جاڕنامەی گەردوونیی مەرگی مرۆڤ.. شیعری نەوزاد بەندی

ئەو هەموو ئامێرەیان دۆزییەوە و
مرۆڤیان وون کرد ..
شەقامەکان پڕ بوون لە ئوتومبیل..
ئاسمان پڕ بوو لە تاوەر،
گۆڕستان و
شێتخانە و
زیندان و
خەستەخانەکانیشیان پڕ کرد لە مرۆڤ ..
ماڵەکانیان پڕ کرد لە ڕوناکیی،
دڵەکانیان پڕ کرد لە تاریکیی ..

ڕۆژێک دێت،
ئەوانەی کە ئەمرن،
ئاهەنگیان بۆ ئەگێڕن و
ئەوانەی لە دایک ئەبن، پرسە .

بە قەڵەمێکی سوور ،
هێڵێکی پێچاوپێچیان کێشا و
ناویان لێ نا سنوور ..
نەیانهێشت کەس بچێتە دەر
نەیانهێشت کەسیش بێتە ژوور ..
نان و
ئاو و
دەرمان و
شیری مناڵ
لەو دیو سنوور ڕاوەستێنران ..
ئیتر ڕۆژانە ژمارەی
ئەو مناڵ و
پیرەمێردانە باس ئەکران
کە بە برسێتیی و نەخۆشیی،
لە دار ئەدران …

ژمارەیەکی حیسابیی
نۆ سفر و ..دوانزە سفریان،
کرد بە موڵکی پیاوکوژێکی
زۆمبی دڵ ڕەق ..
نانی نەهێشت، هەمووی دزی ..
ئاوی نەهێشت، هەمووی فرۆشت ..
نەوتی نەهێشت ..
دایبی نەهێشت ..
هەمووی فرۆشت ،،
خەوی نەهێشت ..
پێکەنینی پابەند کرد
بە کەوچکێ چێشت ..
گسکی دا لە داب و نەریت ..
میزی کرد بە خووڕەوشتا ..
جەڵتە و شەکرەی بەرزکردەوە و ..
مرۆڤی لەو نشێوانەدا
بەجێهێشت ..

ئێستا ئیتر …
مردن بووە بە دیارییەکی نهێنی ..
زۆری نەماوە، ببێتە
بۆنەیەک و ..
دەست ماچ کردن و خوازبێنی ..
زۆری نەماوە ،
وەک سەرەی غاز و بەنزین،
لە پارشێوەوە بۆی ڕیز بن ..
وەکو خەڵات و مزگێنی ..

هەرچی ڕۆژتان ماوە ،
بیپێچنەوە و
بیدەن بە تڕەمپ و
سەرۆکە بۆینباخ لە ملەکان ..
دنیا موڵکی بێ چەند و چوونی ئەوانە ..
ڕۆژ و شەوتان زۆر خەسار کرد،
بە دیار خەم و
چاوەڕوانی موچە و دامەزراندن و غاز ..
قیستی شوقە و ..
هی قەنەفە و ..
هی کۆمپانیای مناڵۆچکەی سیاسەتباز ..
ئەوەی ماوتانە لە تەمەن،
پێشکەشی کەن بە تەمەنی
سەرۆکی فەرماندە و دەگمەن ..
هەمووتان بە قوربانی بن ..
بە تۆزی پێ و میوانی بن ..
ئەو لە سکی دایکتانەوە،
داگیر و پاوانی کردوون ..
ئەم مەمرە و مەژیەتان لە چی ؟
وەڵا وە بیلاهی مردوون ..