لەم پاییزەدا، گوڵێک.. نەوزاد بەندی

( بۆ ساڵڕۆژی شاعیری شەهید بەکر عەلی )

من زۆر ڕقم
لە ساڵیاد و
کۆڕی ساڵڕۆژی ناو هۆڵ و
شیعر و پەخشانی بۆنەیە ..
چونکە پڕن لە بازرگانانی قافیە و
قاچاخچێکانی عروز و
کێشی پەنجە و
دەڵاڵەکانی پاقلاوە و بیبسی کۆڕ و ..
نەخوێنەوار و قۆڵبڕی
ژێر پردەکەی
زمان و ئەدەبی کوردی ..
پڕن لەوانەی بە مەتر و
لە گۆترەیش
هەڕاجی ئەکەن،
شیعر و پەخشانی
سەقەت و
مردارەوە بوو ، بۆنکردوو،
بەرگێکی زەقی
هەرزانی
مۆسیقایەکی
دزێنیی لەبەر ئەکەن ..
کڵاوێکی لەسەر ئەکەن ..
هەم ئەفرۆشن و هەم ئەکڕن ..
بە تاک و کۆ ..
چۆنت بوێ وا دایدەدڕن ..

٭ ٭ ٭

بەڵام بەکر ..
لە ساڵڕۆژی مەرگی تۆدا،
ئاڵای سپی هەڵئەکەم و
خۆمت بۆ ئەکەم بە هۆڵ و
کۆڕ و ساڵیاد و ڤیستڤاڵ ..
پڕ پڕ ئەبم،
لە باوک و دایکی سکسووتاو ..
لە گەنج و له پیر و مناڵ ..
سیخناخ ئەبم
لەو شیعرانەی
ڕێیان نەدای بیاننوسی ..
نوقوم ئەبم
لە دەریای ئەو تابلۆی شیعر و
پەخشانانەی،
بۆ گەلێکی کوێرت نوسین،
کەچی کەس لێتی نەپرسی ..
بەڵام بەکر ..
لە ساڵڕۆژی مەرگی تۆدا،
ئەبم بە مۆم، ئەتوێمەوە ..
لە پێش ئەوەی بکوژێمەوە،
لەو سەرەوە
بە ئاگرەوە دێمەوە ..
ئەبمە شایەرێکی شەیدای
زۆربڵێ و
ڕەشپۆش و تووڕە ..
ئەوەی ئەیڵێم نایڵێمەوە ..
چەک ناوێرێ
بە تەنیشتمدا تێپەڕێ،
پێش ئەوەی خۆی بچرکێنێ،
بە ڕوویدا ئەتەقێمەوە ..

٭ ٭ ٭

لەم وەرزەدا کە نازانم وەرزی چییە ..
لەم مانگەدا،
کەس نازانێ ڕۆژی چەندە و
هەفتەی چەندەم ..
داستان و ڕۆمانی موچە،
هەموویانی داپۆشیوە ..
لەم بازاڕی خەزانەدا،
بازرگانەکان خەریکی
پڕکردنی
تانکی ئێڵ LPG ی زستانن،
میللەتیش ئەپاڕێتەوە،
خوا بۆ خاتری
یەک یەک ناوە جوانەکانت،
تا قەڵای دزان تەختەبێ ..
زستانەکەی بێ شەختە بێ ..!
بەڵام بەکر ..
کە هاتیتە ناو شارەوە،
بە لای فولکەی کاوەی ئاسنگەرا مەڕۆ،
نەوەک لە کۆڕی تەرمێکا،
عوسمانێ ..شەهید عوسمانێ،
خەڵتانت کەنەوە لە خوێن ..
بە لای فولکەی کۆترەکەیشا ئاگادار بە،
بە پشت حەسیب ساڵحا بڕۆ،
نەک لە لەشی دابێژراوی ڕێژوانەوە،
فیشەکێک دزە بکات و
هەڵتکێشێتەوە لە خوێن ..
ئاگادار بە،
لەم پاییزە خەمگینەدا،
لە مەیدانی سینی و پیاڵەکەی سەرچنار
نەکەی لادەیت ..
فریای ڕاکردن ناکەوی،
چونکە دڵنیام تۆ هێشتا
ئۆتۆمبێلت نییە و
پیادەیت ..
بەکر گیان،
ئێستا بۆ کوشتن،
فیشەک هیچ باوی نەماوە ..
درۆن و دەبابە و ساروخ..
ستینگەر ..
تۆپی نەمساویی،
لەپڕ لەناو گەڕەکێکا،
ئاهەنگێکی شەو ساز ئەکەن..
مانۆڕێکی شەو ساز ئەکەن..
گرنک نییە،
چەند باڵەخانە تەخت ئەبێ ..
چەند سکی دایک ئەسوتێنن
چەنێ مناڵ بێ ناز ئەکەن..
بەکر گیان،
ئامان بە تەنیشت،
پارکی ئازادیدا نەڕۆی ..
هێشتا زەوی و خانوو ماون،
ئەیانەوێ پاوانی کەن ..
وەک چەکی دزراوی پۆلیس،
بیفڕێنن و
لە شانی کەن ..
نەک درۆنێ بتکوژێتەوە دووبارە ..
بتکاتەوە
بە ئاگری نەورۆزێک و
بە پێی ڕۆژژمێری موچە،
لای وابێ کەڕی بەهارە ..!

٭ ٭ ٭

بەکرەکەی دڵ ..
بەکرەکەی ژوان و ئەوین و
سروشی شیعر و
بارانی عەشق و جوانی ..
گەر هاتیتە ناو کۆڵانەکانی شار و
کەس نەیناسیت ..
کەس بەو سەردانەی نەزانی،
دڵگیر مەبە ..
ئێستا شارەکە پڕ بووە،
لە سێ چارەک و
دشداشەی
سەرمەد و
ئەبو ڕیهام ناو ..
بێ ئاگا لە شیعری کوردی ..
بێ ئاگا لە تۆ و
لە دڵشاد مەریوانی ..
لە دوای تۆوە،
هەزار جار ئەدەب و هونەر،
کرانە قۆچی قوربانی ..
ئێستا بیریار ئەو کەسەیه
تاوەر و کۆشک و پڕۆژەی
چۆتە حەوت تەبەقەی ئاسمان ..
ئێستا لینین ملیاردێرە،
کۆمۆنیست بۆتە جێنتڵمان ..
لاشەی شار یەکپارچە بۆتە
بالوکەی پڕۆژە و تاوەر ..
نەما سەردەمی جیڤارا و
مەکسیم گۆرکی و
خەبات دژی بۆرژوازی و
گیانبازیی شیرین و فەرهاد ..
سیامەند ..
خورشید و خاوەر ..
ئێستا تەنانەت بیریار و ڕۆژنامەنوس
زۆربەی بندیوار و لۆتین ..
ئێستا جەنگاوەرانی شاخ،
هەموویان بوون بە ڕاسپۆتین ..
قارونیان تێپەڕاندووە ..
بە هیچ شتێکیش لاناچن ..
نە بە ووتار
نە بە شیعر ..
نە بە دەنگدان ..
نە بە فەرتەنە و ڕێپێوان ..
لەو خەڵکە بوون بە سیکۆتین ..

٭ ٭ ٭

بەکر گیان ..
شاعیری ماف و
حەق و جوانی ..
گەر بە قسەم ئەکەی مەیە..
ئەترسم بکەویتە بەر
دەسڕێژی قاتیی و گرانیی ..
ئەوسا مەگەر
لەسەر گڵکوکەت بنوسین؛
ببوورن،
مەرگنامەکەی
هەڵەی چاپ بوو،
ئەم شاعیرە،
لەسەر داڵدەیەکی
بیست سی مەتری نەکوژراوە ..
لەسەر شیعر و
حەقبێژیی دانەبێژراوە ..
لە ووڵاتی پڕ ملیاردێری بێکار و
وەبەرهێنی پاوانخواز و
بازرگانی کون فەیەکون ..
لە شاری ڕۆشنبیریی و پڕ
دیکارت و کانت و ئەفلاتون ..
لە شاری ڤێلا و تاوەر و کۆشکی
سەر شاخ و بەرزیی و گرد
ئەم شۆڕشە پڕ لە شیعرە..
ئەم بەکره ..
ئەم هاوارە ..ئەم ئاگرە،
لەبرسا مرد …! ٭

٭ ( دوا دێڕ لە بۆن و تامی دێڕێکی عەبدوڵا پەشێوەوە وەرگیراوە :
ئالێرەدا
مناڵێکی چاو گەشی کورد
لە برسا مرد )