ئایەتی زەیتون …. یوسف عەبدوڵڵا

تۆ کە لە بۆتانی و
خانی ناگەیت،
تەفسیری ئەم سورەتانەت چۆن پێدەکرێ!
…
ئەم ئایەتانە مەخوێنەوە..
ئەو کاتەی میحرابەکان دەبنە تونێلی بارووت،
ئەم بەرماڵی نوێژە، دەبێتە سفرەی هەژاران!
…
تۆ کە هێشتا..
خوێنی قەتڵی فریشتەکان..
بەناوچاوانتەوەیە،
سوژدەی چی دەبەیت!
…
ناترسی سەیدە پیرەکەی عەفرین،
لە کێوی هەوارەوە..
خودا بکات بەگژتا!
…
بەمزی و تورتی زەیتون قەسەم
ئەم بەهەشتی زەمینە
بێ درەختی سەوز و
ئاسمانی حەز و
زەوی پڕ چێژ هەڵناکات
…