گیانگۆڕ … فەرەیدون سامان

هێندە بیرت دەکەم
دەڵێم ئاخۆ دەبێت تۆم لە بیر بچێتەوە
وا دەزانم پەتی هەموو سێدارەکانە
لە گەردنی مندا ئاڵاون
وا هەستدەکەم ئەوە منم
من دەخنکیم…
کوڕەکەم رامین بگەڕێوە
چۆن ئاو پەژیوان بێتەوە
تۆش بۆ سەرچاوەکەی خۆت بگەرێوە…
یان خۆرەتاو ئاسا بە نابەلەدی
لە خۆر جوێ بێتەوە
منیش رادەستی ئامێزی ئەڤینی جاویدانی
تۆ دەبم…
لەنێو تۆدا
لە نێو فرمێسکی خوێنینی دایکەکاندا
دەتوێمەوە
دەبم بە تۆ
دەبم بە پەپوولەیەک باڵدەگرم و
هەڵدەفرم
بەرەو ئاسۆ
بەرەو شکۆ
بەرەو هەواری شەهیدانێ
کە بۆنی خاک وخۆلی نیشتمان مەستی کردن…

فەرەیدون سامان