەستم
کە لەگەڵمای
هەموو ڕەنگەکان سەوزن

،مەسرەفگەرا نیم
وەرزی باران
چەترێک بۆ هەردوکمان بەسە

،مووچەکەم نا
ترپەی دڵ و هەڵمی هەناسەم
دەخەمە سەر هەژماری تۆ

،سپیندارەکانی دێگەڵە
بڵێی سەر بە کامە زۆن بن
!کوکووختییەکان

دەڕۆم
ناگەمە هیچ شوێنێک
! ئاوارە شوێنی کوا

کەس ناگاتە ئەوسەری کۆڵان
لە هەگبەی (با) بۆگەن دەکا
.خەونی مرۆڤ