ژنێكی پڕ پڕ له‌ درۆم.. چنوور نامق

له‌رۆژێكی وه‌ك ئه‌مڕۆدا
پێش هه‌زار ساڵ
چیتر
نه‌متوانی گوڵه‌كان ئاوده‌م
بومه‌ ئینجانه‌ی چوار ته‌مه‌ن بۆ ژاكانیان
لێوم بۆ هه‌ر باده‌یه‌ك برد هه‌ر گاڵته‌جاڕ بوو وه‌رزی دڵ
شه‌كره‌ زه‌قنه‌بوته‌ لێوم كه‌ ناتوانم
تامی ماچه‌كان بكه‌م و
نزای ئه‌وین بمباته‌وه‌ بۆ كۆشی خۆی
ئه‌ی بۆ بمبا؟
كه‌ نه‌متوانی ببم به‌ژنێكی زانا له‌ واڵاكردنی ده‌رگاكان بێ‌ ته‌قه‌ته‌ق
كه‌ نه‌زانبووم له‌ ئاودێریی شتڵه‌كانی تامه‌زرۆیی
له‌هه‌ڵدانی ریزه‌ ماچه‌كان له‌ بادا…
ئێستا خۆم ئه‌توانم بڵێم
له‌شاری دڵ فاشیلترین ژنی ئه‌م مێژووه‌ سه‌رسپییه‌م،
هیچ
كتێبێكی عه‌شق نه‌ما پیاسه‌ی بێ‌ مه‌یلیی تیانه‌كه‌م
به‌بێ‌ ئه‌وه‌ی توانام هه‌بێ‌ نۆته‌ سوره‌كانی ئه‌وین وه‌رگێڕمه‌ سه‌ر زمانه‌كانی په‌پوله‌
به‌بێ‌ ئه‌وه‌ی بوێریكه‌م چه‌پكه‌ گوڵێك بده‌مه‌ ده‌ستی یاره‌وه‌
هه‌زار ساڵه‌ له‌ قوتابخانه‌كانی ئه‌وین له‌ پۆلێكم
له‌دایكمه‌وه‌ بۆم ماوه‌
ترس
خورپه‌
پێنه‌كه‌نین
هه‌زار ساڵه‌ فێری ته‌قوی و تاعه‌ت ئه‌كرێم،
ژنێكی نه‌وێری به‌ر باران چۆن ئه‌توانێ‌ په‌ڵه‌ بدا؟
چۆن ئه‌توانێ‌ به‌ته‌ماشا هاتوچۆی هه‌وره‌كان راگرێ‌؟
چۆن ئه‌وێرێ‌ ئه‌ستێره‌كان بگرێت به‌ده‌سته‌كانیه‌وه‌؟
چۆن ئه‌توانێ‌ شه‌پۆله‌كان به‌گیر بێنێ‌؟
زه‌نگ
ده‌نگ
هێڵی سوور و
فرمانه‌كان
مه‌كه‌ و
مه‌ڕۆ
هه‌زار ساڵه‌ شێتم ئه‌كا
هه‌زار ساڵه‌ گریان ژیرم ئه‌كاته‌وه‌ و به‌خۆی ئه‌گری
ژنێكی پڕپڕ له‌ درۆم
له‌ نمایشی هه‌تاییدا وا وشك ئه‌بم
هه‌زار ساڵه‌ پێكی ترساو هه‌ڵئه‌ده‌م و له‌ پۆلی ئه‌وین قوتابیم
به‌بێ‌ ئه‌وه‌ی چه‌پكه‌ گوڵێك بده‌مه‌ ده‌ستی یاره‌وه‌
به‌بێ‌ ئه‌وه‌ی بوێریكه‌م
وشه‌ی عه‌شق وه‌رگێڕمه‌ سه‌ر زمانه‌كانی باڵنده‌
به‌بێ‌ ئه‌وه‌ی توانام هه‌بێ‌
ماچێك له‌ بادا هه‌ڵبده‌م……

٥-١١-٢٠٢١




ترافیكه‌كانى ژیان دڵى ژنێك راناگرن … چنوور نامیق

تاقه‌تم چوو له‌‌م سروشته‌ بێئاگایه‌

رۆژێك ئه‌بم به‌ڕابوردوو

ئاوڕ له‌كه‌س ناده‌مه‌وه‌

نه‌ له‌ دوودڵیى نیشتیمان

نه‌ له‌نوێژى په‌پوله‌یه‌كى تازه‌فام

نه‌له‌ درودى ئێواره‌یه‌كى ره‌نگپه‌ڕیو

نه‌ له‌هه‌واڵى سواوى تیڤییه‌كان


ده‌مه‌و كۆچه‌

نه‌شه‌قام بیرى من ئه‌كا و

نه‌دڵى به‌تاڵى پیاوێك داگیر ئه‌كه م

هه‌ر ئه‌ڕۆم و

ئاوڕ له ‌زامى نیشتیمان ناده‌مه‌وه‌

نه‌ له‌ ئاگره‌ سه‌رشێته‌كه‌ى شارى دڵم

نه‌ له‌ پاركه‌كانى شار و

نه‌ له‌ مناره‌ى شكاو و

نه‌ له‌ قه‌ڵا تاقانه‌كه‌م

لێره‌ په‌نایه‌ك شكنابه‌م

بیر له‌ دوا دێرى شیعرێكى قژ ئالۆزم بكه‌مه‌وه‌

هیچ چیرۆكێك بۆلاى ئێوه‌م ناباته‌وه‌

ئیتر له‌كه‌س توڕه‌ نابم

نه‌ رۆشنبیرى كۆیله‌ى حه‌ز

نه‌ سه‌ماكه‌رى دڵپاك و

نه‌ سۆزانییه‌ راستگۆكانى ئه‌م سه‌رده‌مه‌ رامناگرن

ئیتر ئه‌بم به‌ڕابوردوو

بیری شه‌قامى شار ناكه‌م

ئاوڕ له‌ ئاده‌مه‌كانى وڵات ناده‌مه‌وه‌

نه ‌له ‌نوسه‌ره‌ بێبابه‌ته‌كان

نه‌ له‌ هاوڕێ بێڕێگه‌كان

نه‌ له‌ درۆزنه‌ دڵسۆزه‌كان

نه‌ له‌ به‌قاڵه‌ گۆرانیبێژه‌كان

نه‌ له‌ هونه‌ره‌ سواوه‌كان

نه‌ له‌تۆ

نه‌ له‌گوڕگوڕ

نه‌ له‌و…..

كاتێ ئه‌بم به‌ڕابوردوو

ده‌بمه‌ تارمایى ماڵه‌كه‌م

ده‌بمه‌ خانمه پاڵه‌وانى

ئه‌و رۆمانانه‌ى ژیانێك دڵدارم بوون و نه‌متوانى شه‌وێك له‌ پاڵیان بخه‌وم

ئیتر ئه‌و داگیركه‌ره‌ نیم

دڵى پیاوێك بكه‌مه‌ شار

ئیتر ده‌سته‌ سارده‌كانم

به‌ په‌نجه‌ره‌ى ژیانه‌وه‌ جێناهێڵم

ئیتر فنجانى شكاوى كاتى زیزبوونى عاشقان

تامى لێوه‌كانم ناكات

ئیتر و ئیتر و ئیتر

نه‌شه‌قام بیرى من ئه‌كا و

نه‌دڵى به‌تاڵى پیاوێك داگیر ئه‌كه‌م

1-4-2020.




ئای له‌مینا…. مینای دڵم ئه‌شكێنێ‌ … چنوور نامیق

كه‌لووی دوانه‌ باسی به‌ختم بۆ ئه‌كات و
پێكه‌نین رووم داگیر ئه‌كا
سه‌ر ئه‌نێمه‌ په‌نجه‌ره‌یه‌كی بێ‌ مینا
(ئای له‌مینا) ، دڵم ئه‌كاته‌ هه‌ڵمات و
ده‌ستی درێژی دره‌ختێك
له‌ په‌نجه‌ره‌ی شكاوه‌وه‌
ده‌یان جار دڵم ئه‌گۆڕێ‌…
له‌بێ مینایی په‌نجه‌ره‌ (ئای له‌مینا)
مینای دڵم ئه‌شكێنێ‌
به‌بێ‌ ئیزن
به‌ناو شاری نوته‌كی روحما گه‌شت ئه‌كا…
له‌بێ شوشه‌یی په‌نجه‌ره‌
چاوم لێیه‌
سه‌رده‌می تاعونی كامۆ و
ئه‌وینی دووری كۆلێرا
به‌دوای كۆرۆنا ئه‌گه‌ڕێن..
له‌ بێ مینایی په‌نجه‌ره‌
لێو ئه‌نێمه‌ سه‌ر پێڵاوی فڕیوی با
تا ته‌نیاییم كۆكه‌مه‌وه‌
سه‌ر ئه‌نێمه‌ سه‌ر خه‌می پیرۆزی زه‌وی
له‌سجودا خۆم بیر ئه‌چێ‌…..
له‌ سه‌رده‌می كولێراوه‌ به‌ڕێوه‌م و
وا سه‌رده‌می كۆرۆنایه‌
ناگه‌مه‌ جێ‌……
له‌بێ مینایی په‌نجه‌ره‌
گوێم له‌ شپرزه‌یی تۆیه‌
لێو ئه‌نێمه‌ سه‌ر ده‌سته‌ زبره‌كانی شه‌و
بۆ نازانی له‌رزوتای شه‌وان تاعه‌ته‌؟
له‌په‌نجه‌ره‌ی شكاوه‌وه‌
سه‌ر ئه‌نێمه‌ سه‌ر زه‌وییه‌ ده‌رده‌داره‌كه‌م
له‌ قوژبنی سه‌د ساڵ ته‌نیایی خه‌یاڵم
جیئه‌مێنم…
هه‌ڵبه‌سته‌كه‌م
كورسێكه‌ی خۆی ئه‌سوڕێنێ‌
باسی وه‌فای پشیله‌كه‌ و سپله‌یی سه‌گم بۆ ئه‌كا
باسی ساردی خۆره‌تاو و
دڵگه‌رمی مانگم بۆ ئه‌كا
باسی خوێندكاری سه‌لار و
مامۆستا لاساره‌كانی پۆلی تاعونم بۆ ئه‌كا
باسی عه‌شقێكی له‌ بیرچووی به‌ر ده‌رگای شه‌وم بۆ ئه‌كا
منیش بوومه‌ به‌بوكه‌ڵه‌ی
(ئای له‌مینا )
به‌ویستی خۆی ئه‌مجولێنێ‌

له‌ بێ شوشه‌یی په‌نجه‌ره‌
عه‌شقی سه‌رده‌می كولێرا
خۆی به‌ په‌نای روحما ئه‌كا و
ڤێرمینا به‌ده‌ستكێشه‌وه‌ به‌به‌رده‌مما دێت و ئه‌چێ‌ ….

له‌ بی َمینایی په‌نجه‌ره‌
هه‌ورێكی شپرزه‌ی ئاسمان به‌كه‌مامه‌ی گومانه‌وه‌
به‌سه‌ر باخه‌ قژ ئاڵۆزه‌كه‌ی روحی مندا
زۆر رۆمانسیانه‌ ئه‌بارێ‌
كه‌ده‌بارێ‌ ئه‌مكا به‌تۆ…
باوانه‌كه‌م
سه‌خاوه‌تی په‌تای عه‌شق
وێرانه‌ هه‌واری كردم…..
بێداریم مه‌كه‌ ئاوێنه‌
با نهێنی شه‌ونوێژی من
له‌پاڵ نێرگه‌له‌یه‌كی دڵپڕا
سه‌دای مینا نه‌شێوێنێ‌…

هه‌ڵبه‌سته‌كه‌م
ئێستا نه‌زان به‌ جاده‌كانی بێشاریم
نابینا به‌ لیمۆبوونم،
له‌ نێوان كاتی كولێرا و ئالوده‌بوونی كۆرۆنا
لێم ناگه‌ڕێ‌ بێم و بچم….
له‌گه‌ڵ پارادۆكسه‌كانی هه‌ڵبه‌سته‌كه‌م
نێرگه‌له‌یه‌ك به‌ده‌نگی تۆم ئاشنا ئه‌كا و به‌خۆم نامۆ
لێره‌ كه‌س به‌ ئاشنا نابێ‌
له‌كه‌ناری هه‌تیویمدا ئاره‌زووی كۆشی تۆ ئه‌كه‌م
ئه‌ی میهره‌بان…
هه‌ڵبه‌سته‌كه‌م كورسێكه‌ی به‌جێ‌ ناهێڵێ‌
نه‌با كه‌سێك له‌گه‌ڵ ته‌نیاییم دانیشێ‌
لێناگه‌ڕێ‌
بچمه‌ لای غه‌ریبیمه‌وه‌…
من ئه‌ڕۆم و هه‌ڵبه‌سته‌كه‌م هه‌ر كورسێكه‌ی جێ‌ ناهێڵێ‌
له‌بێ مینایی په‌نجه‌ره‌ ئای له‌مینا
مینای دڵم ئه‌شكێنێ‌ و
به‌ته‌نیشتما گوزه‌ر ئه‌كا.
كلووی دوانه‌ باسی به‌ختم بۆ ئه‌كات و
دوای سه‌رده‌مێك
له‌ په‌نجه‌ره‌ شكاوه‌كه‌وه‌ ون ئه‌بم..

4-3-202
تێبینی

(ئای له‌مینا) مه‌به‌ست گۆرانی ئای له‌مینایه‌
هه‌ڵبه‌سته‌كه‌م.. هه‌ڵبه‌ستی كچم
مینا — شوشه‌




به‌ ژنه‌ دزه‌كه‌ى دیار ماڵى خوا ناوى بردم ……….. چنوور نامیق ( هه‌ڵوێست)

تازه‌ شیعرم خه‌ریكى داره‌ داره‌ بوو
ژنێك هات و
یه‌كه‌ یه‌كه‌ كوچه‌ و باخ و شار و دڵى نۆبه‌رى شیعرى من گه‌ڕا
ناوى نام ژنه‌ دزه‌كه‌
گوایه‌ هه‌موو به‌یانییه‌ك به‌ته‌نیشتى باخى پێغه‌مبه‌ره‌وه‌ ره‌ت ئه‌بم
گۆرانى حه‌رام ئه‌ڵێم و
میوه‌ى باخى حه‌بیب ئه‌دزم!
له‌مانشێتى یه‌كێ له‌ رۆژنامه‌ ساواكان واى نوسیبوو
ئه‌و ژنه‌ دزه‌ روحسوكه‌
ده‌ست بۆ كه‌لامى خوا ئه‌با و
ئه‌یكاته‌ ملوانكه‌ شیعر و له‌ملى شه‌یتانى ئه‌كات
ئه‌و ژنه‌ به‌ناو موسوڵمانه‌ نوسیبووى
خودا خاوه‌ندارى نییه‌
كه‌چى به‌خۆى به‌ناوى خوداى جوانه‌وه‌
نه‌فره‌تى له‌ شیعرم كرد و
به‌ ژنه‌ دزه‌كه‌ى دیار ماڵى خوا ناوى بردم
ژنێك به‌سه‌به‌ته‌ شیعره‌كانم گوناهبار ده‌كا و
ئه‌ڵێت ئه‌مه‌ كه‌لامى حه‌بیبه‌ و تۆزێ به‌ده‌ستكارییه‌وه‌!
بێده‌نگ وه‌ك شه‌و
سه‌لار وه‌كو خه‌ونى مه‌ییو
سه‌به‌ته‌ى شیعرم رۆ ئه‌كه‌م
تا زه‌كاتى ئه‌و دڵانه‌ى لێده‌ربكه‌م چاویان به‌ دڵى منه‌وه‌ هه‌ڵواسرابوو
كه‌چى ئه‌و لێم ناگه‌ڕێت و ئه‌ڵێ
بۆنى كه‌لامى خوا ئه‌كه‌م
” دێت بۆن به‌ دڵمه‌وه‌ ده‌كات”1
گشت هه‌ناسه‌م ئه‌پشكنێ
كفرى شیرین2
روح و چاوم داگیر ئه‌كا و
فرمێسكى شه‌مس ئه‌زێته‌ روحى زۆر به‌رزم
ژنێكى به‌ناو موسوڵمان
نه‌فره‌تى له‌ شیعرم كرد و
به‌ ژنه‌ دزه‌كه‌ى دیار ماڵى خوا ناوى بردم
منیش بێده‌نگ وه‌ك سێبه‌رى نیشتیمانه‌ دزراوه‌كه‌م
سه‌لار وه‌كو خه‌ونى مه‌ییو
سه‌به‌ته‌ى شیعرم رۆ ئه‌كه‌م
تا زه‌كاتى ئه‌و دڵانه‌ى لێده‌ربكه‌م چاویان به‌ دڵى منه‌وه‌ هه‌ڵواسرابوو
و
بۆ كه‌ركوكه‌كه‌م ئه‌گریان!

چنوور نامیق ( هه‌ڵوێست)

——————————————-

1- دێن بۆن به‌ دڵته‌وه‌ ده‌كه ن‌: له‌شیعرى ئه‌حمه‌دى شاملو
2- كفرى شیرین: رۆمانێكه‌ له‌ كتێبى چل رێساكه‌ى عه‌شقى ئه‌لیف شه‌فه‌ق
30-5-2019




نیشتیمان قومارخانه‌یه‌ و جێیه‌ك نییه‌ بۆ پێكه‌وبوون چنوور نامق …

له‌م هه‌ره‌سی وه‌رزی عیشقه‌
سه‌د ساڵ ته‌نیایی ئه‌كه‌مه‌ جانتاكه‌م و
سه‌ری شیعرم هه‌ڵئه‌گرم ….
ئه‌و پێی وتم
پێكه‌وبوونی دوو سێبه‌ری به‌ناوی عه‌شق
گه‌وره‌ترین هه‌ڵه‌ی تۆیه‌!
له‌شێتییا
ملوانكه‌كه‌م ئه‌بچڕم و
مناڵیم له‌ سه‌رده‌می جه‌نگ ئه‌هێنمه‌وه‌
ده‌سته‌كانم خۆڵاوین و
په‌رچه‌مم سێبه‌راوییه‌
گه‌وره‌بوون وه‌ك خه‌م گرانه‌…
به‌رد ئه‌خه‌مه‌ جێگه‌ی دڵ و
مه‌یلی دڵدار به‌و دڵه‌ بێ‌ مانایه‌ی خۆم ره‌جم ئه‌كه‌م
ئیتر هه‌نار به‌سه‌به‌ته‌ ناگوێزمه‌وه‌
بۆ باخی دڵ
هۆ كۆنه‌ شار پێت نه‌وتم پێكه‌وبوونی
ئاو و ئاگر گه‌وره‌ترین هه‌ڵه‌ی تۆیه‌؟
باران ئه‌كه‌مه‌ ئه‌دره‌س و
بێده‌نگی ئه‌مگه‌یێنێته‌ ئه‌و دیوی باخی وه‌ڕزبوون
ئیتر زه‌مه‌ن له‌ناو ده‌ستم راناگرم
ئیتر هه‌نار به‌سه‌به‌ته‌ ناگوێزمه‌وه‌ بۆلای خودا
هۆ گه‌وجه‌ گیان
چیتر وه‌ته‌ن ناكه‌مه‌وه‌ به‌ سته‌یجی دڵداره‌ ساویلكه‌كانی دیار شه‌ڕگه‌كان
ئیتر ئیتر
دڵ وێرانه‌ی ئه‌وینێكی وه‌ك سێبه‌ره‌
له‌هیچ باخێك بوونی نییه‌
پوچی ئیماره‌تی منه‌
تاقه‌تم نه‌ما نا نا نا
سه‌د ساڵ ته‌نیایی ئه‌كه‌مه‌ جانتاكه‌م و
سه‌ری شیعرم هه‌ڵئه‌گرم
تاقه‌ وڵاتێك شك نابه‌م بارانی چاو بگرێته‌ خۆ
وه‌ك ئورسۆلا
ته‌نیایی روح بۆ دڵدارێك ئه‌گێڕمه‌وه‌ ته‌واو زه‌مه‌نی بیرچووه‌
وا سه‌د ساڵ ته‌نیایی ئه‌مبات
واز له‌ باخچه‌ ئه‌هێنم و ئه‌ڕۆمه‌وه‌ بۆ ماكۆندۆ
ئیتر ئیتر باخی هه‌نار ناگوێزمه‌وه‌
بۆ بێستانی نه‌هاتی دڵ
هه‌نگه‌ ژنێك فێری كردم
خه‌یاڵ نزیكترین رێیه‌ بۆ ده‌ربازبوون
واته‌رمه‌كه‌م له‌ گه‌ڵ
جانتای ماكیاژه‌كه‌م
له‌گه‌ڵ سه‌د ساڵ له‌ ته‌نیایی و
ته‌مه‌نێك له‌شیعری سپی
ئه‌گوێزمه‌وه‌ بۆ ئه‌ودیوی شار ، نیشتیمان
چیتر هه‌نار به‌به‌رچنه‌ی خه‌یاڵی دڵ ناگوێزمه‌وه‌ بۆ ناو باخان
هه‌نگه‌ ژنێكی وه‌كو خۆم فێری كردم
بڕوا به‌ ئوكتۆبه‌ر نه‌كه‌م
ئیتر نزای هه‌ناراوی ئه‌م باخانه‌ نابه‌مه‌وه‌ بۆلای خودا
تازه‌ زانیم
نیشتیمان قومارخانه‌یه‌ و
جێیه‌ك نییه‌ بۆ پێكه‌وبوون
ئوكتۆبه‌ر دڵی بردم و نه‌یدامه‌وه‌
ئوكتۆبه‌ر شاری بردم و نه‌یدامه‌وه‌
ئوكتۆبه‌ر روحی زڕاندم
ئوكتۆبه‌ر وه‌كو ئورسۆلا ماندووی كردم
هه‌نگه‌ ژنێكی وه‌كو خۆم فێری كردم
نیشتیمان قومارخانه‌یه‌ و
خه‌یاڵ نزیكترین رێیه‌ بۆ ده‌ربازبوون له‌نیشتیمان!

ئورسۆلا: هاوسه‌ری خوزێ‌ ئوركادۆ بویندیا ، رۆمانی سه‌د ساڵ ته‌نیایی ماركیزه‌
ماكۆندۆ: شوێن له‌ رۆمانی سه‌د ساڵ ته‌نیایی




وا ئه‌بمه‌ وه‌ڕینی پڕ له‌ پرسیاری سه‌گه‌ برسێكانی ناو شار … چنوور نامیق

من ژنێكم وه‌كو باران زوو ئه‌بارم
چاوم له‌ مه‌یلی هه‌وره‌كان نابێته‌وه‌
خوێندنه‌وه‌م ئه‌سته‌متره‌
له‌قوژبنی ماڵی چۆڵی ته‌نیاییه‌ك
پیته‌كانم ئاڵۆزترن
له‌ كردنه‌وه‌ی لوغزه‌كانی فه‌لسه‌فه‌ی پیاوانی وڵات
دێره‌ په‌رته‌كانی ناخم وڕێنه‌ی كۆساڵانێكن
چاوی قه‌ده‌ر لێیان ناگا
چه‌ند روونترم له‌ فرمێسكت هه‌ر ناتوانی بمخوێنییه‌وه‌
خوێندنه‌وه‌ی نیگای تیژی باڵنده‌یه‌ك ئاسانتره‌ له‌ سه‌رنجێكی رژاوم
وانه‌كانی ژیان كورتن پێڕاناگه‌ی منی تێدا بدۆزییه‌وه‌
ئه‌مڕۆ له‌وانه‌ی گه‌مه‌كان دیسانه‌وه‌ سفرم هێنا
خه‌ونێكی به‌سه‌رچوو هات و چاوی بردم
به‌خێرایی له‌ڕه‌نج به‌ خه‌ساری مێرووله‌یه‌كی یه‌ك پێدا بێوه‌ر بووم
من ژنێكم له‌ باراندا ئاشت ئه‌بمه‌وه‌
له‌زاكیره‌ی پاسارییه‌ك بوومه‌ پووش و ماڵێكی بارانم شێواند
بومه‌ پوش و ماڵی گومانم گسكدا
بوومه‌ پووش و
كه‌نارێكان به‌ده‌م نیگای رژاومه‌وه‌ هه‌ڵئه‌وه‌رین
بوومه‌ باڵ و فڕینم له‌بیری كه‌نارییه‌كان ئه‌برده‌وه‌
بوومه‌ مناڵێكی سپی و
رۆژگار خۆی تیا شاردمه‌وه‌
بوومه‌ مه‌ل و
شینایی ئاسمانه‌كانم ئه‌خوێنده‌وه‌….
له‌گه‌ڵ گومانی باراندا بوومه‌ خۆم و قسه‌كانم بیرچووه‌وه‌
بوومه‌ كتێبێكی كۆن و پیته‌كانت ئه‌خوێندمه‌وه‌
وه‌لێ‌ نه‌خوێنه‌وارێكی ساوای
هێشتا په‌ی به‌ڕسته‌یه‌كی ناته‌واوی چاوم نابه‌ی
ئێستا ژنێكی سه‌فه‌ریی به‌ر بارانم
وا ئه‌بمه‌ وه‌ڕینی پڕ له‌ پرسیاری سه‌گه‌ برسێكانی ناو شار
وا ئه‌بمه‌ مناڵێكی له‌بیركراوی دیارنه‌ماو
هێشتا نوقمی گه‌مه‌ شێواوه‌كانی شه‌وگاری دیار باران بووم
بوومه‌ وه‌ڕینی سه‌گه‌له‌كانی ناو شه‌وگار
پڕ پڕ بووبوومه‌وه‌ له‌ وه‌فا
وه‌فای جێماو
وه‌فای نامۆ به‌ مه‌سجه‌ تیژڕه‌وه‌كانی تۆ
ده‌ستوپه‌نجه‌ت له‌نوسینه‌وه‌م بكه‌وه‌
هێشتا نوقمی گه‌مه‌ شێواوه‌كانی شه‌وگاری دیار بارانم
با له‌ زاكیره‌ی باراندا نازی ژیان نه‌شێوێنم!

29-3-2019




وەکو شاژنی دارستان پاشماوەی جەهل ئەماڵم ….. چنوور نامیق

ڕۆمانە ژنێک زۆری ماوە بیڵێت و ناتوانێ
دەستێک بۆ ئەوەی دڵنیای بکاتەوە سزا هەیە
لەژورێکدا
جەهەنەمی پیشان ئەدا
ئەوەیە بەڵگەی ئیلاهی
ڕۆمانە ژن
ئیتر لەوێ نا
ئا لێرە
دیارە ڕاوڕاوێنێ خێڵی بەهەشت و جەهەنەمە
دیارە گۆڕینەوەى دنیا و قیامەتە لێرە
من خەڵکی ئەم زەوییە نیم
زەوییەک بۆتە ستەیجی
نمایشی جەهەنەم و پیاوانی خوا
لەو شوێنەی دڕینی قورئان
ئەکرێ بە ئەلبومی وێنە….
سوتاندنى مرۆڤەکان ئەبێتە بۆنەی دیدار و عەسرە چایی و هیلاکبونی دایکێکی ڕوو بزڕکاو
دەسموچێنی ڕیشسپیان و
گۆڕینەوەی بەرژەوەندی بزنسمان و
گەرمبونی ئەحادیسی گوێئاگردانی بوختان و
ساغکردنەوەی چەن پرۆژەیەکی بەسەرچوو….
ئيتر لێرە؟
نا نا لێرە
کە ناپاکی ژن و پیاوێک ئەگۆڕێت بۆ بەرائەت و
عەشقی پیاوێک دابەش ئەبێتە سەر کۆمەڵێ ژن….
ئەمە فیلمی جارییەکانی سەردەمی زووم پیشان ئەدا…،
ديسان لێرە؟
نا نا لێرە
ڕۆمانە ژن وەکو شاژنی دارستان ڕاوەستاوم
بەفرێک بێت و….
دەستێکی سارد بەڕوومەتی مناڵی منا بێنێت و
جەستەی گەرمی یاخیبونی چەن ساتێکت ساردکاتەوە…
ڕۆمانە ژن
چاوەڕوانم ئەو بێت و قردێلەی سپی بدات لەقژی مناڵیم..
لەوێشەوە بەپروشە ناخی گەرمت ساردکاتەوە
ڕۆمانە ژن
تۆ ئازاترین ژنەکانی سەر زەویت
هەر تۆ توانیت لەسەردەمی ئەبو جەهلدا بڵێی نا…
هەنارە ژن
وەکو شاژنی دارستان چاوەڕوانی بارانێکم
برژانگم بەسەرکاتەوەو
دانپیانانی ئاگرەکەی تۆ وەرگرێ …
رووی تۆش مانگێکی تۆراوە و
بەشەوقی خەم سێ پەروانەی سوتاندووە
وەکو شاژنی دوای هەرەسی دارستان
بەدیار بێدەسەڵاتی هەورەوە ڕڵوەستاوم
کۆمێنی گەنجێکی موعتاد ئەخوێنمەوە
بەفۆنتێکی زۆر شپرزە نوسیویەتی
(یانار کونی بردا وسلاما علی سێوان)
ئەو سێ مناڵەکەی سێوانی بیرچووە…
کەچی کچێک بە دڵنیاییەوە دەنوسێت
من لەهەوەڵەوە زانیم باوک مناڵی خۆی ناسوتێنێ
هەنارە ژن
وەکو شاژنی دارستان لەدەرگای سێبەران ونم
قەت ناتوانم مشتێ فێنکی بەسەر ئێوەدا بپرژێنم
ڕۆمانە ژن
ئەم ڕۆمانە تەمومژاوی کردووم و
گێڕەرەوەی تێدا نیە
ڕۆمانە ژن
ئیتر لێرە جێیەک نەما بۆ من و تۆ
پێم وایە جەهەنەم لەولا بونی نییە
چونکە پێچەوانەی فەتوای گشت تەریقەتەکان لێرە بینیم
ئیتر لێرە ناگیرسێمەوە
نا لێرە…
سیمایەک لەبەهەشت ئەچێ و جەهەنەم دێ و ئەیسوتێنێ
کە سێ پەروانەی بەهەشتی بەدەوری تۆوە داگیرسێن
عەشق و وڵات و متمانە نەما لێرە
ڕۆمانە ژن
وەکو شاژنی دارستانەکانی دوای جەنگی گشت مرۆڤەکان
پاشماوەی جەهل ئەماڵم
چاوەڕوانی کلووە بەفر و نمە بارانی شپرزەم
تاکو بێت و ڕووداوەکانی هەناسەت بنوسێت
تا من و تۆ لەگوناهی دەستی تاوان پاککاتەوە
ڕۆمانە ژنەکەی ژیان…

چنوور نامیق
16-1-2019




جانتاكه‌ی من چیی تێدایه‌؟ … چنوور نامیق

جانتای ژنێكی خه‌تابار
چی تێدایه‌
جگه‌ له‌ سه‌فته‌خه‌می په‌مه‌یی
جگه‌ له‌ سه‌رقاپه‌ بیره‌ و
قه‌ڵه‌مێكی چاوڕشتنی به‌ ئه‌زموون
و سوراوێكی تا بڵیی تۆخ له‌ ره‌نگی خوێن
جانتای له‌بیرچونه‌وه‌ی ژنێك چی تێدایه‌
پارچه‌ حه‌بی خاڵی نوستن نه‌بێ‌
سیمای ژنێكی خه‌تابار چی تێدایه‌
درۆزه‌رده‌خه‌نه‌ نه‌بێ‌
ئه‌ی دڵی ئه‌و چی تێدایه‌
جگه‌ له‌ بۆن و به‌رامه‌ی ترسی عه‌شق
جانتای ژنێكی ماندوو چاو
هه‌موو پوچێكانی تیایه‌
عه‌شق نه‌بێ‌
ئه‌بێ‌ چی تری تێدابێ‌؟
ره‌شنوسه‌ دڕاوه‌كانی شیعر نه‌بێ‌
چه‌ند جگه‌ره‌یه‌كی شكاو و
قه‌ڵه‌مێكی دڵته‌ڕی لێو
له‌ ره‌نگی خوێن
حه‌به‌ بێداره‌كانی نوستن و
مۆبایلێكی
چه‌ند جار شكاوی شه‌ڕه‌كان نه‌بێ‌ چی تێدایه‌؟
چی تێدایه‌ جگه‌ له‌ شیعره‌كانی دوای شه‌ڕی
یه‌كه‌م و دووه‌م و سێیه‌می جیهانی عه‌شق
چی تێدایه‌ جانتای ژنێكی دڵشكاو ؟
جگه‌ له‌ حه‌بی بێداری و قه‌باغه‌ بیره‌ی له‌بیرچوو و
چه‌ندین جگه‌ره‌ی وردكراو
و ته‌سبیحێك؟
ئاخر ئه‌بێ‌ چی تێدابی
جانتای دوای شه‌ڕی جیهانی سێیه‌م؟

23/November/2018




پێغه‌مبه‌رى من ژنێكى ده‌ستڕه‌نگینه‌…. به‌ ئاو ئازادى ئه‌نوسێ … چنوور نامیق

شووشه‌یه‌ك رۆشناییم پێیه‌
كراسێك له‌ ره‌نگى سێبه‌ر
پیاوێك له‌ خێڵى فریشته‌كان
بۆم ئه‌گه‌ڕێ
ژنێك بیرى بارانه‌كه‌ى خه‌ڵوه‌ت ئه‌كا
ته‌زبیحێك گوناهه‌كانم ئه‌ژمێرێ و
بۆنى په‌نجه‌كانم ئه‌كات
وێسگه‌ى مه‌راقێك رامئه‌گرێ
وێنه‌ى دوو كچه‌ جوانه‌كه‌ى دوێنێ كوژران
دڵى خواى بێزار كردووه‌
ئه‌یلول ته‌رمى فریشته‌یه‌ و
جێیه‌ك
ساتێك
ئارامییه‌كى تیا نییه‌
باسى كوشتنى تیا نه‌بێ
كوشتنى نه‌سلى فریشته‌ بێكه‌سه‌كان

پیاڵیه‌ك نوورم به‌ده‌سته‌وه‌یه‌
جار جار
نیگام ئه‌خواته‌وه‌
پیاوێك له‌ خێڵى فریشته‌كان
بۆم ئه‌گه‌ڕێ
پیاوێكى ده‌ست به‌ته‌سبیحى چل دانه‌یى
هه‌ر رۆژه‌و یاسایه‌كى عه‌شق
ئه‌كاته‌ ملوانكه‌یه‌ك بۆ ته‌رمى كچێكى كوژراو
چڵێ ئازادی و
پیاڵیه‌ك له‌ نورى خودام پێیه‌ و نیازم نییه‌ راوه‌ستم
تا زه‌مینێكى دوور لێره‌
زه‌مینێك دوور له‌ كوشتارى ئاسكه‌ كچ و
وشه‌ى زامدار
من هه‌قم به‌ پێغه‌مبه‌رى ئه‌وانه‌وه‌ نییه‌
ئه‌ونده‌ش ساقییه‌كى كاڵفام نیم
تا نه‌زانم
كام له‌ میوه‌كانى به‌رچنه‌كه‌ى ده‌ستى ئاده‌م خه‌تاباره‌
پێغه‌مبه‌رى من ژنێكى ده‌ستڕه‌نگینه‌
له‌ جێى پێنوس
به‌ ئاو ئازادى ئه‌نوسێ
پێغه‌مبه‌رم ساقییه‌كى‌ به‌ جێماوه‌
گوڵێك نه‌ما
میهره‌بانى له‌ ده‌ستى ئه‌و نه‌خواته‌وه‌
ئه‌و ژنێكى ده‌ست سپییه‌
ده‌ستى به‌ بڕینى گوڵه‌كان سوور نییه‌
ئه‌و ئه‌زانێت كامه‌ په‌نجه‌ بۆنى سێوى گه‌نیو ئه‌دا
كام ئازاره‌ به‌رائه‌تى مانگه‌شه‌وى لێڵ كردووه‌…
پێغه‌مبه‌رى من جیاوازه‌
روحى كچێكى كوژراوه‌
له‌ ژێر هه‌ر به‌ردێكى وڵات
ژووانگه‌یه‌ك ماچى سوورى شاردووه‌ته‌وه‌
له‌ به‌ر ده‌رگاى هه‌ر مزگه‌وتێك
راپۆرتى ده‌یان كچى كوژراوى ریز كردووه‌…
پێغه‌مبه‌رم ساقییه‌كى به‌ جێماوه‌
گوڵێك نه‌ما
میهره‌بانى له‌ ده‌ستى ئه‌و نه‌خواته‌وه‌…

1-10-2018




شار سه‌رگه‌رمی سه‌رپێچییه‌ و من سه‌رگه‌رمی درۆكردن … چنوور نامیق

به‌یانییه‌ و سه‌رپێچیه‌كانی ناو شاریش
وه‌ك سه‌رپێچێكانی دڵی من ده‌ستی پێكرد
سووره‌ و ئوتومبێله‌كان ده‌رئه‌چن
سه‌وزه‌ و دوو پیاو له‌ناوه‌ڕاستی شه‌قامدا یه‌ك ماچ ئه‌كه‌ن
له‌ نزیك شه‌ڕی دوو گه‌نجا
مناڵێك به‌ رۆژنامه‌وه‌
چاوه‌ڕێیه‌
مانشێتی پێكه‌وه‌ ژیانیان نیشاندا و
خه‌می شه‌ڕی دوو گه‌نجه‌كه‌ چاوانی بێتاقه‌ت ئه‌كا….

,,,,,,,,

شار سه‌رگه‌رمی سه‌رپێچیه‌و
مه‌لاكانیش بیر له‌ حۆری ئه‌كه‌نه‌وه‌
لای ماڵه‌ شێواوه‌كه‌ی شیعری من
كچێك به‌ رێی ژوانه‌وه‌ بۆ خۆشه‌ویستی ئه‌گه‌ڕێ‌
جار جار ئاوڕ له‌ دوودڵی ئه‌داته‌وه‌ و كاتژمێره‌كه‌ی دوا ئه‌خا
كه‌ ئه‌یبینم ساویلكه‌یی سه‌رده‌می عاشقبوونی خۆم دێته‌وه‌ یاد
له‌ولاتری كاوله‌ ماڵی شیعرێكمه‌وه‌
دار هه‌نارێكی تاقانه‌ی وه‌ك من بێكه‌س
هه‌نارێكی ئه‌كه‌وێت و له‌رز ئه‌یگرێ‌
هه‌نارێك ده‌نكه‌كانی لێ ئه‌ڕژێ‌
كۆترێك له‌ شه‌قه‌ی باڵ ئه‌دا و
مناڵێك دارلاستیكه‌كه‌ی ئه‌شكێنێ‌….
تازییه‌باره‌ چاوانم كه‌ توانای سه‌رپێچیم نییه‌
له‌وه‌ته‌ی هه‌م درۆ ئه‌كه‌م
ئیره‌ییم دێ‌ به‌ رۆینی كۆتره‌كه‌ و
شه‌رم له‌ ترسنۆكی خۆم ئه‌كه‌م
دیسانه‌وه‌ش
هیچ شتێك وه‌ك دواخستنی سه‌عاته‌كه‌ی ئه‌و كچه‌ ئاشقه‌ی ژوان رامناگرێ‌
كه‌ ئه‌یبینم ساویلكه‌یی سه‌رده‌می عاشقبوونی خۆم دێته‌وه‌ یاد….
له‌سه‌رده‌می كۆلێراوه‌
شار سه‌رگه‌رمی سه‌رپێچیه‌ و من
سه‌رگه‌رمی درۆكردن…..

14-9-2018
هه‌ینی




ئه‌مه‌وێ‌ روح له‌ تامی كفرێكی شیرین* نوێ بێته‌وه‌ …. چنوور نامیق

ئه‌م به‌یانییه‌ ئه‌مه‌وێ‌ جێپه‌نجه‌م له‌سه‌ر ئاوێنه‌ی ژووری نوستنم جێبێڵم
نه‌ك بمرم و تازه‌ بوكێكی قژ ئاڵۆز
له‌به‌رده‌می ماكیاجه‌كه‌ی دوێنێ‌ شه‌وی بسڕێته‌وه‌
ئه‌مه‌وێ‌ نازی هه‌ر پێنج په‌نجه‌ سارده‌كانم
له‌سه‌ر ئاوێنه‌ی ژووری نوستنم
به‌تاڵ بكه‌م
نه‌با دایكێكی بێداری پێش مردنم
مناڵه‌كه‌ی له‌به‌رده‌می ژیركاته‌وه‌…..
ئه‌مه‌وێ‌ دوا سه‌رنجی گه‌رمم
دوا پروشه‌ی زه‌رده‌خه‌نه‌م
له‌سه‌ر ده‌سته‌ سارده‌كانی مناڵی لای ترافیكه‌كان جێبێڵم
له‌وێش سه‌وز رێگه‌م نادا…
به‌نیازم دوا تنۆكی نیگای ساردم له‌ دڵی شعرێك جێبێڵم
كه‌ له‌سه‌ر لێوم تاساوه‌ و
دێت و نایه‌
ته‌نیا وێنه‌یه‌ك جێدێڵم
به‌ته‌نیشت ئاوێنه‌كه‌وه‌
وه‌لێ‌ ئه‌سه‌ف
كه‌س نازانێ‌ خه‌مێكی بخوێنێته‌وه‌
ته‌نانه‌ت ئه‌زیزه‌كه‌شم
دوای نیو سه‌ده‌ له‌ تێڕامان
له‌و وانه‌یه‌ سفر دێنێ‌ …
ئه‌مه‌وێ‌ دوا ئۆغری سه‌برم
جێپه‌نجه‌م
له‌سه‌ر هه‌موو شته‌كانی ژووری ژیان
به‌جێ بێڵم
تا هه‌ڵبه‌سته‌ شێته‌كه‌ی من
لێوه‌ی فێری به‌رگری بێ‌
به‌رگری له‌ خۆی
له‌ نیشتیمان
له‌ ئازادی…
ئه‌مه‌وێ‌ روح
له‌مه‌راقی پێكێكی تری ئه‌م بونه‌ نوێ بێته‌وه‌
له‌ تامی كفرێكی شیرین و
نیگایه‌كی خه‌مهاوه‌ری چاوی ئێلا
دوا هه‌ناسه‌ به‌ جێبێڵم
……..




نه‌بیر له‌تۆ ئه‌كه‌مه‌وه‌… نه‌بیر له‌تۆ ناكه‌مه‌وه‌ … چنوور نامق

هه‌ر رۆژێ‌ بیر له‌ عه‌شقی تۆ ئه‌كه‌مه‌وه‌
چه‌پكێ‌ له‌ قژم ئه‌وه‌رێ‌
هه‌ر شه‌وێك بیر له‌ هاتنت ئه‌كه‌مه‌وه‌
ئه‌ستێره‌یه‌كم ون ئه‌بێ‌
ئه‌مشه‌و ویستم بیر له‌ مێژووی پێكه‌وبوونمان بكه‌مه‌وه‌
مانگیش گیرا
له‌وه‌ته‌ی مانگ رووی شێواوه‌
‌روحی منیش وێڵ كه‌وتووه‌
هه‌ر بمه‌وێ بیر له‌ عه‌شقت بكه‌مه‌وه‌ شـێكی جوان له‌ده‌ست ئه‌ده‌م….
جارێ ملوانكه‌م ئه‌بچڕێ
جارێ كاڵترین قه‌ڵه‌می لێوه‌كانم لێ ون ئه‌بێ….
تاوێكیش چاوم ئه‌بارێ

ئه‌م وه‌رزی زستانه‌ دڵه‌م‌ مۆڵه‌ت نادا
كوانووی دیدارمان گه‌رم بێ
ئه‌م ئه‌وینه‌ نه‌فره‌تییه‌ش
رێگه‌ نادات ماڵی دڵم ئاسوده‌ بێ
هه‌ر جارێ بیر له‌ ئه‌وینت ئه‌كه‌مه‌وه‌
نایابترین پێكم ئه‌شكێ و
سه‌فه‌رێكم لێ تێك ئه‌چێ….
هه‌ر جارێ بیر له‌ منداڵیم ئه‌كه‌مه‌وه‌
گه‌وره‌یی دێ و یارێكانی ده‌ستم ئه‌شكێ
هه‌ر ده‌مێ بیر له‌ پێكه‌وبوون ئه‌كه‌مه‌وه‌
وڵاته‌كه‌م داگیر ئه‌كرێ…..
چی گه‌ڵای سه‌وزی وه‌ته‌نه‌ زه‌رد ئه‌بێت و
مانگیش وكو رووم ئه‌گیرێ…
بۆیه‌ ئیتر به‌ نیازم
نه‌بیر له‌تۆ بكه‌مه‌وه‌ و
نه‌بیر له‌تۆ نه‌كه‌مه‌وه‌….

30-7-2018




من و كه‌ژاڵ له‌ دیداری كریسمسدا … چنوور نامق

هۆ خانم خاس
تۆ خه‌ریكی چنینه‌وه‌ی پیته‌ جێماوه‌كانی شیعرت به‌و
هه‌ندێ‌ زه‌نگیانه‌گله‌ییش
له‌قسه‌ نه‌كراوه‌كانی كریسمس
بۆ روحی ته‌نیام جێبێڵه‌ خانم خاس گیان…..
تۆ به‌ ئاسوده‌یی بڕۆ و
چی زه‌رده‌خه‌می قه‌تیسی لێوه‌كانته‌ بۆ روومه‌تی لیمۆیی من….
ئه‌مڕۆ دڵم به‌تاڵه‌ به‌تاڵه‌ به‌تاڵ
هیچم نه‌ماوه‌ بۆ وتن
ئه‌مه‌وێ‌ روح له‌سه‌بوری جێهه‌نگاوه‌ دووره‌كانت پڕكه‌مه‌وه‌
به‌ڵام ئه‌سه‌ف
سه‌رگه‌رمانه‌ تۆ سه‌رقاڵی رۆینیت
پایزیانه‌ بزه‌ ئه‌كه‌یت
ئه‌مه‌وێ‌ رۆح به‌ قسه‌ نیوه‌چڵه‌كانی كریسمس ژیركه‌مه‌وه‌
كه‌چی زه‌ینم زۆر ناپاكیم له‌گه‌ڵ ئه‌كا هۆ خانم خاس!!
من له‌ قدومی دوودڵی كریسمسدا بۆت ئه‌گه‌ڕێم
هۆ خانم خاس چیتر متمانه‌م نییه‌ به‌ ژیان !
ئاوێنه‌كه‌م پرٍه‌ له‌ تۆ و
كێكی كریسمس بێ‌ مۆمه‌
دڵم بووه‌ته‌ ئه‌شكه‌وت و ده‌نگدانه‌وه‌ی قسه‌كانمان
به‌هه‌ڵه‌ ره‌شكردنی چاومان
هه‌ڵبژاردنی ره‌نگی لێو و
كراسی دوا ساته‌كانی ساڵ
پێكه‌كه‌م بیر ئه‌باته‌وه‌….
هۆ خانم خاس
من بیر له‌تۆ ئه‌كه‌مه‌وه‌ و تۆ سه‌رگه‌رمی رێگای دووری
ئیتر دڵم به‌تاڵه‌ به‌تاڵه‌ به‌تاڵ
تۆ خه‌ریكی رۆینت به‌ و
چی زه‌رده‌خه‌می قه‌تیسی لێوه‌كانته‌ بۆ روومه‌تی لیمۆیی من!

2-5-2018




كتێبه‌ كراوه‌كانی پاڵ ژنێكی دره‌نگخه‌وتوو….. چنوور نامیق

ئه‌م هه‌ڵه‌یه‌ ئه‌مكوژێت و زیندووبوونه‌وه‌ش دوباره‌ شێتم ئه‌كا و
دواییم نایه‌
جگه‌ له‌ ته‌ریقه‌تی درۆكان چی ته‌ریقه‌تێك مه‌زنتره‌ له‌ دوباره‌بونه‌وه‌ی روح
ئه‌م هه‌ڵه‌یه‌ مه‌ستم ئه‌كا و زوو ناگه‌مه‌ جێگای ونبوون
به‌شه‌ره‌فی سۆزانییه‌ جوانه‌كان سوێند بێ
متمانه‌ نیه‌ له‌م وه‌رزه‌ پووچانه‌ی تۆ
لێره‌ درۆكان جوانترین گره‌و
له‌سه‌ر مانی ئه‌رخه‌وانه‌كان ئه‌كه‌ن و
پایز له‌ نۆره‌ رۆینی گوڵان جێده‌مێنێ
بێ ئازیزن شه‌وانی دیار خه‌مه‌ بێ هه‌واره‌كانی روحی من
به‌دیار رمانی عه‌شقه‌وه‌
نزای سه‌د ساڵ پێكه‌وبوونمان به‌تاڵییه‌..
پوچن هه‌وره‌ خه‌مه‌كانی چاو
كه‌ ئه‌ڕژێنه‌ ناو ده‌ستی هه‌وه‌سی پیاوێك
رۆمانسیه‌تی چاوانم به‌تاڵ ئه‌بێته‌وه‌ له‌ پاكی.
مه‌هزه‌له‌یه‌ عاشقبوون به‌ له‌حزه‌ هه‌وه‌سبازه‌كانی پیاوێكی نه‌شاره‌زا
به‌كتێبه‌ كراوه‌كانی سه‌ر سینگی ژنێكی دره‌نگخه‌وتوو…

ئه‌م هه‌ڵه‌یه‌ ئه‌مكوژێت و دووباره‌ ئه‌مداته‌وه‌ ده‌ستی مه‌رگ
چه‌ن زیره‌كانه‌ ئه‌په‌یڤی كاتێ رژانی جوانی من رائه‌ماڵی و
تف له‌رووی ئه‌وینم ئه‌كه‌ی
به‌شه‌ره‌فی پاكی سۆزانییه‌ جوانه‌كان سوێند بێ
متمانه‌م نییه‌ به‌عه‌شق
لێره‌ پایز هه‌روه‌كو من له‌نۆره‌ رۆینی گوڵان جێده‌مێنێ
پوچن ئه‌و ده‌رده‌ دڵانه‌ی
له‌ناو ده‌سته‌ هه‌وه‌سبازه‌كانی پیاوێك
ئه‌كوژێنه‌وه‌ و
رۆژم لێ ئه‌كه‌نه‌وه‌ شه‌و
له‌ ناچاری نیگای پاكی سۆزانییه‌ك
بێ ئازیزن شه‌وانی دیار خه‌مه‌ بێ هه‌واره‌كانی روحی من
لێره‌ بڕۆ
…………………………….
26-2-2018
12 am




من و كه‌ركوك له‌ خه‌می دیلبوونی یه‌كتر ئه‌خۆینه‌وه‌ … چنوور نامیق

حه‌ڤده‌ رۆی و من و كه‌ركوك په‌ڕۆی
سووری سه‌رئێشه‌مان به‌ ته‌وێڵه‌وه‌ به‌ستووه‌
هه‌ژده‌ سه‌ره‌تاتكێیه‌تی و
من و كه‌ركوك بێ‌ نیشتیمان
من له‌ خه‌می دیلبوونی ئه‌و ئه‌خۆمه‌وه‌ و
ئه‌و له‌ عه‌شقی په‌رته‌وازه‌ی دڵی منا دائه‌گیرسێ‌
حه‌ڤده‌ رۆی و من و كه‌ركوك
دوور له‌ وڵات
نه‌فره‌ت له‌ دادوه‌ری ئه‌كه‌ین
هه‌ردوو به‌نیازین بڕۆین
وه‌لێ‌ تازه‌ دڵی من و كه‌ركوكه‌م
فرۆشراو
له‌نیشتیمان دابڕاین و
نایه‌ینه‌وه‌
حه‌ڤده‌ رۆی و هه‌شده‌ دوو دڵ و رارایه‌
من و كه‌ركوكی بێ‌ په‌ناش
دڵگه‌رمین و تاقه‌تی زه‌مه‌نمان نییه‌!
وه‌كو پێكی شكاوی دڵ
هه‌ر جاره‌و
ده‌ستی چه‌په‌ڵێك هه‌ڵمان ئه‌دا و
له‌به‌رده‌م شه‌ڕگه‌یه‌كی چۆڵكراو جێمان دێڵێ‌
حه‌ڤده‌ رۆی و تازه‌ من و كه‌ركوكه‌كه‌م
مه‌حاڵه‌ بگه‌ڕێینه‌وه‌
من له‌خه‌می دیلبوونی ئه‌و ئه‌خۆمه‌وه‌ و
ئه‌و له‌ عه‌شقه‌ ناكامه‌كه‌ی دڵی گه‌رمم دائه‌گیرسێ‌!

31-12-2017




دڵم وه‌ك نیشتیمان تۆرا و له‌ كاوله‌ی روح داڵده‌ی نییه ‌…. چنوور نامق

له‌نه‌خشه‌كه‌ت بمسڕه‌وه‌
چیتر ئه‌و شاره‌ دووره‌ نیم
ئه‌ستێره‌كانی بینینت زاخاو بده‌ن…
له‌شاری عه‌شقم دوور كه‌وه‌
خه‌ون به‌ماچی بیره‌وه‌رییه‌وه‌ مه‌بینه‌
من شارێكم پڕ له‌تاوان و
له‌كوشتن
له‌ناپاكی……
په‌نایه‌كم له‌ بۆ پپاوه‌ زلهێزه‌كان
هه‌موو ساتێ ده‌ستم هه‌یه‌ له‌كوشتنی خه‌ونی مانگ و
لێڵكردنی چاوی مناڵانی شار و
چۆڵكردنی ئاوه‌دانی و
شكاندنی دڵی ئازیز……
له‌ نه‌خشه‌كه‌ت بمسڕه‌وه‌
دڵم وه‌ك نیشتیمان تۆرا و
له‌ كاوله‌ی روح داڵده‌ی نییه!
قه‌فه‌سێكم ئاوازی هه‌ڵبه‌سته‌كه‌ی خۆم ئه‌شارمه‌وه‌
نۆته‌كانی ئه‌كه‌مه‌ قوتوی ژه‌نگاوی و
ئه‌یده‌مه‌ ده‌م ده‌ریای بیری پوچه‌ڵه‌وه‌

له‌نه‌خشه‌كه‌ت بمسڕه‌وه‌
ئاسمانێكم پڕم له‌ گرمه‌ی هه‌وره‌ پیاو
تاوانبارێكی بێ مانام
تا ئێواره‌ سه‌ماكانم له‌ژێر په‌رده‌ی عورفی سپی ئه‌شارمه‌وه‌
تاكو سه‌حه‌ر پێكی خه‌م ها به‌ده‌ستمه‌وه‌ و گۆرانی خۆش ئه‌خۆمه‌وه‌
تاوانبارێكی بێ مانام ده‌ستم هه‌یه‌
له‌چۆڵكردنی دڵی یار و ئاوه‌دانی
له‌نه‌خشه‌كه‌ت بمسڕه‌وه‌ !

27-11-2017‌




كاتێ جه‌نگ به‌پێی په‌تی دێ … چنوور نامیق

ئه‌و شه‌وانه‌ی كه‌ كه‌س نه‌نوست
بێداربووم وخه‌ونم ئه‌دی
گوێم له‌ زرمه‌ی جه‌نگی پێپه‌تی باشووره‌
باشوره‌كه‌ی لای خۆمان نا…..
كاتێ جه‌نگ هات ترێ نه‌ما به‌داره‌وه‌ و
چاوه‌ڕوانی عه‌شق رژا!
كاتێ جه‌نگ دێ دڵه‌كان خێرا ئه‌شكێن و
ئیتر چی جێیه‌ك نامێنێ له‌ بۆ عه‌شق
تاراوكه‌كانی ئه‌ودیوی وڵات نه‌بێ

******

له‌خه‌ونمدا وڵات لێم بووبوو به‌به‌هه‌شت
به‌یانی زوو له‌مانشێتی رۆژنامه‌كاندا نووسرابوو
بیری ئازادبوون سڕكرا

********

له‌ خه‌ونمدا شه‌هیدێك به‌كوڵ ئه‌گریا
بۆ سبه‌ینێ له‌شاشه‌ی تیڤێكانه‌وه‌
دۆست و دوژمن ئیمزای پێكه‌وبوونیان ئه‌كرد

******

له‌خه‌ونمدا قه‌له‌ڕه‌شكه‌ له‌شه‌ڕگه‌كان ئه‌نیشتنه‌وه‌
به‌یانی زوو
بڕیاری راگرتنی شه‌ڕ خێرا له‌گه‌ڵ دوژمن درا!

*****

كاتێ جه‌نگ به‌پێی په‌تی دێ
گۆزه‌ ئه‌شكێ و
شه‌راب ئه‌ڕژێ
ئیتر هیچ جێیه‌ك نامێنێ
له‌بۆ عه‌شق و حه‌وانه‌وه‌
نه‌فره‌ت له‌شه‌ڕی پێپه‌تی!

25/October/ 2017




ئاده‌مێك پێی وتم ……. ئاده‌مێك پێی نه‌وتم …. چنوور نامیق

دوای هه‌ڵدانه‌وه‌ی لاپه‌ڕه‌یه‌كی نه‌بینراوی پایز
دوای ئاشتبونه‌وه‌ی گریانی ئاسمان و بۆنی زه‌وی
ئاده‌مێك بۆنی دووری لێ ئه‌هات
ئاده‌مێك له‌پاشماوه‌ى شه‌ڕی به‌رائه‌ت و تاوان
به‌منی وت دووباره‌ من خۆشم ئه‌وێی
له‌پاش جه‌نگیش خۆشم ئه‌وێی
به‌ر له‌مێژووی شه‌ڕه‌ كۆنه‌كانی مرۆڤه‌وه‌ش خۆشم ئه‌وێی
له‌دوای بێهۆشبوونی ژه‌نه‌راڵه‌ تاوانباره‌كانی شه‌ڕیش ئه‌تپه‌رستم
ئێستا و دوێنێش و به‌ر له‌ دوێنێش خۆشم ئه‌وێی
ئه‌ی حه‌وا جێماوه‌كه‌ی دوای شه‌ڕه‌كان لێم ببوره‌ گه‌ر چركه‌یه‌ك بیرم چووبی…..
ئاده‌مێك پێی وتم خۆشم ئه‌وێی
له‌هه‌ڕه‌تی هاویناندا له‌ جێی سێبه‌ر به‌چه‌تری خۆر دایپۆشیم و دامئه‌پۆشێ
له‌ناو داڵغه‌ی دڵی ساردی زستاناندا
به‌ ته‌رزه‌ وشه‌ی نه‌گه‌ییو ره‌جمم ئه‌كا
ئاده‌مێكیش پێی نه‌وتم خۆشم ئه‌وێی
ئه‌و له‌ناو دڵی هاوینان
دنیایه‌ك بارانی سپی به‌سه‌ر دڵی گه‌رمم باراند
له‌ زستاندا به‌نمه‌نمی نیگای گه‌رم دایپۆشیم و دامئه‌پۆشێ
ئاده‌مێك پێی وتم و
ئاده‌مێك پێی نه‌وتم…..
ئا‌ی چه‌ن گه‌وجه‌ ئاده‌مه‌ خۆرهێنه‌ره‌كه‌
ئه‌و نازانێ دڵی ژن وه‌ك هه‌نار وایه‌ كاتێ به‌ده‌ستێوه‌ ده‌شكێ
په‌نجه‌كانی سور سور ئه‌كا و
ده‌نكه‌كانی هه‌رگیز بۆ كۆ نابێته‌وه‌
ئاده‌مێك پێی وتم و ئاده‌مێك پێی نه‌وتم……

21-8-2017




ئیتر دڵم وێرانه‌ كه‌لاوه‌یه‌كی نیشتیمانه‌ … چنوور نامق

بۆ له‌مه‌ولا خه‌ونه‌كانم ئه‌كه‌مه‌ عه‌ره‌بانه‌یه‌كی ده‌ستی و
زه‌مه‌نیش وه‌رزێكی گه‌ڕۆك …
ده‌مه‌و رۆژێك له‌ گه‌ڕه‌كی هه‌ژاره‌كان
ده‌نكه‌ ئازار ئه‌فرۆشم و
سواڵی مشتێ‌ شكۆ ئه‌كه‌م
ده‌مه‌و شه‌وێك له‌ به‌رده‌م ماڵی به‌رپرسێك رایئه‌گرم و
داوای نه‌خشه‌ی به‌ر له‌ ئازادی لێ‌ ئه‌كه‌م….
ده‌مه‌و خه‌مێكی نازه‌نین ماڵی دڵ كلیل ئه‌كه‌م و
له‌ پێش ماڵی سه‌ركرده‌یه‌كی ساویلكه‌ له‌سیسته‌می
دكتاتۆره‌ نه‌فامه‌كان رائه‌مێنم
حیوارێكی بێده‌نگ وه‌كو چاوه‌كانم
هاوارێكی كپ وه‌ك روحی هارم
له‌شوشه‌ی دڵ هه‌ڵئه‌گرم
قیژه‌ی كچه‌ ترساوێكی ئه‌و ده‌ڤه‌ره‌ له‌تاریكی هه‌ڵئه‌گۆزم و
له‌ناو ته‌می چاوه‌كانم هه‌ڵیئه‌گرم
دێمه‌وه‌ رێ‌
ده‌نگێك له‌غه‌یبه‌وه‌ ئه‌ڕژێ‌
سووك پێم یێژێ‌
مه‌ردی خواوه‌ بێره‌ رێوه‌
خۆم و عه‌ره‌بانه‌ خه‌ونێكه‌م
قیژه‌ی كپ و حیواره‌ بێده‌نگه‌كانمان،
روو ئه‌كه‌ینه‌
مۆزه‌خانه‌ ساخته‌كانی وڵاته‌كه‌م
له‌ قوژبنی مێژوویه‌كی له‌بیركراو چی هاوارمه‌
چی ئازارمه‌،
چ عه‌شقی ترسێنراومه‌
له‌پارچه‌یه‌ك خۆری زه‌ردی ئه‌پێچمه‌وه‌ و هه‌ڵی ئه‌گرم

رۆژێك له‌به‌رده‌م ئاوێنه‌ی گه‌ڕه‌كێكی هه‌ژارنشین
فۆتۆی پیاوه‌ ده‌ستسوره‌كانی عه‌داله‌ت
له‌ ئاوێنه‌ ئه‌گرم ودێمه‌ رێوه‌….
ئه‌مجاره‌یان له‌ به‌ر ماڵی كچه‌ سۆزانییه‌كی تێگه‌ییو له‌ عورفی ماچ
زانا له‌ شیكردنه‌وه‌ی سزای ماچ
بزان له‌ شرۆڤه‌كردنی شه‌وه‌ سووره‌كانی سیاسه‌ت
ساتێ‌ و ساتێ‌ رایئه‌گرم و
تیشكی گڵۆپی ره‌نگاوڕه‌نگ ئه‌خوێنمه‌وه‌
بۆ له‌مه‌ولا
روحم عه‌ره‌بانه‌یه‌كی ده‌ستییه‌ و
ئه‌م وه‌رزه‌ش وه‌رزی دییه‌نی
چاو مه‌یلی دووركوژی ئه‌كا
ئێستا دڵم هه‌رمێیه‌كی شكێنراوه‌ و
هه‌ر ده‌مێك و فوتبۆڵی پێی
مناڵێكی بێبه‌شی ئه‌م هه‌رێمه‌یه‌
ئێستاكه‌ دڵ ده‌نكه‌ زه‌یتونێكی مه‌سته‌
له‌ خه‌یاڵی سۆفێكانا له‌خۆ ئه‌چێ‌
ئێستا روحم عه‌ره‌بانه‌یه‌كی شه‌قوشڕی رۆژه‌كانه‌
ساتێك له‌ لای په‌رستگه‌یه‌كی وێرانه‌ رایئه‌گرم و
خه‌ونه‌كانی دوێنێ‌ شه‌وم ئه‌گێڕمه‌وه‌
خه‌ونێك له‌ سه‌ر پرسی خاكه‌ داگیركراوه‌كه‌م
خه‌ونێك له‌سه‌ر چه‌پاندن و
خه‌ونێك له‌سه‌ر دره‌نگ هاتنه‌وه‌م بۆ ماڵ
بۆ ماڵی دڵ
خه‌ونێك له‌سه‌ر رابواردنی كچه‌ سه‌رخۆشه‌كانی مه‌یخانه‌و
خه‌ونێك له‌ سه‌ر ماچه‌ وه‌ریوه‌كانی لێو
كه‌ نه‌مزانی شایسته‌ی كام ئاده‌مه‌یه‌،
ئه‌ی نیشتیمانه‌ وێرانه‌كه‌م ده‌ بێره‌ ده‌نگ.
چاوم رێگه‌ی سه‌فه‌ر ئه‌گرێ‌ و
هه‌ر ساتێك و پارچه‌یه‌كی ئه‌م وێرانه‌یه‌ ئه‌پێوێ‌ كه‌ناویان لێنا نیشتمان..
ئه‌مڕۆ نۆره‌ی گه‌ڕه‌كی سۆزانیه‌ به‌هه‌ڵوێسته‌كانی خاكه‌
ئه‌وانه‌ی له‌م نیشتیمانه‌ جێیان نه‌بوو
ئه‌وانه‌ی پاشماوه‌ی شه‌ڕن
ئه‌وانه‌ی خه‌ونیان به‌نانه‌وه‌ ئه‌دی
تاوێك له‌ خه‌می پیرۆزی چاوی كچه‌ سۆزانییه‌ك
تینوێتی پرسیاره‌ بێ وه‌ڵامه‌كان ئه‌شكێنم
جارێك له‌ هه‌ناسه‌ساردیی مناڵێكی برسی و
جارێكیشیان له‌لای نه‌فه‌ره‌ ناكامه‌كانی ناو پاسه‌ بێ‌ بلیته‌كانی نیشتمان نیگام ئه‌ڕژێ‌،
ئێستا دڵم دڵی كچه‌ ره‌دووكه‌وتوویه‌كی ناو پاسێكی نیشتیمانه‌ كه‌ له‌ پشته‌كه‌ی نووسرابوو
كوێوه‌ بڕۆم خۆشه‌ویستم..
عه‌ره‌بانه‌كه‌م ئه‌شه‌لێ‌ و خه‌ونم شه‌واره‌ی كردووه‌
ئێستا روحم وه‌كو كۆتره‌ تۆراوه‌كان هه‌رده‌مه‌و
په‌لكێشی گه‌نده‌ڵخانه‌یه‌كی ئه‌م نیشتیمانه‌ گه‌ڕو لاڵه‌م ئه‌كا
و خۆی جێم دێڵێ‌
و
به‌شه‌كه‌تی دێته‌وه‌ لام
روحی ماندووم عه‌ره‌بانه‌یه‌كی شه‌قوشڕی ده‌ست رۆژگاره‌ و
ئه‌م وه‌رزه‌ش وه‌رزی دییه‌نی
هه‌ر ساتێك و له‌ پێش وێرانه‌ ماڵێكی دڵ رایئه‌گرم
كه‌چی له‌وێش گلۆپی سه‌وزم بۆ پێئه‌كه‌ن.

28-7-2017




نامه‌یه‌ك بۆ خوا … چنوور نامیق

نامه‌یه‌ك بۆ خوا ئه‌نووسم
ئه‌ڵێم گه‌وره‌م
چۆن بتوانم ئازادی به‌ده‌ست بهێنم؟
دوو فریشته‌ی به‌رگ سپی به‌ سێو ژیانم ئه‌شكێنن….
خوا به‌ نیگا گله‌یی بارانم ئه‌كا و بێده‌نگ ئه‌بێ‌
بێده‌نگتر له‌ هه‌موو جارێ‌
یه‌كێك له‌وێ‌ له‌ پرسگه‌ی به‌هه‌شت دانیشتووه‌
لای خۆمانیش وا بزانم له‌ وه‌زاره‌تی پاره‌كان بوو
له‌سه‌ر سینی زیوینی مه‌رگ پێكێك هه‌نگوێنی ژه‌هرینم له‌ بۆ دێنێ‌
ئه‌مجاره‌یان فریشته‌كان به‌ لیمۆی عه‌شق ره‌جمم ئه‌كه‌ن…
ده‌مم بۆنی سێو ئه‌دات و ره‌نگم تاڵی لیمۆ ئه‌گرێ‌
خوا به‌ ئاماژه‌یه‌كی سارد ئه‌ڵێ‌
بێده‌نگ به‌ ئێستا تۆ حۆرییه‌كی ده‌سبه‌سه‌ری……
دوو فریشته‌ له‌ چه‌شنی پیاوه‌ جیاوازه‌كانی لای خۆمان
له‌سه‌ر مان و نه‌مانم به‌شه‌ڕ دێن
ئه‌وان به‌ خه‌نجه‌ری هابیل و قابیل شه‌ڕ ئه‌كه‌ن
پرشێ‌ خوێنی ناته‌بایی به‌ر یه‌خه‌ی سپی كراسه‌كه‌م ئه‌كه‌وێ‌
خه‌نجه‌رێك سینگم ئه‌پێكێ‌
خوا سه‌یرێكی رووم ئه‌كات و
مشتێ‌ به‌زه‌یی و مه‌راقم پێدا ئه‌كا
خزمه‌ دووره‌كانی قابیل
ده‌ستێكم رائه‌كێشن
و خزمه‌ نزیكه‌كانی هابیلیش
ده‌سته‌كه‌ی دیم….
ناوبژیوانێكی تریش
چه‌پكێ‌ قژم ئه‌با بۆ خۆی
له‌م هه‌راو شه‌ڕی حیرمانه‌ ئه‌كه‌ومه‌وه‌ سه‌ر زه‌وی
بێ ده‌ستو پێ
له‌ ده‌واری كچه‌ ده‌ربه‌ده‌ره‌كه‌ی به‌هه‌شت ئۆقره‌ ئه‌گرم .

8-5-2017




په‌یامێك له‌ هه‌ڵوێسته‌وه‌ بۆ …….. چنوور نامیق

په‌یامێك له‌ هه‌ڵوێسته‌وه‌ بۆ …………..

هۆ هۆ ڤیلا گیان به‌نیازم بڕۆمه‌وه‌ بۆ نیشتیمان
ئاگایه‌كت له‌ خۆرئاوا بێ نه‌كه‌وێ
چاوێكیشت له‌ چاویلكه‌ی هه‌وره‌كان بێ
به‌ ده‌م بارانه‌وه‌ نه‌شكێ
دڵێكیشت با لای هه‌ناسه‌كه‌ی من بێ
هۆ ڤیلا گیان
هه‌ڵوێست ئه‌ڕوا و نایه‌ته‌وه‌
ئاگایه‌كت له‌ گۆرانیی ریشۆڵه‌ قه‌تیسه‌كانی تۆڕی ناكه‌سبه‌چه‌كان بێ
دوا نۆته‌یان له‌م شوشه‌یه‌ی ده‌سته‌ سارده‌كانی من و
راڕایی هه‌ردوو بیناییم بشاره‌وه‌
ملوانكه‌یه‌كی بچڕاومت بۆ جێ دێلم
مۆری ئاده‌میان پێوه‌یه‌
ئه‌و بچڕاندی كاتێ نه‌مویست سێوه‌ حه‌رامه‌كه‌ بخۆم
هۆ ڤیلا گیان
به‌نیازم بڕۆمه‌وه‌ بۆ لای سروشت ئاگایه‌كت له‌ دڵی ته‌ڕی باران و
چاویلكه‌ی ناو هه‌وره‌كان بێ نه‌با به‌ هه‌ڵمی هه‌ناسه‌ و نیگا قه‌تیسه‌كانی من بشكێ
هۆ ڤیلا گیان
ئاهه‌كانی ئه‌ودیوی نیشتیمانه‌ نامۆكه‌م
گشت نه‌زه‌ره‌ ، حه‌رامه‌ ، ناوازه‌یه‌، یاساغه‌ تابووه‌ تابوو
مه‌یلی نیشتمان دایگرتووم له‌وه‌ ئه‌چێ نه‌یه‌مه‌وه‌!

7-4-2017
چنوور نامیق




پێكێكى به‌تاڵه‌ ژیان … چنوور نامیق

لێو گیرۆده‌ى خه‌مى تاڵه‌ و
ده‌ست ئالوده‌ى پێكى به‌تاڵ
چاو له‌وبه‌رى ژیان ماوه‌ و
دڵ موبته‌لاى وێرانه‌ شار
مه‌ترسه‌ ئیتر باران له‌گه‌ڵ ئه‌ودا نایه‌ و
‌زستان به‌ په‌تۆ ئاوییه‌كه‌ى داتنا‌پۆشێ

جارێكى تر نه‌بیرت بۆلاى سه‌رما ئه‌چێ و نه‌ كه‌س دێته‌ ‌ به‌ر په‌نجه‌ره‌ى یاده‌وه‌ریت
كه‌سیش ناڵێ خۆت به‌ پرچمه‌وه‌ بگره‌
چیتر باران به‌ گه‌ردنى شووشه‌یینى چاوه‌ڕوانیت گوزه‌ر ناكا
پێكێكى پڕ وه‌همه‌ نیگام
له‌گه‌ڵ جریوه‌ى جێمانێ
له‌ده‌ستم وردوخاش ئه‌بێ
پیاڵه‌یه‌ك له‌ ده‌ستم شكا وتم قه‌زاى عه‌شقى لێكه‌وت
په‌رداخێكیش زۆر له‌سه‌ر خۆ
نیانى په‌نجه‌ى زامارمى ئه‌خوارده‌وه‌ و من مه‌ست ئه‌بووم
پێكێك سه‌لارى نیگامى له‌گه‌ڵ خۆى برد
له‌و ده‌مه‌وه‌ بێدارم و خه‌ون ئه‌بینم
گه‌شتێكى به‌تاڵه‌ ژیان
جار جار پێكه‌وه‌ ئه‌ڕۆین و هه‌ندێ جاریش په‌شیمانى بۆ ئه‌ودیوى سنوورى عه‌شقمان ئه‌با و
جێمان دێڵێ
جارێكى تر نه‌بیرت بۆلاى سه‌رما ئه‌چێ و نه‌ كه‌س دێته‌ ‌ به‌ر په‌نجه‌ره‌ى یاده‌وه‌ریت
كه‌سیش ناڵێ خۆت به‌ پرچمه‌وه‌ بگره‌ ئه‌ى بێ لانه‌!




پێكێكی پڕ بۆ هه‌ڵدانی عومرێكی زوو … چنوور نامیق

وه‌ره‌ من و تۆ سه‌ر بنێینه‌ سه‌ری شێتی ئه‌م گۆرانییه‌ خه‌مناكه‌ی
كانگای روح و
پێكه‌وه‌ چرای بێده‌نگییه‌كی سه‌لارانه‌ هه‌ڵكه‌ین
نه‌فره‌ت له‌ قه‌ڵای شه‌وه‌كانی عه‌شق
كه‌ رۆژی تیا نایه‌ته‌وه‌ ….
غه‌ریبكه‌وتن به‌دیار چرای نیوه‌ گڕی ئیدمانه‌وه‌
بێ‌ بڕانه‌وه‌ ئاشنایه‌
له‌م غه‌ریبستانی دڵه‌
با من و تۆ به‌دیار گۆرانییه‌ كاڵه‌كه‌ی
“كاڵێ‌ بار مه‌كه‌”ئاڵای گریانێكی بێ‌ بڕانه‌وه‌ هه‌ڵكه‌ین و
له‌شه‌وه‌ به‌رده‌وامه‌كانی قه‌ڵا بۆ تنۆكێ‌ رۆژ بگه‌ڕێین
پێكێكم ئه‌وێ‌ به‌تاڵ به‌تاڵ
بۆ هه‌ڵدانی عومرێكی زوو
پیاڵیه‌كیش
بۆ خواردنه‌وه‌ی ئه‌و وه‌رزانه‌ی له‌ دڵمان چوو
ره‌ش، سیا ، ره‌ش
ره‌ش مرازی ره‌نگه‌ مه‌یله‌و درۆزنه‌كان به‌تاڵ ئه‌كا و
دڵی منیش فاڵی ژیان
كراسه‌كه‌م ره‌نگی سوری لێوه‌كانم به‌ درۆده‌خاته‌وه‌
هه‌ر بۆیه‌ش
په‌رداخێ‌ سه‌برم پێ‌ ده‌دات و
سه‌دای سه‌ره‌ڕۆی
“كاڵێ‌ بار مه‌كه‌”و “هۆ مه‌ڕۆ مه‌ڕۆ” مه‌ستم ئه‌كا تا وه‌رزبوون
له‌قاچی ساردی چۆله‌كه‌ شه‌واره‌بووه‌كان
من و تۆ و ئیدمان و قه‌ڵا
چوارینه‌كی دراسێی به‌رمۆداین و
رنگه‌ كاڵه‌كانی سروشت ئه‌خۆینه‌و ه‌و
وه‌ره‌ من و تۆ سه‌ر بنێینه‌ سه‌ری شێتی ئه‌م گۆرانییه‌ خه‌مناكه‌ی
كانگای روح و
پێكه‌وه‌ چرای بێده‌نگییه‌كی سه‌لارانه‌ هه‌ڵكه‌ین.
عومرێكی رژاوه‌
هۆ مه‌ڕۆ مه‌ڕۆ و كاڵێ‌ بارمه‌كه‌
كردومیه‌ لانه‌
ئێستاش بێتاقه‌تم بێتاقه‌ت بێتاقه‌ت
ئێده‌ وه‌ره‌ با من وتۆ سه‌ر بنێینه‌ سه‌ری مه‌ستی گۆرانییه‌كی شه‌رابی و
ئه‌م قه‌ڵای ئیدمانه‌ چۆڵكه‌ین.

1-4-2017